كاميليا شحاتة تظهر على قناة الحياة القبطية وتؤكد: أنا مسيحية.. وأبويحيى :هي كاميليا وأشك في كلامها


#1

[ul]
[li]كاميليا : لم أشهر إسلامي … وسأظل مسيحية ” … وأبو يحيى: ظهورها بهذه الطريقة إهانة لمصر[/li][li]كاميليا : الكنيسة لم تحتجزني ولم أقابل أبو يحيى وصورتي بالنقاب مفبركة … وأبو يحيى : ظهرت على قناة تسب الله ورسوله[/li][li]ما حدث كان خلاف بسيط بيني وبين زوجي … وعندما غبت أبلغوا أمن الدولة واعتذر للبابا [/li][/ul]
كتب – أشرف جهاد :
نفت كاميليا شحاتة في أول ظهور تليفزيوني لها منذ بداية أزمتها أن تكون قد غيرت ديانتها, وقالت إنها مسيحية وستظل على ديانتها ولن تغيرها, مؤكدة أن الكنيسة لم تحتجزها نهائياً.
وظهرت كاميليا عبر الفيديو كونفرانس مع زوجها كاهن دير مواس”تداوس سمعان” اليوم عبر فضائية الحياة المسيحية والتي تبث من خارج مصر وقالت إن كل ما حدث هو أني تركت البيت بعد خلاف زوجي, وذهبت عند بعض أقاربي “من بعيد” من دون أن أعلم أي أحد من أقاربي… مضيفة:”غلطتي الوحيدة أنني لم أعلم أي شخص من أقاربي.
وأضافت :” تركت إبني عند حماتي, وذهبت لأقاربي دون أن أخبر أحدا بمكاني, وبعد ثلاثة أيام بلغ أهلي أمن الدولة, الذي تمكن من الوصول لمكاني وأخذوني على أمن الدولة بلاظوغلي وحققوا معي لمدة يوم… وسلموني في اليوم التالي لأختي وزوجها.
وعندما سألها المذيع : هل استجوبك؟ قالت نعم استجواب عادي إنت فين وكنت فين؟ وليه سيبتي البيت وكده.
وأضافت “بقيت مع أختي وزوجها عدة أيام حتى هدأت, ومن ثم رجعت إلى زوجي وإبني وأكملنا حياتنا عادي, وذلك بعد شهر تقريباً”
وعندما سألها المذيع عن الإدعاءات عن إسلامها وذهابها للشيخ أبو يحيى ردت: أنا لا أعرفه إلا عن طريق الإعلام معرفش هو ليه طلع الإدعاءات دي كلها… وسألها هل قابلتيه من قبل فردت: “أنا أول مرة أشوفه كان على شاشة النت… ومعرفهوش ولا هو عمره شافني”
وسألها المذيع: فيه إشاعات أنك أسلمتي هل فكرتي في الإسلام في أي وقت من حياتك أو قلتي للبعض أنك مسلمة؟ ردت :”مستحيل … ولا قلت ولا هقول أنا مسيحية وهفضل مسيحة ولو رسيت إنها يموتني علشان أفضل مسيحية هفضل مسيحية”.
وسألها هل شككت في المسيحية؟ فنفت قائلة :”لا طبعا المسيح في دمنا من واحنا صغيرين ومعروف عني وأسرتي أننا متدينين وحياتنا في الكنيسة”.
فمضى المذيع يقول: “هل في أي يوم اعتقدتي ان محمد رسول من عند الله وأن الإسلام دين من عند الله؟” فردت :”أبدا مستحيل أفكر في التفكير ده ولو واحد في المليون”.
وحول ما أثير حول ذهابها للأزهر, قالت كاميليا إنها لم تذهب للأزهر نهائيلي مضيفة: “أنا عمري ما نزلت مصر إلا في الرحلات وكل زيارتي لمصر القديمة والكنائس وأنا معرفش مصر”.
ونفت كاميليا التصريحات التي أدلى بها بعض زملائها بالمدرسة عن إسلامها على يد أحد الأساتذة وأنهم أقاموا لها حفلة بسبب دخولها الإسلام… وقالت: “المدرسة اللي أنا فيها مكنتش أعرف أسامي المدرسين ؟ وكان كل احتكاكي كان بالمدرسات مش بالمدرسين, والمدير قال للأمن الدولة إن لو بتي مش هشكر فيها زي ما شكرت في كاميليا.
وحول صورتها بالنقاب والتي قال الشيخ أبو يحيى أنها أخذتها في إستديو قريب من الأزهر, قالت كاميليا إنها مفبركة مؤكدة أنها لم ترتدي الحجاب لا بالضحك ولا بغيره مضيفة “ولا عمري غطيت شعري حتى”.
وحول الوثائق قالت إنها دائما تحمل أوراقها الرسمية، وهي مدرسة مؤقتة، وتحتاج باستمرار لاحتمال طلب أوراق منها، و أضافت أنها حين ذهبت أمن الدولة أخذوا الوثائق منها ولا تعرف كيف وصلت للسلفيين سواء من أمن الدولة أم استخرجوها من أي مصلحة بأي طريقة.
,أضافت أنها لم تترك رسالة، لزوجها وأن الفلوس التي تركتها كانت أموال “محوشينها لأننا كنا هانشطب شقة وخفت ليكون ها يحتاجها وأنا مش موجودة، وعندما عرف والدها أبلغ أمن الدولة، وأضافت الكنيسة لم تفعل أي شيء في القضية سوى احتضان المظاهرات في البداية، ولا علاقة لها بعد ذلك بها في أي نقطة. حتى العودة للزوج تدخل الأهل وتم حل المشكلة ولم تتدخل الكنيسة. واعتذرت كاميليا للبابا عما سببته له .

