بسم الله الرحمن الرحيم
أحبتي في الله
ما رأيكم أن نحيا اليوم مع آية من آيات الله في كتابه الحكيم ،، نحيا مع هذه الآية
لنسمع ما الذي قاله لنا ربنا ،، فما أجمل أن تقرأ القرآن وكأنه رسالة حبيبة تأتيك
بالحب محملة بالنصائح والحلول والبشريات لتحيا سعيداً في هذه الحياة
سورة الأنعام
رمز الإخلاص لله فى كل شيء ،، وهي من أكثر السور التى تُشعرك بعظمة وقدرة
وملكوت ربنا تبارك وتعالى
واليوم
حديثنا عن التاريخ
آية في بدايات سورة الأنعام تنادينا وتحثنا على قراءة التاريخ
تستنهضنا وكأنها تقول :
اقرؤوا التاريخ ،، اقرؤوه على مهل وتدبر وباهتمام لتخرجوا منه بالعبر
هل انتبهتم لهذه الآية من قبل؟؟
إنها قوله تعالى :
قُلْ سِيرُواْ فِي الأَرْضِ ثُمَّ انظُرُواْ كَيْفَ كَانَ عَاقِبَةُ الْمُكَذِّبِينَ 11
ممكن ترجعوا تمشوا في الأرض ،، نمشي إزاي يا رب ؟؟
يعني نركب الجمال ونطلع عالشام مثلاً؟؟ طب واللي في الشام يروحوا فين يجوا
على مصر ؟؟
المعنى أعمق من السير على الأقدام
فهو تشبيه للتاريخ بأنه منبسط متسع كسعة الأرض
فاقرؤوه وسيروا في قصصه وحكاياته ودروسه وتدبروا فيها
قُلْ سِيرُواْ فِي الأَرْضِ ثُمَّ انظُرُواْ كَيْفَ كَانَ عَاقِبَةُ الْمُكَذِّبِينَ
اقرؤوه بفهم وشوق واهتمام لتنظروا وتعتبروا منه ،، اقرؤوه لتستشعروا دروس
الحياة ،، اقرؤوه لتزداد ثقتكم بالله أنه أبداً لا يغفل عن الظالمين ،، اقرؤوه لتعرفوا
متى ينصر الله عباده المؤمنين؟؟ ومتى يأتي نصر الله
ياترى كم واحد فينا بيحب القراءة ؟؟
هل وهو يقرأ ورايح بكل شوق على أقرب مكتبة من محل سكنه يشتري كتاباً يقرؤه
للمؤلف الفلاني أو في الموضوع الفلاني بيستحضر نية : لبيك يارب
حاضر يارب سأسير في الأرض
سأقرأ في تاريخ الأقدمين لأعتبر وأتعظ ،، سأقرأ وأوسع من مداركي الفكرية
والثقافية لأكون حقاً عندك وجيهاً يا رب العالمين ،، سأقرأ لأحسن التبليغ عن الله وعن
رسوله ،، سأقرأ لأتميز في مجال ما فأعز إسلامي من هذا المجال ،، سأقرأ لأن
سنين حياتي قليلة ولا تكفي لأن أفهم كل دروس الحياة فسأقرأ لأضيف لعقلي
خبرات وعظات من أناس شرفاء قبلي ،، سأقرأ لأشعر بقيمة نفسي وأشعر أني
سعيد ،، سأقرأ تلبية لأمر ربي ( اقرأ ): لبيك يارب
سأسير فى الأرض
ياترى هنربي ولادنا على إيه لو لم نسر في الأرض ونحمل الكثير من القصص والعبر
والروايات والعلوم والفنون لنُخرج بها أجيالاً جديدة
هل سنربي أولادنا فقط على ما نسمعه من الدعاة ؟؟
ومن أين ارتدى الدعاة هذه العباءة من القصص والعلوم ؟؟ أليس من القراءة
؟؟
إنهم ساروا فى الأرض فبلغوا عن ربهم ومولاهم
مش عندنا وقت
