بصوا يا شباب هندسة ازاى تختار القسم اللى تدخله؟

المنتدى العام الساحة الجامعية والتنمية البشرية وتعلم اللغات
1

بصوا يا شباب و بنات اعدادى…

انتوا عندكوا فى هندسة كام قسم (ميكانيكا - سيارات - عمارة - مدنى - اتصالات - انتاج - كهرباء - طبية - كمياء - ميكالكترونيك - نووية - الكترونية - طيران )

دى كل الاقسام اللى موجودة فى مصر… تعالوا نمسكهم واحد واحد :

- ميكانيكا:

1. طبعا اجمل قسم فى الهندسة و بحبوا عمى… اللى يدخل ميكانيكا لازم يعرف انة قسم صعب جدا بس لو حتحبوا حيكون لذيذ جدا…

2. لو عايز تدخل ميكانيكا لازم تعرف ان كتاب الفيزياء بتاع ثانوية عامة اللى درستة حتلاقى كل فصل منة بقى مادة ولا اثنين فى القسم وعلى فكرة مش معنى ان القسم اسمة ميكانيكا انك حتاخد ميكانيكا لغاية لما تموت… لا القسم اغلبة مواد فيزيائية و تصميم…

3. لازم تعرف ان قسم ميكانيكا اقوى و افضل قسم فى مصر على الاطلاق … وانا بقول كدة من واقع الشغل والحياة العملية اللى برة الكلية…

5. نطاق شغل مهندسين ميكانيكا برة كبير و مراتبتهم حلوة

- سيـــارات:

1. القسم دة قريب جدا لميكانيكا و بنصح بية الاولاد بس… بس على البنات حيقكون صعب شوية … الا اذا كنتى ناوية تتجوزى و تقعدى تربى عيالك

3. القسم دة مفيش منة الا فى كليتين بس …يعنى عدد المهندسين السيارات اللى بيتخرجوا كل سنة فى مصر كلها ميعدوش 300 مهندس ودة عدد قليل جدا و ميزة طبعا

4. ممكن بعد ما تخلص ميكانيكا برضة تشتغل فى مجال سيارات.

5. المواد اللى فية كلها تتعلق بالصيانة و محركات الاحتراق الداخلى و الفيزياء - بس مش زى ميكانيكا طبعا - وأنظمة التعليق وعلى فكرة المواد بتاعتهم قريبة قوى قوى من ميكانيكا بس امتحانتهم اسهل بكتيييييييييييييير

- عمارة:

1. قسم عمارة دة بقى قسم البنات او الاولاد اللى بيحبوا يقعدوا وسط البنات…!!! او المواهب طبعا…

2. القسم دة بنسميه تجارة هندسة علشان محدش بيسقط فية ولا حتى بيشيل مادة… دة اللى بيجيب جيد…جيييد… بيعيط…!!! ودة ميزة للى عايز ينجز و يخلص.

3. طبعا القسم دة المذاكرة فية قليلة خالص بس المجهود البدنى فية عالى جدا… يعنى لو كنتى بتاعة بابى و مامى ونونو… متفكريش فى القسم دة خالص

4. يعنى ممكن ايام المشاريع تقعدى شغالة مثلا لغاية 11 ليلافى الكلية و الكلام دة كان بيحصل على يدى وانا مش بكبر الموضوع

5. لو عندك حس فنى و قدرة على الابتكار ادخل القسم دة على طوول… و لو عايز تدخلوا منظرة او علشان تفرح بالمسطرة اللى حتكون اطول منك …بلاش… مش حتسقط حتنجح برضة و حتجيب جيد… بس حتتخرج من الكلية علشان تقف على “عمارة” تحرسها -بواب يعنى-

6. عيب القسم دة انه مجال عمله لا يسمح بوجود انصاف المواهب… يعنى لو عندك موهبة حتطلع تشتغل فى احسن الاماكن و بمرتبات خرافية… بس لو موهبتك عادية حتشتغل بقرشين…

