خلاصة الكلام يا جماعة…إن المركب بتتزحلق
و ليها زحاليق مخصوصة بيزحلقوها بيها (مش أى زحاليق طبعا )
و يوم زحلقة المركب ده بيبقى يوم عيييد…
و الناس كلها تتجمع و تتفرج و صاحب المركب ييجى و الناس الكبارة بقى و هيصة…
أمال…هوا كل يوم بنزحلق مركب
طب إزاى و فين وليه؟
…هوا ده موضوعنا
طب صلوا على النبى (عليه الصلاة و السلام)
المركب بتتبنى فى مكان بيسموه ترسانه (Shipyard)
و جوة الترسانة بتتبنى فى حاجة من الأتنين :
1- حوض :
2- قزق (Slipway) (أو زحاليق زى ما سميناها) :
- ألواح و عيدان المراكب بتتقطع و بتتلحم و بتتظبط و فى الآخر بتتركب علشان تكون بلوكات المركب (بلوكات يعنى المركب بس متقسمة حتت)
- و بعدين بيودوهم على القزق علشان يتجمعوا
* المركب بتكون محطوطة على عجل…و ده اللى بيخليهم يقدروا يحركوها من مكان للتانى
* و ممكن أكتر من مركب يكونوا فى نفس الترسانة فى نفس الوقت
- بالنسبة للزحلقة ففى طريقتين:
1- بالطول :
و فيها المركب بتنزل بضهرها (بمبدأ إدى ضهرك للترعة على رأى العالم الشهير محمود رضا)
زى الفيديو ده كدة
http://www.youtube.com/watch?v=L1ujFSJvq6k
2- بالعرض :
بتكون واقفة على الحرف و بعدين يسبوها تنزل و تعمل تششششششش كبيرة
و زى الفيديو ده كدة
http://www.youtube.com/watch?v=FD6GGehpDYQ
و ده طبعا له حسابات كتير علشان تتأكد من سلامة المركب و هيا نازلة على الزحليقة
شوفوا هنا مثلا…
بيزحلقوا مركب جديدة فى البحرية الأمريكية …و حصلت لخبطة فى الحسابات
و يا دوب يقولوا سيرى يا نورومااااااندى
و تششششششششششششششششششش
المفروض التششششششش اللى بتحصل تحصل من ناحية البحر و بس…مش من الناحية اللى واقفين فيها الناس
لكن فى حالتنا دى حصلت فى الناحيتين
و بالتالى الناس كلها إتغرقت…و كان فيهم جنرالات و ناس جامدة
و بس كدة…دى قصة المركب و الزحاليق
صدق اللى قال…عالم زحاليق صحيح
عايز تعليقات على الفيديو و الكلام و الصور و كل حاجة
ماحدش يدخل يتفرج و يطلع من سكات
مش فاتحينها فاترينة هنا
برضه ما تنسوش تدعووووولى