استفسار عن اقسام هندسة


(system) #1

1- ما هو افضل قسم بهندسة ؟
يعني قسم ممتع وتتوافر فرص العمل به
مش مهم الصعوبة او السهولة
2-ارجو ان تزودوني بأي معلومات عن هندسة طيران لاني سمعت انها بفلوس ولا تتوافر فرص العمل بهذا المجال
وسمعت انها كلية لوحدها
وبرده سمعت ان الواحد بيخش ميكانيكا وبعد كده سنتين طيران في الاخر او حاجه زي كده
فما هو الصحيح ؟
3-على حد علمي ان السنة الاولى اعدادي وبعد كده في تنسيق
فما اعلى الاقسام ؟

انا سمعت عن اقسام كتير شكلها جامده زي طبية(تقريبا ده الاسم)
وفي ميكانيكا واتصالات وكهرباء وطيران وكل واحد بيقولي كلمة
ياريت حد يوضح ضروري لانه لتحديد مستقبل


(con_eng) #2

يا اخى مفيش حاجة اسمها اكتر قسم بيشغل لان دى بتاعت ربنا واللى يقولك غير كده يبقي منافق واكيد كل واحد بينصحك شايف قسمه احلى من اى قسم تانى والا مكنش دخله
انت ممكن تتدخل قسم ولا خريج فيه قعد من غير شغل وتتخرج وتبقي انت اول خريج ميشتغلش انا مش بحبطك بس عاوزاك تفكر بموضوعيه فى مستقبلك اولا لو انت حابب موضوع هندسة الطيران اسال عليه الاول وفى هنا منتدى خاص بهندسة الطيران الناس اللى فيه اكتر حد ممكن يفيدك
اما عن الهندسة الطبية فهى من الاقسام الهندسية الواعدة وعليها منح من بره للدراسات العليا كتير جدا بس لو بتتكلم عن واقع العمل فى مصر والوطن العربي هتلاقى ان الهندسة الطبية عندنا هى هندسة التسويق ومبيعات للمنتجات الطبية وطبعا دى مالهاش علاقة بالهندسة الطبية التصنيعية لانها لسه متفعلتش بالصورة اللى هيه فى مصر وخريج الهندسة الطبية ده اما انه بيكون clinical engineer هو bioeng. او maintenance وطبعا المعظم بيشتغلوا فى مصر صيانه لكن لو انت عاوز تكمل دراسات عليا فهى تعتبر من اكتر المجالات اللى مفتوح لها منح للدراسات العليا وفى دول متقدمة جدا زى السويد والمانيا وبتكون معظمها فى imaging
والمنح طبعا بتشترط انك معاك شهادة تويفل انترناشونال+ ومعدل تراكمى عالى فى الخمس سنوات + مرتبة الشرف احيانا

ده كده الكلام العام
اما ان كنت عاوز تشتغل فلازم تختار القسم اللى انت تحبه واللى يناسب ميولك وسيبك من اى حاجة تانية واثناء الدراسة لازم تاخد شهادات تدريب معتمده فى التخصص بتاعك وساعتها بس هتشتغل وربنا صاحب القرار فى الاول وفى الاخر
كلنا وقفنا نفس وقفتك دى ونفس الاسئلة وصدقنى يا اخى دى احسن اجابة ممكن تلاقيها
ومتنساش تستخير ربنا عشان يهديك للاصح
ولو احتجت اى مساعدة احنا كلنا اخواتك وهنساعدك باذن الله


(system) #3

انا قصدت القسم المطلوب خريجيه بكثرة في سوق العمل


(system) #4

طيب في مجال يسمحلي اني اسافر لللخارج عند الانتهاء من الدراسة ؟


(con_eng) #5

منح للدراسات العليا ايوه فى وكتييييييير جدا لكل دول العالم بس طبعا فى تخصصات الهندسة الكهربية او الميكانيكية او الطبية

وبشترط زى ماقولتلك معاك شهادة لغة انجليزية فى المعظم تويفل انترناشونال وبدرجة محددة + تقدير تراكمى مرتفع + مرتبة الشرف فى بعض الاحيان ده عشان تاخد منح مجانية اما اذا كنت بتسال عن السفر للخليج مثلا للعمل فعندنا هنا مهندسين كبار وشغالين فى السعودية وكلهم مهندسين ميكانيكا هما اكنر ناس يفيدوك
المشرف العام ابوانس المصري
والمشرف العام عبد الظاهر