8. مواد القسم اغلبها رسم و مواد من قسم مدنى وهى مواد تتعلق بخصائص المواد و الانشائات و المساحة وحاجات بسيطة و لذيذة

- مـــدنـى:

2. القسم دة بقى جمع المعادلة الصعبة ومسك العصاية من النص…يعنى لا هوة صعب قوي زي ميكانيكا وكهرباء ولا هوة سهل اوى زى عمارة…لا مجال عمله واسع اوى زى ميكانيكا و كهرباء و لا ضيق زى عمارة…و دى ميزة للى بيحب المعقول

3. القسم دة مشكلتوا ان تسليم الشيتات بيكون تقريبا اسبوعى طول السنة

4. و المواد فية كلها بقى خرسانة و طبيعة مواد و سدود و سكك حديد و مساحة و هندسة انشائية…

5. الفرق بين المهندس المعماري و المدنى ان الاول بيرسم و التانى بينفذ … يعنى الاثنين بيسلموا لبعض

6.مجال شغلة مش بطال بس فية سنة بهدلة شوية

7. واللى نفسة يبنى عمارات و سدود و كباري و انفاق يدخل مدنى على طوول

- اتصالات:

2. لو حابب اتصالات و عايز تتدخلها و عندك حد يشغلك برة مصر…تبقى عبيط لو مدخلتهاش… اما لو حتفضل جوا مصر فلازم تعرف ان مجال اتصالات ضيق للغاية و يكاد يكون منحصر فى شركات الاتصالات و المحمول و البترول فقط… وشوف بقى كام الف مهندس اتصالات بيتخرج…

3. مواد اتصالات تشبة مواد كهرباء اوى لان اتصالات جزء من كهلرباء اصلا …

4. اغلب مهندسين الاتصالات فى مصر بيشتغلوا فى الاخر يا اما مهندسين كهرباء او مهندسين كومبيوتر … طيب ما تدخل كهرباء او كومبيوتر من الاول و لخص…

- ميكانيكا(انتاج):

2.طبعا مجال الانتاج دة من اكثر المجالات الرهيبة جدا و اللى مش اى حد شغال فيها و مرتباتها عالية جدا طبعا لو طلعت مهندس فاهم و حتبقى استشارى فى حدود 7 سنين من تخرجك

3.ولازم تعرف ان انتاج اصعب قسم فيكى يا هندسة على الاطلاق… وانك احتمال 85% حتسقط سنة ولا اثنين فى النص

4. الدراسة فية طبعا شبيهه بدراسة ميكانيكا قوى ولكن مع تركيز كبير على مجال الانتاج…يعنى 50% من القسم ميكانيكا و 50% انتاج… والانتاج هوة بالضبط اللى اخذتوه فى اعدادي بس بتوسع

5. مجال العمل يكون فى المصانع و تشغيل الماكينات فى الورش الصناعية الكبيرة و احيانا فى مجال تاكيد الجودة.

- كهرباء:

2.مهندس الكهرباء بيستلم من مهندس اميكانيكا و من المجالات اللى مجال شغلها واسع جدا زي ميكانيكا

3.و مواضيع دراستها تتلخص فى كل ما يخص الكهرباء و قليل من الالكترونيات… يعنى لو مش فاهم كهربية اعدادى او حاسس انها تقيلة على قلبك… اياك تدخل قسم كهرباء يااما للاسف ممكن ماتطلعش منه…!!!

4.حيكون نطاق عملك فى كل حاجة و اي شركة هندسية حتكون فيها مهندس كهرباء

- طبية:

2. اولا لازم تعرف انه فى سنة من السنين التنسيق بتاع هندسة طبية وصل لـ 72%…!!! وانا مش عارف ازاى اصلا تجيب نسبة زي دى…!!!

