مقدمة مختصرة فى العمارة البحرية-1


(Bassoom) #1

بسم الله الرحمن الرحيم

دى بإذن الله يا جماعة أول حصة من حصص دورة تعليم أوتوهيدرو…

الحصة دى حتكون معلومات عامة عن السفينة و عن طرق تمثيل شكل السفينة…

المعلومات دى حتسهل علينا و تفيدنا كتير و إحنا شغالين فى أوتوهيدرو.

الشرح إن شاء الله حيكون مختصر و بسيط…يعنى يا دوب حنقول المعلومة من غير ما ندخل فى تفاصيل كتير.

لكن ده ما يمنعش طبعا إن المجال مفتوح لأسئلتكم و إستفساراتكم…

إسألوا و إسألوا تانى ما تتكسفوش…كل سؤال بتسألوه بيفيدكم و بيفيد كل اللى بيشوف الموضوع

هذا الموضوع غير منقول…و لكن حقوق الطبع متاحة للجميع.


نبدأ من الأول خالص

لو شوفنا المركب دى مثلا :

دى لوحة من اللوح بتوعها…

اللوحة دى إسمها General Arrangement Plan

دى بتوضح كل الأماكن و الفراغات الموجودة فى السفينة و طريقة توزيعها و أماكنها.

بالنسبة لأى مركب… حنلاقى إن المقدمة بنسميها FORE أو FORWARD…و المؤخرة AFT

لو وقفت على المركب و نظرت للمقدمة…حيكون الجانب اليمين إسمه STARBOARD SIDE…و الشمال إسمه PORT SIDE

لوحة خطوط السفينة SHIP LINES PLAN :

اللوحة دى بتحدد شكل جسم المركب من الخارج بيكون عامل إزاى…

و ده التمثيل الوحيد لجسم السفينة…لأنه معقد و ما ينفعش يتمثل بمعادلات

شكل جسم المركب SHIP HULL بيأثر على الآتى :

1- بيحدد مقاومة المياه لجسم السفينة اثناء تحركها.
2- بيأثر إلى حد ما على إتزان السفينة.

بيكون شكله كالآتى:

اللو حة دى بتتكون من 3 مساقط:

1- BODY PLN:

المسقط ده بينتج من تقاطع العديد من المستويات على إمتداد طول السفينة و بنسمى المستويات دى STATIONS.

و المستويات دى طبعا بتكون على مسافات متساوية من بعضها البعض.

زى الصورة دى كدة…

و بما إن جسم المركب متطابق حول خط المنتصف CETER LINE

…فدايما بنرسم نصف الخطوط بس…على اليمين خطوط المقدمة…و على اليسار خطوط المؤخرة.

2- HALF BREADTH PLAN :

المسقط ده بينتج من تقاطع العديد من المستويات على إمتداد إرتفاع السفينة و بنسمى المستويات دى WATERLINES.

و برضه المستويات دى طبعا بتكون على مسافات متساوية من بعضها البعض.

زى الصورة دى كدة…

و بنرسم نص المسقط بس…لأنه متماثل حوالين خط المنتصف .

نيجى لآخر واحد بقى…

3- SHEER PLAN :

زى إخواته…

المسقط ده بينتج من تقاطع العديد من المستويات على إمتداد عرض السفينة و بنسمى المستويات دى BUTTOCKS.

لكن دول بقى مش بيبقوا كتير…لأن التغير فى شكل المركب فى إتجاه العرض مش كبير قوى.

زى الصورة دى كدة…

و ده شكل ملخص بيوضح كل المساقط…

جدول المسافات Table of Offsets :

لتسهيل التعامل مع خطوط بدن السفينة فكل المساقط اللى إتكلمنا عليها دى ممكن تتحط فى صورة جدول…

الجدول ده بيتحط فيه المسافات اللى موجودة على الرسم.

كمثال:

لو مسكنا WATERLINE معين…

حنيجى على النقط اللى فيها تقاطع ال WATERLINE مع ال STATIONS و نقيس بعدهم عن ال CENTER LINE…و نحطهم فى جدول.

و هكذا لغاية ما نخلص كل الWATERLINES.

زى كدة…

بكدة نبقى خلصنا الحصة الأولى…

المراجع:

[RIGHT]http://www.usna.edu/naoe/courses/en200/ch02.pdf

http://www.hugohein.com/other/sikker.havn/sikker.havn.specs.htm[/right]


انا عارف إن فيه ناس المعلومات اللى قلناها دى بالنسبة ليها بدائية…

بس مش عايز أجرى بسرعة…علشان محدش يتوووه

معادنا الأسبوع الجاى مع حسابات الإتزان

آه…بقولكوا إيه؟؟

ما تنسوش تدعووووولى


(MARINE_ENGINEER) #2

what’s next


(Bassoom) #3

معادنا الأسبوع الجاى مع حسابات الإتزان يا مارين


(myall462005) #4

thnks my dear

and i hope to give us more informations in this faild
thnks again
and iam also at sharjah
0505190163


(madjid) #5

الله الله عليك يا بسوم
إنشاء الله يعطيك ما بتتمنا


(Bassoom) #6

الله يخليك يا مادجد

فيه أى حد عنده سؤااااااااااال ؟


(MONAYA) #7

مجهود هايل
ربنا يزيدك

وجزاك الله كل خير


(awaw) #8

جزاك الله خيرا يا بسوم
بصراحة رغم انه ليس تخصصى الهندسة البحرية ولكن شدنى الموضوع وقمت بفهمه الحمد لله لان اسلوبه رائع وجميل ونتمنى ان تكتمل الدورة وتحقق هدفها


(Bassoom) #9

شكرا لكم جميعا


(قنديل البحر) #10

بجد جميل جدا وأحلي حاجة إنه من البداية لأني مبتدئة في هذه الدراسة
جوزيت خيرا وربنا يبارك لحضرتك
وإن شاء الله تنال من دعائي دائما في الصلاة وفي رمضان


(ENG.Hasan Hamdan) #11

welcom


(أمير البحر) #12

شكرا بس الحلقة التانية فين


(GeNeRaL MaNaGeR) #13

جهـــــــــــــــــــــــــــد مشكور عليه وربنا يزيدك من العلم والمعرفه


(GeNeRaL MaNaGeR) #14

ممكن تقولى اين يوجد سوق العمل للمهندس البحرى وكذا الرواتب التى يتقاضونها


(Bassoom) #15

سوق العمل موجود فى كل البلاد العربية و الأجنبية…
و الرواتب كويسة كمان


(اسراء) #16

شكرا الك كتير موضوعك كتير مفيد وحلو.


(سوسو الحلوة) #17

حلو كتيييييييييييييييييييييييييييييييييييييييييييييييييييييير ومعلومة كتير مفيدة بس انا بدى مساعدة مشروعى للتخرج ميناء بحرى لو امكن ممكن تشوف لى معلومة عن مراسى السفن وابعاد المرسى لسفن ركاب وبضائع


(system) #18

شكر خاص جدا ولكن الصور مش وضحة


(Bassoom) #19

سيتم تحديث الصور قريبا إن شاء الله


(Bassoom) #20

دى الحلقة إتبهدلت خالص

ربنا يعينى و اظبطها تانى