حتسقط يعني حتسقط يا جمعاوي


(hendokasha) #1

[CENTER][COLOR=#ff6666]حتسقط يعني حتسقط يا جمعاوي!!

[/color]ده أحلى يوم في حياتي…يوم الامتحان…عارفين ليه؟؟ عشان ده اليوم اللي ببخ فيه الإجابة في الورقة بعد ما قعدت أحشي المعلومات في دماغي طول أيام المذاكرة المخنقة…
لبست هدومي…وقبل أن أخرج من باب البيت…نظرت إلى الكتاب…وقولتله: وربنا…وربنا ما حذاكرك تاني…
ثم ذهبت إلى اللجنة مسرعاً وأنا سعيد إني خلاص حفضي دماغي من مادة كاملة-طبعاً ده إن نجحت فيها إن شاء الله-وصلت إلى مكاني في اللجنة…وبعد أن جلست وزعوا علينا ورقة الإجابة…وطبعاً زي كل الشعب…سطرت الورقة وجهزتها للفرم اللي حيحصلها…وفجأة!!!
وزعوا علينا ورقة الأسئلة…نظرت إلى الامتحان وأنا لا أصدق نفسي…يا حومتي!!!..إيه ده يا واد يا جمعاوي … معقول … هو ده امتحان؟؟ … مش ممكن!! … ده امتحان محصلش في الأرجنتين… -متسألوش اشمعنا الأرجنتين؟طبعاً عشان بحب ديفيد بيكهام- لقيت الورقة…عجيبة…غريبة…كالآتي:-


الاسم:اكتب اسم الحاجة أمك :… … رقم موبيلك:… …
الإيميل:… … السيبر المفضل:… …
السؤال الأول:اختار من بين الأقواس الكلام الصح:
1- حنان ترك اتحجبت يعني… (لبست جزمة - لبست ساعة - لبست ايشرب)
2- اللي بنى هرم خوفو… …(طلعت مصطفى - المقاولون العرب - مقاول عادي - خوفو)
3- اللي بنى…بنى مصر كان في الأصل…(حلاق - نجار - تاجر مخدرات - السيد - حلواني)
4- البرنامج اللي بيجي ع القناة الأولى كل يوم الساعة 7.00 صباحاً ومحدش بيتفرج عليه برنامج…صباح الخير … (يا ماما - يا بابا - يا خالو - يا ريس - يا مصر)
5 - مصر هى أمي نيلها جوا…(بطني - رجلي - جيبي - دمي)
6- رئيس مصر القادم السيد…(جمال مبارك - جمال مبارك - جمال مبارك - كل ما سبق)

السؤال الثاني:أكمل الجمل الآتية بكلام م الآخر:
1- انتبه من فضلك السيارة ترجع إلى… … …
2- ماما زمنها… …
3- من خلال تجاربك السابقة…البامبرز استيك منه… .
4- طلعت أدّب نزلت أدّب لقيت الدب بيأزز…
5- اسم والد اللاعب وائل جمعة الحاج… …

السؤال الثالث:ضع علامة NIKE أو علامة غلط أمام الكلام الجاي:
1- بابا فين؟؟ …بابا هنا…قوله مين؟؟ قوله عمو ( )
2- الشرطة دائما في خدمة الشعب ( )
3- اللي بيته من سيراميك ميحدفش الناس بالبلاط ( )
4- شاي الجوهرة حتة سكرة ( )
5- يحكم مصر النظام الملكي ( )
“ملحوظة:لو معرفتش سؤال ابقى طلع المنفستو اللي معاك يا جمعاوي…غش براحتك…كده كده حتسقط يا جمعاوي عشان تحرم تقول لكتاب المادة بتاعتي كده…ماشي يا جمعاوي!!!”


قريت الورقة وأنا في اسبهلال تام…فركت عيني مرة وأتنين…والورقة زي ما هيا…قريت الملحوظة اللي في آخر الورقة تاني… وتالت …وأنا مش مصدق إن الدكتور كاتبلي …ماشي يا جمعاوي…ماشي يا جمعاوي
-جمعاااااااااااااااوي…أنت يا وااااااااااد يا جمعاااااااااااوي قوم بقى…عشان تروح الامتحان
-استيقظت من نومي…ثم نظرت حولي…إيه ده أنا لسه في البيت مرحتش اللجنة…الحمد لله كنت بحلم…ووجدت الكتاب جنبي ع السرير…فأخذته في حضني وقولتله…يا لهوي يا كتاب…بحبك يا كتاب… بموت فيك يا كتاب… بعشقك يا كتاب … مقدرش أعيش من غيرك يا كتاب …هو أنا ليا بركة ألا انت يا كتاب.
[/center]


(eng.Eiad) #2

دوختنا يا جمعاوي…أقصد hendokasha حلوة جداً

و السؤال الاصعب حسب ما شفت

6- رئيس مصر القادم السيد…(جمال مبارك - جمال مبارك - جمال مبارك - كل ما سبق)


(rim-o) #3

أروع من جامعة المحششين


(المهندس) #4

ياريتنى كنت مكان جمعاوى
كنت هاخد الدرجه النهائيه وهسيبكوا انتوا تحكموا
وده كان نموذج من الحل بتاعى

وعلى فكره اكيد المهندسه هند مصريه وكمان من اسكندريه
لان جمعاوى ده تبع الاخوه شباب التيار الاسلامى بجامعة الاسكندرية

(رغد ليمونه) #5

كده انت يامحمود هاتجيب للبنت مصيبه
ومش بعيد امن الدوله بتخبط عليها دلوقت
بس ياهنود جميله جدا ممكن نقول القصه القصيره دى
ولا الحلم ده
وبعدين ممكن تكون نبؤه ماهو مافيش حاجه غريبه اليومين دول


(hendokasha) #6

جزاكم الله خيرا علي الردود الجميله ياجماعه
وبعدين يابشهمندس محمود انا مصريه بس مش اسكندراينه بس طبعا اجدع ناس الاسكندرانيه محدش يقدر يقول حاجه
وبعدين ولا تيار اسلامي ولا حاجه احنا ناس عاديه جدا


(amr_cutie) #7

الموضوع جميل كدااا انا واللهى مت على نفسى من الضحك على الموضوع وعلى الردود الجميله والحقى استخبى بسرعه


(engmfm88) #8

ميرسى اوى يا بشمهندسة بجد مش عارف اشكرك ازاى لانك ضحكتينى بجد ومن قلبى , وبصراحة مش لاقى كلام يعبرلك عن اعجابى بروعة موضوعك … وبالتوفيق ان شاء الله .


(Mohamed R. Eid) #9

مفيش أسهل من كده
بس ركز