3.طبية هى عبارة عن خليط من مواد قسم ميكانيكا على كهرباء… وقسم طبعا مش سهل…بس طبعا كلامى دة ميفرقش كتيير مع اللى حيدخلوا… دة حيكون من المتفوقين…يعنى ياكل الزلط

4. طبعا مفيش غير حلوان و القاهرة اللى فيهم طبية يعنى اقل من 100 مهندس طبية كل سنة بيتخرج و دى طبعا ميزة

5.طبعا مفيش كلام على القسم… بس واللى تجيلوا و مايدخلش يبقى عبيط… بس ورينى يا حدق انت و هية حتجيبوا مجموعها ازاى

- كمياء:

1. اولا القسم دة موجود فى القاهرة و فى هندسة العاشر…

2. قسم انا شايف انة مالوش مستقبل لانك لا حصلت مهندس بترول و ولا جبت علوم قسم كمياء… يعنى ممكن تدرس كمياء فى مدرسة خاصة لما تتخرج.

3.مواد دراسته تتلخص فى كتاب الكمياء اللى تخذته فى اعداداى حتلاقية بقدرة قادر بقى مواد و كورسات و كتب و اتمط و اتوسع و بدل ما حتخده فى ترم حتدره فى اربع سنين …

- ميكالكترونيك:

1.اعتقد ان مفيش كلية حكومية فيها القسم دة… و افتكر انة موجود فى هندسة العاشر…

2. قسم جميل يجمع بين ميكانيكا و الكترونيات فى دراسته

3. مجال عملة محدود فى مصر يعنى من الاخر فى الغالب حتطلع تشتغل فى ميكانيكا او الكترونيات مش الاتنين مع بعض زي ما هوة مفروض

4. اما لوكنت حابب الموضوع وابدعت فية مش عايز اقولك انك حتبقى اية…

5. حط فى دماغك هل اهلك يقدروا يدفعولك 11 ولا12 الف جنية سنويا علشان سيادتك تدخل القسم دة فى كلية خاصة…؟؟ ولا ويا سلام بقى لو سقطت سنة…

- نووية:

1. القسم دة موجود فى هندسة الاسكندرية فقط…

2.طبعا قسم حكاية و رواية وشوف بقى المجال النووى والذرى فى العالم وصل لغاية فين فى جميع المجالات

3.لما تتخرج من القسم دة حتلاقى مستقبل مشرق فى المكان الوحيد اللى بيشغل بتوع الذرات فى مصر - مع الاعتذار لجورج سيدهم - الا و هو المركز القومى للطاقة النووية و طبعا مرتب رهيب حوالى173 جنيها و لما تتجوز حيراعوا دة وحيزودوك حوال 6 جنية .

4. اما لوحتسافر برة بالتحديد امريكا انسى بقى مصر لانهم مش حيخلوك تشفها تانى بس روح بقى هناك و تبقى عالم كبير و مش بعيد تعمل قنبلة نووية… بس لما تقف على ديلك مش حترجع مصر تانى

5. مجال دراستها ينحصر فى الفيزياء الكلاسيكية -اللى زى اللى درستها فى اولى ثانوي- و الفيزياء الحديثة

- الكترونية:

1. … هنقول ايه بس . اخرهم القهاوى . .

2. كل اللى اعرفهم اتخرجوا منها قاعدين على القهاوى… مش لان المجال وحش بس لانهم بيعملوهم و بيدرسوهم كانهم فنيين مش مهندسين

3.يعنى لو بتحب قعدة القهوة ياخي روح اقعد عليها من دلوقتى و متوجعش دماغك.

- طيران:

1. موجودة فى القاهرة فقط.