لا أنا عندي وقت بس بأمِل من القراءة
بصراحة أنا عندي وقت ومش بأمل ولا حاجة بس مكسل
لا أنا مش مكسل بس مش عارف أبتدي منين بالظبط
مش دى حججنا اللى بنتحجج بيها يا شباب الجنة
طبعا لكل حجة من دول حل ،، بس قبل ما أساعدكم في الحل ،، محتاج أكلمكم أكتر
عن قيمة أن نسير في الأرض
إحنا اليوم بنحتفل بإيه ؟؟
بنحتفل –مثلاً- بذكرى انتصار بدر
طب وهو إحنا عرفناها منين بدر دي ؟؟
سمعنا عنها فين؟؟
فى القرآن
القرآن يحمل لنا قصص تشوقنا لأن نفتح التاريخ وكتبه والعلوم وصنوفها ليتسع فهمنا
عن الله عز وجل ،،
ياترى كم مرة أحد الدعاة تكلم عن غزوة بدر
لكن في مرة من المرات لقيته يحكي لك تفاصيل جديدة في الغزوة ويسردها أمامك
كأنك شايفها بعينك
جاب منين المعلومات دي؟؟
أصله طبق كلام ربنا وقاله : لبيك يارب
وساااار فى الأرض يُقلب في كتب التاريخ بنهم وشغف ،، فوسع من قراءاته ومصادره
فجاب أخبار جديده فانتفع الناس بها
فاتعظ وبلغ عن ربه سبحانه وتعالى
منين كنا هنسمع عن واحد اسمه عمير بن الحمام وعن شوقه للجنة ؟؟ منين كنا
هنعرف إن رسول الله ظل يدعو الله بشده يوم بدر ؟؟ منين كنا هنشوف فرحة
الصحابة بخيالنا وإحنا بنسمع عن غزوة بدر ؟ منين كانت هتوصلنا أحاديث الجهاد ؟
أليست بالقراءة؟؟
شفتم لو كل الناس كانت بتفكر بنفس تفكيرنا في نظرتهم للقراءة ماكنش هيوصلنا
أي خير يُذكر
كان هيوصلنا القرآن كمتن لا نعرف شرحه ولا نفهم مدلولاته
لكن لما طلع ناس سارت فى الأرض وقرأت كتب وجمعت الصحيح منها ، صرنا نسمع
غزوة بدر وكأننا نراها بعيوننا
وصرنا نتعظ لما بلال بن رباح العبد الحبشي اللي كان مظلوم بالأمس اليوم هو
المنتصر ويقتل أبي بن خلف الذى عذبه ،، وصرنا نتعظ بأن رسول الله المضطهد فى
بلده هو العزيز اليوم وأبو جهل يُقتل على يد طفلين صغيرين معاذ ومعوذ
وصرنا نقرأ سورة الأنفال التى تحكي لنا وقائع غزوة بدر بشعور مختلف وإحساس
مختلف
لأننا قرأنا وسرنا فى الأرض فاعتبرنا
عارفين الآية التالية للآية دي إيه؟؟
يقول الله :
قُلْ سِيرُواْ فِي الأَرْضِ ثُمَّ انظُرُواْ كَيْفَ كَانَ عَاقِبَةُ الْمُكَذِّبِينَ 11 قُل لِّمَن مَّا فِي
السَّمَاوَاتِ وَالأَرْضِ قُل لِلّهِ
إيه علاقة الآيتين ببعض؟؟
كأن المعنى: قراءتك طالما بنية : لبيك يارب ،، هتكبر جواك مباشرة إن الكون ده كله
مِلك مين ؟؟ ملك الله سبحانه وتعالى ،، فهتحس أد إيه ربك عظيم فى كل شيء ،،
هيا يا سيدي أخبرني لمن ملك السماوات والأرض؟؟ طبعاً ويقيناً لله
يا ترى بعد ما سمعنا غزوة بدر حسينا بإيه؟؟
مين اللي نزل الملائكة؟ مين اللي نصر المؤمنين ؟ مين اللي زلزل الأرض تحت أقدام