وفي أول رد فعل له على حديث كاميليا أكد بو يحيى أن من ظهرت هي كاميليا شحاتة وقال ” أنا لا أكذب أن من ظهرت على التليفزيون شحاتة ” لكنه أضاف انه لا يصدق ما قالته لأنها يمكن أن تكون مجبرة على قول التصريحات … وأعتبر أن حديث كاميليا غير مقنع وفيه إهانة لكل المصريين وظهورها على قناة تسب الله ورسوله أمر غير مقبول .

كان المستشار نجيب جبرائيل محامي كاميليا شحاتة قد هدد بالتخلي عن قضيتها في حال رفضها الحضور إلى النيابة العامة للإدلاء بأقوالها، وعبر جبرائيل في بيان له يوم السبت عن “انزعاجه” من اعتزام شحاتة الظهور على قناة الحياة القبطية في فيديو مسجل يتوقع أن يذاع في الثامنة مساء السبت.
وقال البيان إنه “تردد في وسائل الإعلام أنباء عن ظهور السيدة كاميليا شحاتة وزوجها القس تادروس سمعان على إحدى القنوات الفضائية الدينية غير المصرية، رغم إلحاحنا عليها أكثر من مرة بأنها إذا ما رغبت في الظهور فيكون ظهورها من أجل إراحة الشعب المصري وسد أفواه المغرضين بأن يكون ظهورها على إحدي القنوات المصرية”.
وقال جبرائيل للوكالة الألمانية إن “ترتيب ظهورها على فضائية الحياة القبطية تم من دون علمي أو موافقتي، وإذا لم توافق على الحضور إلى النيابة للإدلاء بأقوالها سوف أنسحب من القضية، فلقد فضلنا بصفة خاصة إحدى القنوات الرسمية حفاظا على استقرار وسلامة نسيج هذا الوطن”. وأضاف جبرائيل: “أعرف أنها تتعرض لضغوط نفسية كبيرة، لكني لا يمكنني الاستمرار في تولي قضيتها طالما تتخذ قرارات دون استشارتي”.