2. قسم من الاقسام الداخلية لميكانيكا وطبعا مجال جامد و برستيج عالى جدا

3. ممكن تدخل ميكانيكا و تخلص و تعمل دبلومة فى الطيران و تبقى مهندس طيران قد الدنيا

4. نفس دراسة ميكانيكا بس مع التركيز على الايرو ديناميك بشدة…

يا رب تكونوا استفادتوا من الموضوع و يكون مساعد ليك او ليكى فى اختيار القسم

2

والله تفسير معقول لكل الاقسام
مجهود تشكر عليه

3

اخي المهندس
اشكرك جزيل الشكر على هدا الاجتهاد الشخصي في توضيح فكره مجمله عن فروع الهندسات وما تتطلبه
ولكن يبقى لكل قسم اهتمامه وتقديره واكيد اهميته
اشكرك مره اخرى على الاسلوب الى طرحت فيه الفكره والتلخيص الرائع الى من الاخر
اهلا فيك مره اخرى
يسعدنا تواجد تلك الخبرات في مثل ذلك لاخوانك واخواتك ممن هم على بدايه الطريق

4

مرسي كتير عالموضوع فعلا انت اعطيت كرة ممتازة عن قسم العمارة وبتهيالي انها شاملة وبتعطي انطباع كامل

5

أعجبتني طريقة عرض الموضوع ,ظريفة فعلاً , وتعطي فكرة عامة عن مجالات الهندسة في مصر بأسلوب شيق

4. و المواد فية كلها بقى خرسانة و طبيعة مواد و سدود و سكك حديد و مساحة و هندسة انشائية…
5. الفرق بين المهندس المعماري و المدنى ان الاول بيرسم و التانى بينفذ … يعنى الاثنين بيسلموا لبعض
6.مجال شغلة مش بطال بس فية سنة بهدلة شوية

وأختلف معك في أنَّ الهندسة المدنية فيها من سعة الخيال الشيء الكثير المثير
وليس بالضروري أن ينفذ المهندس المدني ما رسمه المهندس المعماري إلاَّ إذا حقق الشروط الانشائية لكل بناء وحسب منطقته الجغرافية وكثيراً جداً ما تم تعديل المخططات المعمارية في الأبنية الحكومية دون الرجوع إلى المصمم المعماري

أما إذا كان البناء خاصاً أي ملكاً لشخص أو جهة أخرى فيتم تبادل الآراء وإمكانية تنفيذ الرسومات والتعديل من قبل الطرفين

مع الشكر من مهندس مدني

6

الف شكر علي التوضيح وجزاك الله خيرا

7

السلام عليكم

دي أول مرة أشارك على الجروب إن شاء الله مش حتكون ااااااااااخر مرة
و شكرا لمشاركه على الرغم من ان بعض اراءك متحيزه