الكافرين ؟؟ ربنا سبحانه وتعالى
حسيتم بإيه لحظتها ؟؟
إن الدنيا دي كلها ملكه وحده ،، والا لأ ؟
إن مفيش مستحيل على الله عز وجل أبداً ،، والا لأ؟
شفتم القراءة بنية : لبيك يارب ،، ممكن تحرك قلوب الناس إزاي ؟؟
وهى أمة الإسلام اشتهرت بين الأمم بإيه؟؟ مش بعلمها ؟؟
طب و العلماء جابوا منين العلم ده ؟؟
قرأوا كتيييير أوي بنية : لدينك يارب ،، لأزداد تفكراً في الكون يا رب
يا ترى بتحبوا غزوة بدر أوي ؟؟
طب حاسين بالكارثة لو لم تُنقل لنا غزوة بدر
كان جزء أصيل من تاريخنا هنجهله والأحق بنا أننا نفتخر بيه
طب هيا نعمل تجربة صغيرة،،؟
عاوزكم تسمعوا سلسلة روائع من حضارتنا للدكتور-طارق سويدان ،، علشان
تسمعوا قصص أخرى لا تقل روعة عن غزوة بدر،، ولكننا لا نسمع عنها ولا نعرفها
لأننا لا نقرأ ،، رغم أنها من تاريخ أمتنا نحن ،، وأجدادنا نحن ،، ولكننا لا نقرأ فكيف
نعرفها ،، لا نقرأ فكيف نتعظ بثبات المؤمنين فيها وانهزام الكافرين فيها
د-طارق سويدان جاب القصص دى منين ؟؟
قرأ وسار في تاريخ الأرض قدر استطاعته
بدأ في يوم من الأيام بقراءة كتاب في المجال اللي بيحبه ،، ومرة في التانية صار
الكتاب صاحبه ،، فحب يقضي وقت طويل معه ،، فصار قارئاً ،، وبعد فترة صار قارئاً له
مذاقه الخاص ينتقي القصص اللي الأمة دلوقتي محتاجة لها ،، فتميز بين الدعاة إنه
من أفضل من قص وروى التاريخ ،، تاريخ الأندلس المفقود وفلسطين الأسيرة وروائع
حضارتنا وأئمة من أمتنا
إنسان صار له بصمة في الأرض بإيه ؟؟
بالقراءة - بعد فضل الله طبعا-ً
يا ترى أول يوم قرأ كان ده أمله
ليه لأ ؟؟ المهم أنه حقق قيمة في الحياة
كلنا بنقرأ عادي ،، ووالله الأمر بسيط جدا جدا وممتع،، لكن كل ما بتقرأ أكثر بتتعلم
أكثر في أي مجال طالما نيتك : بأقرأ لله ولعزة دين الله ولتبليغ الناس كلام الله بأي
علم من العلوم وليس فقط العلم الشرعي فدلائل آثار رحمت الله فى كل الدنيا وليس
في الشرع فقط
ياترى هنحب القراءة يا شباب؟؟
كلنا ضعفاء فعلاً ،، محتاجين نتقوى بالله عز وجل ،، والإنسان من طبعه بيحب
القصص والتاريخ ويحب أن يكون متميزاً وقوياً ومتمكناً ،، بالله عليكم كونوا أنتم هذا
الإنسان القوي المتميز
علشان نتفاءل إن الجيل الجاي هيطلع قوي بإذن الله
مش هنتعلم الجرأة كده من يوم وليلة ،، ولكن بكثرة قراءتنا للتاريخ ومعرفتنا بمواقف
رجال صبروا فنصرهم الله ،، مش هنتعلم الطاعات لله كده فجأة بل سنستمر على
الطاعات ولن نمل من رحمة الله من كثرة ما عرفنا وتعلمنا من قصص قرأناها
ووعيناها ،، مش هنتعلم الصبر في الشدائد وعلى الدنيا إلا بقصص الأولين ،، مش