(con_eng) #2

شئ متوقع ,
ياريت الناس يرحمونا بقي ولا تقولوا اتعرضت لضغطت لا تنحرق مش عايزنها مين كاميليا اللى بلد بتولع دلوقتى بسببها ؟
فى مناطق فى القاهرة فى خناقات بين السلفين والاقباط دولوقتى , عشان ايه وعشان مين ؟

ارحمونا ارحمونا


(con_eng) #3

تبنى قضية كاميليا من البداية كان غلط
الوضع الحالى مؤسف لابعد الحدود
حسبي الله ونعم الوكيل
مصر اللي بتخسر


(system) #4

يا جماعة انا حاسس ان كاميليا دى عملين بيها فتنة طائفية وعلشان ايه احرجت مصر والمصريين ويا سلفيين فى لعبة كبيرة عليكم وعلينا يلا نحافظ على بلدنا وبلاش يخدنا التيار


#5

البلد انحرقت بالفعل وادى كاميليا اللى كانوا بيعملوا مظاهرات علشانها طلعت وعلى قناة امريكية بتشتم فى الرسول والاسلام تقول انها مسيحية
اعتقد ان الموضوع مش سبب اهانه للسلفيين اللى كانوا بيطلبوا بيها دا سبب اهانه للمسلمين جميعا


#6

انا شايف ان تبنى قضية كاميليا صح بس التظاهر امام الكنيسة وسب النصارى وشنوده هو الخطا
وانما كان المفروض التظاهر يكون قدام المجلس العسكرى لانى بصراحة حاسس انه مايع فى التعامل مع هذه القضية ودى اللى هيؤدي لمزيد من الفتنة
كان من الممكن ان يحظر الكلام حول هذا الموضوع فى جميع وسائل الاعلام واى شخص يقوم بالكلام او اثارة الموضوع يتم معاقبته والالتزام بالقضاء والقانون والمحاكم


(أبو أنس المصري) #7

ترددت كثيراً في الرد على هذا الموضوع وأكثر من مرة أحذف مشاركتي قبل أن أعتمدها، ولكني سأقول كلمة واحدة، والله ثم والله الكنيسة لها دخل في قضية كاميليا شحاتة وببساطة لأننا لسنا صغاراً يلعب بعقولنا، زوجتك اختفت لماذا تبلغ أمن الدولة؟؟ هل هذا من اختصاص أمن الدولة؟؟ إذاً فمعلوم لدى زوجها لماذا اختفت؟ وأيضاً سبق وأن أقرت الكنيسة متمثلة في شنودة وبشوي أن كاميليا موجودة وأنها في مكان آمن (من منطلق القائل نححن دولة ديموقراطية، مكان آمن طيب)، ويا شباب كاميليا لم تسلم وغير محتجزة ولم تعذب وإنسانة طبيعية وفي بيت زوجها وبتروح الشغل، كل هؤلاء الناس الذين تتعامل معهم لمدة تزيد عن 6 أشهر أين هم؟ هل هم في كوكب آخر؟ ألم يفتح أحدهم الصحف ويسمع بخبرها فيأتي ويقول لنا يا جماعة دا كاميليا زميلتي في الشغل بتيجي كل يوم، أو كاميليا جارتنا كانت تنشر الغسيل النهارده ووقفت شويه في البالكونة؟ ولا ظابط أمن الدولة إللي “عكشها” وحقق معاها وسلمها لزوجها كزوجة ناشذ أين هو وأين التقرير الرسمي لجهاز أمني مثل أمن الدولة، ولا دي كمان ما فتحلهاش ملف زي الإسلاميين والجماعة بتوع حقوق الإنسان ما يعرفوش آيه إللي حصل، يا جماعة كفانا لعب بعقولنا، مرة تخرج في كونفرانس كال ومرة ينوب عنها محامي، ومرة تفاجئنا على اليوتيوب!! بصراحة كلام لا يصدق، وآخر صيحة، المسلمون سرقوا ورقها من السجل المدني وكمان الهانم ماشيه بكل ورقها على طول أحسن بتاع الجرايد الصبح يكون بيوزع جوب أبليكاشن مع الجرايد وهُبَّه هاتلاقي شغل في السكة وهي ماشية تنفيذا للبرنامج الانتخابي للرئيس حسني مبارك، آآآآه يا مخي!!