وانا من وجه نظري ان الازمه أزمة الاختيار من متعدد خصوصا لو الاختيار ده حيفرق معاك باقيت عمرك
المشكلة دي حصلتلى لما كنت باكتب اختيار الثانوية العامة(علمي علوم ام رياضه أم أدبي) واختيار الكليات وكمان اختيار الأقسام بعد إعدادي
وساعتها سمعت نصايح كتير
منها ادخلي القسم اللي ما بدخلهوش ناس كتير عشان بعد فترة كل المهندسين اللي شغالين في المجال دة حيموتو او مش حيكونو قادرين يشتغلو وساعتها مش حيكون فيه غيركو في السوق وشوفي بقا مرتبك حيوصل كام
في ناس قالتلي شوف القسم اللي ممكن بعد كده تشتغلي فيه من البيت
وأحلى نصيحة سمعتها إني اعمل دراسة جدوى !!
طبعا دراسة جدوى دا الواحد بياخد قرار لبقيت عمره
طيب ازاى اعمل دراسة جدوى لهذا الموضوع يعني احسب حتكللف كام ولا ايه
اشوف كل قسم اية مميزاته وايه عيوبه وبيدرسو فية ايه باضبط ولم بيتخرجو ايه مجال الشغل فيه وايه مميزات وعيوب هذا المجال مثلا هل معظم الشغل في مصانع ام في مكاتب ام في مواقع وهكذا وايه احتماله اني الاقي شغل في المكان إلى انا عايزاه وايه اللى المفروض اعملها اثناء الدراسة من تدريب و كورسات وخلافه
واني ما اخدش الراي من شخص واحد في نفس المجال لان النسان ممكن يكون متحز لانه بيحب القسم اللى دخله قوي وبيكره بقيت الاقسام وشايف انها ملهاش لازمه
او انه داخل القسم غصب عنه وكان نفسه يدخل قسم تاني وعشان كدة متأزم ومش عارف يشوف مميزات القسم اللى هو فيه وبيركز بس على العيوب وهكذا
ويجي بعد كدة انا باحب ايه وبعرف اعمل اية او بمعنى اصح قدراتى اية
يعنى مثلا انا باحب المكانيكا جدا لكن ما باعرفش اذاكرها او دايما درجاتي فيها منخفضة على الرغم من اني بحبها جدا لكن قدراتي لا تؤهلني إني أذاكر المادة دي
السؤال هو هل انا باحب الميكانيكا لدرجة اني عندي استعداد ابذل فيها مجهود مش طبيعي عشان اعوض هذا النقص في القدرات ام لا
والعكس صحيح مادة او مجال معين امكانياتك فيه كويسة جدا لكن لا أحب هذا المجال السؤال هو هل نجاحي في هذا الجال حيخليني مع الوقت أحبه وان الإحساس بالنجاح حيعوض ام لا
هل أنا قادر على تطبيق الحكمة إذا لم تعمل ما تحب فأحب ما تعمل ام لا
و بعدين حط الكلام ده في جدول كل حاجة بمميزاتها وعيوبها والحاجة اللي ممكن تكون ميزه بالنسبة ليك ممكن تكون عيب لغير
يعني حط رأيك في الحاجة دي من وجهة نظرك الشخصية
وبناء على الكلام الموضح في الجدول خد قرارك و استخير الله سبحانه وتعالى
انا عارفة ان الموضوع محتاج مجهود لكن مجهود دلوقتي حيفرق معاك باقي العمر

8

اولا شكرا على الموضوع
ولكن كل مهندس وله مطلق الحرية فى دخول القسم الذى يريده
لكن بالنسبة لشرحك فهو شرح جميل وكويس جدا
بصراحة لان البعض ما بيعرفش يدخل قسم ايه
والمهم عند الجميع
اى قسم لما يتخرج يشتغل منه على طول

9

اخى بارك الله فيك على هذا الشرح المفيد جدا والمختصر
وعجبنى قوى فى كلامك الصراحه
وربنا يسهل للمسلمين كلهم يا رب

10

[RIGHT]- عمارة:

1. قسم عمارة دة بقى قسم البنات او الاولاد اللى بيحبوا يقعدوا وسط البنات…!!! او المواهب طبعا…

2. القسم دة بنسميه تجارة هندسة علشان محدش بيسقط فية ولا حتى بيشيل مادة… دة اللى بيجيب جيد…جيييد… بيعيط…!!! ودة ميزة للى عايز ينجز و يخلص.

3. طبعا القسم دة المذاكرة فية قليلة خالص بس المجهود البدنى فية عالى جدا… يعنى لو كنتى بتاعة بابى و مامى ونونو… متفكريش فى القسم دة خالص

4. يعنى ممكن ايام المشاريع تقعدى شغالة مثلا لغاية 11 ليلافى الكلية و الكلام دة كان بيحصل على يدى وانا مش بكبر الموضوع

5. لو عندك حس فنى و قدرة على الابتكار ادخل القسم دة على طوول… و لو عايز تدخلوا منظرة او علشان تفرح بالمسطرة اللى حتكون اطول منك …بلاش… مش حتسقط حتنجح برضة و حتجيب جيد… بس حتتخرج من الكلية علشان تقف على “عمارة” تحرسها -بواب يعنى-

6. عيب القسم دة انه مجال عمله لا يسمح بوجود انصاف المواهب… يعنى لو عندك موهبة حتطلع تشتغل فى احسن الاماكن و بمرتبات خرافية… بس لو موهبتك عادية حتشتغل بقرشين…