هنكون أعزاء إلا لما نعتز بأمتنا وكيف نعتز بأمة لا نعرف عنها شيئاً سوى ما نسمعه
فقط عنها حالنا كحال الغريب عنها
مش هنشتاق للجنة كما ينبغي إلا بقصص ومواقف ثبتت الأمة بشوقهم للجنة ،،
مش هننافس العالم كله فى براءات الاختراع إلا لو زاد مستوى ثقافتنا كلٌ في مجاله
،، بس كلنا نيتنا واحدة : لك يا رب
قُلْ سِيرُواْ فِي الأَرْضِ ،،، ثُمَّ ،،، انظُرُواْ كَيْفَ كَانَ عَاقِبَةُ الْمُكَذِّبِينَ
قُل لِّمَن مَّا فِي السَّمَاوَاتِ وَالأَرْضِ ؟!،،، قُل لِلّهِ
ياترى هنبدأ يا شباب نزود يقيننا في الله وتمسكنا بعزة أمتنا ونربي أولادنا وننمي
مهارتهم بقراءتنا واطلاعنا واتساع ثقافتنا من اليوم بعد فضل الله وكرمه ومشيئته
طبعاً؟ والا لأ؟
ياترى لسه فاكرين الحجج اللي كنا بنتحجج بها؟؟
مش عندنا وقت
لا أنا عندي وقت بس بأمل من القراءة
بصراحة أنا عندي وقت ومش بأمل ولا حاجة بس مكسل
لا أنا مش مكسل بس مش عارف أبتدي منين بالظبط
ياللي مش عندك وقت هتلاقي والله عندك فوارغ في الوقت كتير ،، وأنت رايح شغلك
وأنت منتظر برنامج على التليفزيون قبل ما تنام بنصف ساعة في وقت بس انوها ::
لله ،،علشان تبلغ عن الله وعن رسوله وعن أمتنا
وياللي بتمل من القراءة ،، نصيحتي لك ابدأ في مجال تكون بتحبه ،، لو بتحب
الروايات ابتدي بقراءة الروايات وانتق الروايات المحترمة ولو مش عارف قل وكلنا
نساعدك وبمجرد ما تخلص رواية واثنين هتلاقي حاجز القراءة عندك انشال خلاص
وبقيت مستعد تقرأ أي كتاب
وياللي مكسل افتكر كلامي فوق لو كانت الأمة كلها كسلت زيك كان منين هيوصلنا
تاريخنا الإسلامي ،، كانت منين توصلنا سيرة رسولنا ،، لو كان الدعاة اللي تعتبرهم
قدوتك كسلوا زيك ماكنوش عمرهم ظهروا للناس لأن إيه الجديد اللي هيحكوه ،،
فهم لا يقرؤون إذن لا يعلمون فليصمتوا ،، فهل تحب أن تظل صامتاً؟؟
وياللي مش عارفة تبتدي منين بالظبط ،، جربي ومش هتملي تبدئي بالصنف اللي
بتحبي تقرئي فيه : الخيال العلمي التاريخ الأدب أي صنف ويا ريت يكون لكِ جدول
تنهي فيه قراءة الكتاب ويكون لكِ صحبة تتبادلون معاً الكتب وتحكون لبعض الكتاب ده
أفادنا في إيه وتسألون القارئين الماهرين من معارفكم يدلوكم على أسماء كتب أروع
مما تتخيلون
شباب الجنة
سيروا في الأرض ،، لتزداد ثقتكم بالله ،، ولتعرفوا الله أكثر ،، ولتزدادوا عزاً بأمتكم
ولتربوا أولادكم على أن يسيروا في الأرض مثلكم ،، ولكن لا تنسوا نيتكم فى
القراءة : لبيك يارب ولدينك يارب
أحبكم فى الله
والسلام عليكم ورحمة الله وبركاته
إبراهيم حمدي
منقول للفائدة