أما القول مين كاميليا دي؟ أقول لو أسلمت فهي أخت لنا في الله مظلومة وكل الناس حرروا بعد الثورة إلا هي!! فهل يليق لنا كمسلمين أن نتخذها “دواسة” لكي ندعم استقرار بلدنا، المعتصم جيش الجيوش من أجل امرأة مثلها النبي طرد اليهود من أجل امرأة مثلها
أما لو تبين الأمر وأنها كانت نصرانية فلابد أن يتعرض أبو يحيى وشمودة لمسائلة قانونية على مستوى عال جداً ولربما تكون أمام محاكم عسكرية وأنا أقولها بملئ الفم أبو يحيى وشنودة زعيما هذه الفتنة لو كانت فعلاً لم تسلم، الأول لإثارة القضية والثاني لإشعال القضية وإكسابها بعدا طائفياً بدون أدنى سبب حقيقي، فكان من الممكن أن يقول هذه ليست قضية كنسية بل هي قضية شخصية وكاميليا في بيتها وروحوا اقبضوا عليها وحققوا معاها

أما من تأثر بالمواجهات الأخيرة، فأنا أقول والله هذا التأثر تأثر سلبي واستقراء ناقص للقضية، من أين أتى هؤلاء النصارى بالسلاح؟ ومن صرح لهم استخدام السلاح والقتل؟ أنا لا أقول أن ما قام به المسلمون صحيح وأنا أشك في تورط السلفيين في الأحداث بل أراهن على ذلك لأن القصة درامية بشكل مضحك، واحد اتصل الحقوا مراتي، يا لا ياجدع دي واحدة تانية أسلمت، حاصروا الكنيسة، لأول مرة تواجد أمني لأه وكمان استجاب لمطالب المسلمين وقرر تفتيش الكنيسة، مع العلم إن التفتيش البيوت وليس الكنائس لا يكون إلا بقرار من النيابة، على أي حال هانفتش يا جدعان لأه وكمان هاناخد واحد من المسلمين شاهد، يا حلولي!!! قام النصارى ضربوا في المليان وهُب الشرطة بح وسيب الدنيا تولع،،،، مش عارف انا مين غللي كاتب القصة الروعة دي ومين إللي عرف يظبط درامتها ده

ما أشبه هذا الحدث بيوم الأربعاء يوم موقعة البغل والتي نتج عنها خرق في القرار الشعبي باستمرار حسني مبارك حتى نهاية ولايته أو التنحي الفوري وأنا كنت ممن تأثر، ولكن ولله الحمد أن الشباب ثبتوا ولم يتأثروا حتى انهار النظام الهالك، وأنا أرى أن الكنيسة في وضعها الحالي وإبقاء نظامها كما كان على عهد مبارك هو خرق كبير للثورة ومن يتغنى بأهدافها، فلا يزال من هو فوق النظام ولا توال هناك مؤسسات فوق القانون وغير خاضعة للرقابة، ولا يزال هناك قرارات ثيقراطية تتخذ في البلاد، ولا يزال هناك تفرقة طائفية في المجتمع بالإضافة إلا ما سيتح عن ذلك من عدم التسوية في وظائف ومنح الدولة بناءً على التوزيع السكاني وسيبقى باستمرار هناك شخص أنت ترغب في أن يبقى ساكتاً راضياً حتى لا تفقد سيطرتك عليه وحتى لو بدت لك مطالبه أنها ليست من حقه، تماماً مثل الابن العنيد.

على أية حال، هذا فقط ما ترددت كثيراً في ذكره، ولكني رأيت أنه من باب الأمانة الفكرية فلابد أن أبينه وإن شاء الله سألتزم بضبط الكلمة اتجاه أي ردود لأني أعرف أنني خارج البلد ولا أعيش الوضع هناك ولكن أبنائي وأهل بيتي وأمي وأخوتي كلهم هناك، بل أقاربي في إمبابة نفسها وأنا لا أنفك عن أهلي بأي حال من الأحوال فلن أهنأ بعيش على حساب أمنهم وحياتهم.


#8

مش يمكن الموضوع فعلا مدبر من امن الدولة وجر رجل السلفيين فيها وسرب الورق فعلا مش يمكن اصلا كاميليا نفسها عامله المسلسل ده كله لاحراج المسلمين وخصوصا انها ظهرت على قناة الحياة المسيحية انت واخد الكلام كأنه حقائق مسلم بها . الكلام كله فى الموضوع لن يقدم ولا يؤخر ولا المظاهرات ولا اى حاجة احنا قولنا اكتر من مرة هو تطبيق القانون وكاميليا عندها استعداء للنيابة.