8. مواد القسم اغلبها رسم و مواد من قسم مدنى وهى مواد تتعلق بخصائص المواد و الانشائات و المساحة وحاجات بسيطة و لذيذة

ان شاء الله انا بدي ادخل هادا القسم

تحياتي [/right]

11

جزاك الله خيرا واكن لم يعجبنى كلامك عن قسم اتصالات

12
13

هذه مجرد وجهة نظر
وبامكانك انت التوضيح الافضل للاعضاء الجدد

14

[quote=المهندسة دعاء;84121;]

- عمارة:

1. قسم عمارة دة بقى قسم البنات او الاولاد اللى بيحبوا يقعدوا وسط البنات…!!! او المواهب طبعا…

2. القسم دة بنسميه تجارة هندسة علشان محدش بيسقط فية ولا حتى بيشيل مادة… دة اللى بيجيب جيد…جيييد… بيعيط…!!! ودة ميزة للى عايز ينجز و يخلص.

3. طبعا القسم دة المذاكرة فية قليلة خالص بس المجهود البدنى فية عالى جدا… يعنى لو كنتى بتاعة بابى و مامى ونونو… متفكريش فى القسم دة خالص

4. يعنى ممكن ايام المشاريع تقعدى شغالة مثلا لغاية 11 ليلافى الكلية و الكلام دة كان بيحصل على يدى وانا مش بكبر الموضوع

5. لو عندك حس فنى و قدرة على الابتكار ادخل القسم دة على طوول… و لو عايز تدخلوا منظرة او علشان تفرح بالمسطرة اللى حتكون اطول منك …بلاش… مش حتسقط حتنجح برضة و حتجيب جيد… بس حتتخرج من الكلية علشان تقف على “عمارة” تحرسها -بواب يعنى-

6. عيب القسم دة انه مجال عمله لا يسمح بوجود انصاف المواهب… يعنى لو عندك موهبة حتطلع تشتغل فى احسن الاماكن و بمرتبات خرافية… بس لو موهبتك عادية حتشتغل بقرشين…

8. مواد القسم اغلبها رسم و مواد من قسم مدنى وهى مواد تتعلق بخصائص المواد و الانشائات و المساحة وحاجات بسيطة و لذيذة

ان شاء الله انا بدي ادخل هادا القسم

تحياتي

[/quote]

ان شاء الله ربنا يكرمك وتدخليه

15

[quote=م/عمرو السيد;83811;]اخى بارك الله فيك على هذا الشرح المفيد جدا والمختصر
وعجبنى قوى فى كلامك الصراحه
وربنا يسهل للمسلمين كلهم يا رب[/quote]

اشكرك اخى عمرو
وربنا يكرمك على هذا الدعاء
16

[quote=khaledadel;81377;]اولا شكرا على الموضوع
ولكن كل مهندس وله مطلق الحرية فى دخول القسم الذى يريده
لكن بالنسبة لشرحك فهو شرح جميل وكويس جدا
بصراحة لان البعض ما بيعرفش يدخل قسم ايه
والمهم عند الجميع
اى قسم لما يتخرج يشتغل منه على طول [/quote]

اشكرك مهندس خالد على الرد
ومعذرة لو كان الشرح هنا بسيط ولكن هذا ما كان باستطاعتى
17

[quote=THE Fluent Dowry;77606;]السلام عليكم

دي أول مرة أشارك على الجروب إن شاء الله مش حتكون ااااااااااخر مرة
و شكرا لمشاركه على الرغم من ان بعض اراءك متحيزه