ولو عاوز تسال عن الدراسة فى الخارج فى الهندسة الميكانيكية يبقي مدير المنتدى احمد الديب لانه يدرس بالمانيا


(system) #6

شكرا جزيلا اخي الكريم
ويبدو انني _ بمساعدتك_ قررت اني بأذن الله اتخصص ميكانيكا


(con_eng) #7

نسأل الله العلى العظيم ان يقدر لك الخير اينما كان ,


(system) #8

سؤال اخير
ايه اخبار الهندسة الطبية
مقارنة بالميكانيكا ايهما افضل ؟

انا حطيت موضوع في القسم المخصص بالتحديد لاحد استفساراتي وللاسف لم يجبني احد


(con_eng) #9

انا لا استطيع ان افتيك فى الهندسة الميكانيكية لانى مهندسة كهرباء وتخصصي التحكم الالى على كل حال لقد وجهت موضوعك لاستاذنا المشرف العام ابو انس وسيرد عليك فى اقرب فرصه وفقك الله ,


(أبو أنس المصري) #10

أخي الكريم
بداية أهلاً ومرحباً بك، ويبدو أنك من خريجي الثانوية العامة وإن شاء الله مقبل على الدراسة في كلية الهندسة فأجدد الترحيب بك لذلك وأرجو لك التوفيق من الله إن شاء الله.

طبعاً دا موسم الأسئلة عن هندسة وتخصصاتها، سواءً من شباب الثانوية العامة أو حتى من طلاب إعدادي هندسة، ونحن في المنتدى كأحد عناصر رسالتنا هي دعم مريدي المنتدى في اختيار تخصصاتهم، ولكن مهما يكن فليس الخبر كالمعاينة، ولا يصلح أن يصف الطبيب الدواء إلا بعد أن يكشف على الحالة ومن ثم يستطيع تشخيصها.
وسبق وأن أدرج بعض الزملاء سؤالاً مشابهاً لحضرتك، بس هو كان عاوز يعوم في الهندسة البحرية لكن حضراتك عاوز تطير في هندسة الطيران :slight_smile: وكان ردي عليه

شوف يا أُخَيَّ، أنا بصراحة أحب إنك “تدوس فرامل” شوية :slight_smile: وهذا طبعي في كل أموري، لا تعمق الفكر في مرحلة إلا بعد أن تنجز المرحلة التي أنت فيها، يعني مثلاً عيش معايا المشهد ده، إنت لم تنه اختبارات الثانوية العامة بعد ومع ذلك تسأل عن “مشاكل” “وجود وظيفة” “لتخصص” " الهندسة" “البحرية”، هل وصلت لك الصورة وفهمت لماذا وضعت أنا كل كلمة بين علمات تنصيص.
طيب! آيه المفروض يكون، أولاً أنجز ثانويتك العامة واجتهد أن تحقق طموحك في الالتحاق بكلية الهندسة، وحتى لو كنت ضامن إنك هاتدخلها سواءً بالمجموع أو بالفلوس، برده هاقولك ركز في الثانوية حتى تنهيها، فإذا دخلت هندسة فلديك سنة “اعدادية” كافية هذه السنة أن تحدد “ملامح شخصيتك الهندسية” وفي ذات الوقت ستبين لك الطريق الموصل لكل تخصص وما عليه من إشارات وعلامات
فإذا تبين لك الأمر “فاستخر” “واستشر” في أي تخصص تلتحق، فإن استقر لك الأمر على تخصص، انسى موضوع الوظيفة وإتاحتها لأن هناك تحدٍ جديد ينتظرك ألا وهو “التميز” وإذا وضعت أمامك شبح الوظيفة فقد تفقد “نعمة التميز” والتي معها -إن شاء الله- لن تسري عليك القاعدة العامة، فمثلاً أول الدفعة سيتم تعيينه معيداً فور تخرجه أياً كان تخصصه، أليس كذلك؟ وهكذا الحال بالنسبة لبقية العشرة الأوائل في الغالب في الشركات، وهناك من يسافر لإكمال الدراسة في الخارج، أقصد أن أقول، ركز فيما يسمى بـ"فقه المرحلة" و"وظيفة الوقت" يعني بالمثل البلدي المصري “لكل وقت أذان” بهذه الطريقة إن شاء الله لن تندم على لحظة فاتت منك، وهذا الكلام يؤيده أيضاً نظرية فكرية يسميها أصحابها بـ"التفكير خارج الصندوق" وفي الحقيقة شبح التفكير في الوظيفة أو أكبر صندوق ممكن أن تحصر نفسك بداخله أثناء تحديد معالم شخصيتك الفنية، ويقول أصحاب هذه النظرية أنه كلما حصرت نفسك داخل صندوق معين فإنك ستفقد حتماً كثيراً من الفرص الممتازة والتي تقع خارج نطاق ذلك الصندوق، لو رديت علي هاشرحلك الموضوع أكثر وأعطيك أمثلة