انا فعلا ابتديت اشك فى ابو يحيى وحسام البخارى خصوصا بعد الاحداث الاخيرة وابو يحيى اعترف بنفسه ان واحد اتصل بيه وقالوه خطفوا مراتى وطبعا ابو يحيى وحسام البخارى جمعوا الناس وراحوا يحاصروا الكنيسة زى ما يكون اى حد عايز يسلم لازم يروح يمضى حضور عند ابو يحيى.

اما موضوع ان النصارى ضربوا نار ده كلام غير مأكد حتى الان ولو افترضا ان النصارى ضربوا نار مكنش فى فريق تانى بيضرب نار عليهم ؟
القضية بكل بساطة
اشاعه وعليه ابو يحيى والبخارى جمعوا بعض السلفيين وحاصروا الكنيسة بحجة انهم خطفوا فتاه وبالفعل منهم اللى دخل يفتش ونفس الوقت الاقباط اتجمعوا ايضا وكمان البلطجية تجمعوا وفى منهم اللى من بره المنطقة اصلا فى ضرب نار حصل ومولوتوف والتسعة اللى ماتوا و100 مصاب.

وده كلام البخارى بيقول للناس روحوا عند الكنيسة وكلام بعض الاخوة على البال توك


طبعا نرى من الموضوع انه غياب للشرطة والقانون ولجوء بعض الناس لفرض قانونهم بنفسهم
وهذا هو الخطر الأكبر والقتنة القاتلة التى نوهت عنها تكرارا ومرارا طول الاسبوع الماضي
واتمنى من هولاء المهتمين بقضية كاميليا ترك الموضوع والاهتمام بقضايا مفيدة للاسلام والمسلمين
فتخيل كم الاموال التى صرفها هولاء فى طباعة اليافطات والاتوبيسات لمظاهرتهم لو كانت صرفت لتحفيظ مسلمين القران او تعليمهم القراة والكتابة لكانت افضل اللى الله من اللهث وراء سيدات تركن بيوتهن


(con_eng) #9

اولا بالنسبة لكاميليا اه لو اختنا واسلمت من حقنا عليها اننا نرفع قضيه وندافع عنها لكن مظاهرات مظاهرات , انا معاك ان الكلام على بعضه كده مش متركب بس لنفترض ان انا ا كنت فى وضعها(لا قدر الله والحمد لله على نعمة الاسلام ) والناس محروقه عشانى بره وقالبه الدنيا عشان خاطري ومستعده تقلبها حرب والكنيسة بشكل او تانى ضغطت عليا لتغير كلامى اه كان كافى انى اقول ياجماعه انا مسيحية وما اسلمتش والكلام ده مالهوش علاقة بالصحة اصلا وان لا محتجزة ولا حاجة , لكن يسالها ويقولها انتى فكرتى ان محمد رسول من عند ربنا ؟لا مستحيل طب فكرتى ان الاسلام دين؟ مستحيل اييييييييييييه !!! ده مش شكل واحده حتى عقلها الباطن فكر فى الاسلام.
دم المسلمين مش رخيص عشان يبقي عرضه للزيهم
اما عن احداث امبابة فهى كارثة ولعلمك عشان كاميليا جديدة او بمعنى اصح واحد مسلم اتجوز مسيحية واسلمت وبعد كده اهلها خطفوها وبعد مباحثات وشويه اتصالات من المدام عرف مكانها قال ايه فى الكنيسة دى وهما اساسا من اسيوط ولما جه امام مسجد المنطقة وكبير السلفيين فى البلدة واتكلم مع الراجل حس ان كلامه مش تمام وانه متلخبط وسوي الموضوع وكان داخل الكنسية يهدى الناس ولما الاهالى المسيحيين المجاورين للكنيسة شافوا الشيخ داخل ومعاه اخوة يطمن الباباوات افتكروا انه اقتحام على الكنيسة وبدا ضرب النار والمولوتوف الى آخره

الكنيسة كمان دى دار عبادة ولا مدرعه حربية ؟؟؟؟
ازاى يكون فيها سلاح ؟؟؟
هوه مين اللى مضطهد فى البد دى ؟
في ايه ؟


(أبو أنس المصري) #10

في كلامي السابق ما يغني عن تكراره.


(system) #11

بارك الله فيك … احسن كلام قيل فى الموضوع