وانا من وجه نظري ان الازمهأزمة الاختيار من متعدد خصوصا لو الاختيار ده حيفرق معاك باقيت عمرك
المشكلة دي حصلتلى لما كنت باكتب اختيار الثانوية العامة(علمي علوم ام رياضه أم أدبي) واختيار الكليات وكمان اختيار الأقسام بعد إعدادي
وساعتها سمعت نصايح كتير
منها ادخلي القسم اللي ما بدخلهوش ناس كتير عشان بعد فترة كل المهندسين اللي شغالين في المجال دة حيموتو او مش حيكونو قادرين يشتغلو وساعتها مش حيكون فيه غيركو في السوق وشوفي بقا مرتبك حيوصل كام
في ناس قالتلي شوف القسم اللي ممكن بعد كده تشتغلي فيه من البيت
وأحلى نصيحة سمعتها إني اعمل دراسة جدوى !!
طبعا دراسة جدوى دا الواحد بياخد قرار لبقيت عمره
طيب ازاى اعمل دراسة جدوى لهذا الموضوع يعني احسب حتكللف كام ولا ايه
اشوف كل قسم اية مميزاته وايه عيوبه وبيدرسو فية ايه باضبط ولم بيتخرجو ايه مجال الشغل فيه وايه مميزات وعيوب هذا المجال مثلا هل معظم الشغل في مصانع ام في مكاتب ام في مواقع وهكذا وايه احتماله اني الاقي شغل في المكان إلى انا عايزاه وايه اللى المفروض اعملها اثناء الدراسة من تدريب و كورسات وخلافه
واني ما اخدش الراي من شخص واحد في نفس المجال لان النسان ممكن يكون متحز لانه بيحب القسم اللى دخله قوي وبيكره بقيت الاقسام وشايف انها ملهاش لازمه
او انه داخل القسم غصب عنه وكان نفسه يدخل قسم تاني وعشان كدة متأزم ومش عارف يشوف مميزات القسم اللى هو فيه وبيركز بس على العيوب وهكذا
ويجي بعد كدة انا باحب ايه وبعرف اعمل اية او بمعنى اصح قدراتى اية
يعنى مثلا انا باحب المكانيكا جدا لكن ما باعرفش اذاكرها او دايما درجاتي فيها منخفضة على الرغم من اني بحبها جدا لكن قدراتي لا تؤهلني إني أذاكر المادة دي
السؤال هو هل انا باحب الميكانيكا لدرجة اني عندي استعداد ابذل فيها مجهود مش طبيعي عشان اعوض هذا النقص في القدرات ام لا
والعكس صحيح مادة او مجال معين امكانياتك فيه كويسة جدا لكن لا أحب هذا المجال السؤال هو هل نجاحي في هذا الجال حيخليني مع الوقت أحبه وان الإحساس بالنجاح حيعوض ام لا
هل أنا قادر على تطبيق الحكمة إذا لم تعمل ما تحب فأحب ما تعمل ام لا
و بعدين حط الكلام ده في جدول كل حاجة بمميزاتها وعيوبها والحاجة اللي ممكن تكون ميزه بالنسبة ليك ممكن تكون عيب لغير
يعني حط رأيك في الحاجة دي من وجهة نظرك الشخصية
وبناء على الكلام الموضح في الجدول خد قرارك و استخير الله سبحانه وتعالى
انا عارفة ان الموضوع محتاج مجهود لكن مجهود دلوقتي حيفرق معاك باقي العمر
[/quote]

على العموم شكرا على الاضافات دى

18

لو سمحتى يابشمهندسه انتى متكلمتيش عن قسم التحكم ياريت تقولى عنه حاجه لانه انا شايف انه من الاقسام الكويسه وجزاكى الله كل خير على هذا المجهود

19

اكيد حضرتك تقصد المهندس محمود صاحب الموضوع
ان شاء الله يرد علي حضرتك بمعلومات اكتر

20

اولا معذرة انى مكنتش اعرف مين المسوال على الموضوع ولكن انا بشكرة كتير واحب ان يفدنى فى رايه فى قسم التحكم لانى عاوز ادخله السنه دى ان شاء الله وحتاج رايه بسرع وجزاكم الله خير