ولكني أنا الآن أصحح لك معلومة وهي أن هندسة طيران بفلوس، نعم هذا الكلام صحيح لو كنت تتكلم عن معهد امبابة للطيران، فهو على حد علمي بلفوس، أما هندسة القاهرة فهي أيضاً يوجد بها قسم طيران يمكنك الالتحاق به بعد إنهاء السنة الإعدادية ولكن هذا القسم فيه مشكلة إنه بيفتح مرة واحدة كل 4 سنوات، وانت وحظك؟ بس يمكنك مثلاً أن تكمل درسات عليا في هذا القسم حتى لو كنت خريج ميكانيكا أو كهرباء، بل هناك معيدون كثيرون في هذا القسم ليسوا من ابناء القسم أصلاً.

أنا مش هاتكلم معاك عن ميكانيكا كما من المفترض أني أكلمك عنه بحكم أنه تخصصي، ولكني فقط أطالبك بالتركيز في السنة الإعدادية وحاول أن تتعرق عن متطلبات كل قسم وطبيعته وطبيعة المواد فيه، واحفظ اسم أبو أنس المصري وكل ما يمر عليك شهر عدي علي وانا أتكلم معك شويه، وهكذا وأنا أعدك أنه بمجرد ما يمر الترم الأول ستتكون لديك صورة متكاملة ليس فقط عن التخصصات الهندسية واقسامها، بل عن مجالات العمل الهندسي وتحدياتها، حتى تتمكن من عمل مطابقة لذلك مع طبيعة شخصيتك وإمكانياتها ومن ثم يمكنك النجاح والتميز إن شاء الله وهو ما نهدف له أصلاً، والمواضيع بالمناسبة موجودة يالفعل في المنتدى وتم عقد مقارنة كبيرة بين الأقسام وتكلمنا بكثرة عنها في أكثر من موضوع ولكني أحب أن نصبر وندرك كل شئ ف ي أوانه، لأن شغلانتنا دي تختلف كتير عن باقي الشغل التاني، يعني تقدر تقول “شغلانة كِيف” زي المخدرات يعني :slight_smile: لو لم تكن على هواك ستكره حياتك، وإن وافقت هواك فسيكون عليها مدار حياتك، يعني مثلاً أختنا con-eng إللي جاوبت على حضرتك في البداية من كييفة الهندسة والنتيجة إنها معيدة في كلية هندسة وأنها كانت الأولى على دفعتها، وأنا مثلاً قد تصل ساعات عملي إلى 16 ساعة في اليوم بدون أجر إضافي مطلقاً بل أحياناً يخصمون مني حق التأخير في اليوم التالي لأني بالطبع نمت متأخر ورحت الشغل متأخر نص ساعة، فيخصموها وينسوا 8 ساعات إللي ببلاش، ومع ذلك أنا كييف شغل لأني بحبه.

أرجو أن تكون قد أصابت كلماتي صدى في نفسك، وأن تقبلني صديقاً لك في طريقك الهندسي إن شاء الله.


(system) #11

شكرا على الافادة
وعموما انا داخل تالته ثانوي لسا
وجبت في تانيه 95%


(con_eng) #12

كويس ان يكون ليك طموح وبتسعى ليه بس كل مرحلة وليها متطلباتها واهتمامتها ومينفعش تكون لسه داخل 3 ثانوى وتشغل نفسك بالمواضيع دى لانها هتيجي هتيجي ان شاء الله ركز فى الثانوية العامة الان وانهاء المرحلة الثالثة بتفوق واحنا متواجدين فى منتدى المهندس وساعتها اسال زى ما تحب :slight_smile:


(أبو أنس المصري) #13

ربنا يوفقك إن شاء الله.
تعرف احنا ليه بنتكلم معاك كده، لسببين الأول هو إنك تركز فيما أنت فيه حتى لا تخسره من حيث لا تدري.
وأما السبب الثاني فهو كما قلت سابقاً فقه المرحلة وأن الأمور تدرك بالصبر، فمثلاً بالنسبة لي منذ أن كنت ربما في أولى ثانوي وأنا كنت أطمح لهندسة تعدين وبترول السويس، وكانت يغني زي ما بيقولوا راكبه في دماغي قوي، ولكني شعرت أن المجموع خانني وأنني لن أدركها، وكان أبي وأمي لا يحبونني أن ألتحق بهذه الكلية وكانوا يتمنون ان لو قبلت أن أدخل هندسة القاهرة، وأنا بيني وبينك قلت كدا كدا أنا مش هادخل بترول السويس، قلت ارضي والديك وقدر الله أنني كتبت هندسة القاهرة قبل هندسة بترول السويس، وكانت صدمتي مروعة حينما فوجئت أن مجموعي كان يؤهلني بالفعل للنضمام لبترول السويس، وكان في مدرستنا كل عام طالب واحد يدخل هذه الكلية وفي عامي أنا لم يدخل ولا طالب فقلت “أكيد هو أنا :)” وعدت للبيت وقلت لوالدي “هاحول يعني هاحول” ثم قدر الله من المعوقات ما شاء أن يقدره حتى ضاقت بي نفسي ودخلت هندسة القاهرة مرغما عليها فخرجت منها مغرماً بها، وشاء الله لي أن لا أحرم من العمل في قطاع البترول، واشتغلت مهندس تصميم في شركة بتروجت وحصلت الحسنيين ولو عاد بي الدهر لما فكرت لحظة إلا في هندسة القاهرة.
أما قسم ميكانيكا فله قصة أيضاً ولكن بالعكس، لأنني في هذه المرة وافقت هواي وخالفت أبي وأمي، لأن قسم ميكانيكا معروف بالسمعة الغير طيبة سواءً في الدراسة أو في العمل كما هو متعارف عليها خطأً بين عامة الناس، ولكني أصررت حتى قال لي والدي في مرة: “انت مش ابني” ولكني أصررت لأنه القسم الذي يوافق هواي، والحمد لله وفقت في هذا القسم حتى تخرجت منه بتقدير جيد جداً مع مرتبة الشرف وكنت ثالث الدفعة واستدعيت للعمل كمعيد في جامعة القاهرة ولكني حبذت العمل في شركة بتروجت ولا سيما أن طلب التعيين تأخر لفترة حتى استقر بي الأمر فعلاً في بتروجت.

لأجل ذلك أنا أقول لك اصبر حتى تصل لمفترق الطرق وساعتها اسأل، يعني مثلاً تخيل إنك في مدينة العبور وعاوز تسافر الصعيد، هل من الأفضل أن تسأل واحد وأنت لا تزال في العبور كيف أصل للمنيا، فيقول لك امسك طريق مصر اسماعلية وخليك مع جسر السويس لغاية لما توصل العباسية وبعد كده رمسيس والتحرير وبعد كده عدي الكوبري إللي عند القصر العيني ومنه موزاي للنيل ستصل لشارع البحر الأعظم وطوالي للمنيب وبعد المنيب هاتلاقي كوبري ما تطلعش عليه وخليك من تحته هاتلاقي قدامك قرية اسمها القصبجي وبعد كده أبو النمرس وميل شيحة والحوامدية والبدرشين، وعند مدخل البدرشين خلي بالك الطريق هايفترق لطريقين خد الطريق الشمال اللي ماشي في وشه على طول وبعد كده لما يجي كوبري المرازيق ما تعديش عليه وكمل في وشك، بعد كده الطريق هايكون رايح جي في نفس الطريق …
طبعاً غير منطقي على الإطلاق لأنك أكيد مش هاتحفظ الطريق بالصورة دي، لكن الأفضل إني أوصف لك الطريق لغاية رمسيس مثلاً، وبعد كده تسأل واحد يدلك على الطريق لغاية القصر العيني وبعد كده واحد يوصلك للمنيب، وبعد كده واحد يعرفك الطريق للصعيد، وفي مدخل المحافظة اللي عاوز تروحها تسأل أهلها عن المكان إللي انت عاوز تروحه، كده إن شاء الله تفهم الطريق وتصل الغاية.


(dr_khaled) #14

بالتوفيق