قصتي مع المنسف

مبارح يا اخونا خير اللهم اجعلوا خير دعانا احد الزملاء هنا في الاردن على العشاء وتوجهنا الى بيته في احدى القرى القريبه من عمان ولما وصلنا استقبلونا الجماعه بترحيب ما بعده ترحيب حتى انهم اخجلوني من كثر الترحيب…المهم دخلنا وقعدنا وشربونا قهوه عربي وانا بحبها قوي وبما اني واقع من الجوع فكنت بستنا الاكل بفارغ الصبر وكنت اترقب دخول الشوربات والسلطات لكن ده محصلش وفجأه دخل علينا راجل طول بعرض نبات تخان حامل طبق قطره متر على الاقل وعليه جبل من الارز واكوام من اللحم وراس خروف فاتح بقه بس ما بيتكلمش…ثم تبعه صبي يحمل حله وحطوا الطبق على طاوله مستديره وبعدها قمنا ناكل…طبعا انا كنت بدور على كرسي بس اتفجئت انه مفيش …وتجمع الرجاله حول الطبق وكنا 10او يزيدون وكأننا فرسان الملك ارثر حول الطاوله المستديره…وبعدها قلت بسم الله وقلت معلقه يا اخونا…واذ بالعيون ترمقني لسان حالها يقول “ممنوع استخدام المعالق”…انا اختصرت ومديت ايدي ورفعت كمي وقلت ناكل فلاحي مش مشكله…بس للصراحه انا كنت محشور قوي بين رجاله تنين حيتان وعشان ملخبطش بصيت ليهم بياكلو ازاي عشان اقلدهم…بس مقدرتش…اصله المنسف ده يا اخونا هو رز مدفون تحته عيش وعلى وشه لحم وبييجي معاه صوص او مرق ابيض بيتعمل من لبن الزبادي او حاجه شبهه اسمها الجميد…وبعد ان صب الرجل المرق على الرز اصبح لزجا…فقام الراجل اللي قدامي عمل مكس من اللحم والعيش والرز وعمله على شكل كره وبعد كده بدأ يرميها في الهوى كأنها قنبله يدويه…انا كنت هاخد الارض اصلي خفت يلزقها بوشي…بس هو رماها في بقه بطريقه احترافيه زي الساحر وحسيت بعدها انه هيخرجها من ورا ودنه ولا حاجه بس معملش كده لأنه فورا رجع انشغل بصناعه قنبله تانيه…انا عجبتني فحبيت اقلده بس لما رميت القنبله المتواضعه والمتفرتكه بتاعتي وقع نصها في الطبق والنص التاني فات بمناخيري…طبعا الجماعه مضيافين فضلوا يقطعوا الحتت الحلوه في اللحمه ويحطوا قدامي لما بقيت عاوز افك زرار البنطلون…وفجأه هجم احدهم على راس الخروف المسكين وشق شدقيه…ومد ايده جوه كأنه مضيع 10 جنيه جوا ولا حاجه…وطلع بلسانه وحطه قدامي هنا كان يجب ان اقول الحملله شبعت…ورغم اصرار الجميع اني ازود انسحبت…وبعد ما غسلنا ورشوا علينا كالونيا اللي كنت بحاجتها فعلا عشان افوق…شربنا قهوه عربي تاني…وبعدها دخل الحاجه السقعه والكنافه النابلسيه حبيبتي…وبالرغم من التخمه اللي انا فيها بس الكنافه ما تتسبش…بس بعد ما روحت يا اخونا دفعت التمن غالي…لم استطع النوم ليلتها…هذه قصتي مع المنسف

ميمووووووووووووووووووووووووووووووو لا تحكيلي انك كنت بالسلط؟؟؟؟؟؟

أنا بطني وجعتني من كثرة الضحك
بجد مش عارف أمسك نفسي، أحسن لك ما تجيشي السعودية علشان المنظر بتاعك ده في كل مكان، حتى داخل مطاعم الشركات الكبرى مثل أرامكو وعبد اللطيف جميل

بس خليني أقول إن هذه عادات القوم وفي هذه الأمور العادات تغلب ولا توجد عادة أفضل من عادة مادام الأمور لا تخالف السنة المحمدية، وإن كان الغالب على الذين يأكلون باليد مباشرة لا يتبعون السنة المحمدية، حيث كان يأكل صلى الله عليه وسلم بثلاث أصابع وليس بثلاث أيادي

المهم إن الكلام ده يكون حصل يوم الخميس علشان الأمرو تحاول ترجع لطبيعتها خلال يوم الجمعة وبعد كده ترجع لشغلك عادي من أول السبت، أنصحك خلال اليوم كله إنك تشرب مياه بس ونعناع

بالمناسبة إحنا ممكن نعفيك من التسميع ثلاثة أيام

هي قريه اسمها غريب ويدحك له علاقه بالحشيش …انا كنت فاكرها غرزه…زي الباطنيه يعني…بس طلعت حاجه تاني خالص…اهلها ناس عسل وهي جميله…“ام جوزه”…وكلنا يعرف ما الجوزه…انا كنت بقول لابو انس انه المنسف لازم يعتبر من المسكرات …والارادنه كمان عندهم حاجه خطيره اسمها الشنينه يدعون انها من مشتقات الحليب بس دي يشرب الواحد منها كاسه من هنا يخش في سبات من هنا

الجووزة في الاردن بتختلف جدا عن الجووزة في مصر يا ميمووووو :slight_smile:
اتذكر مرة اختي سافرت مصر … طلبت هناك “بوووزة” قاموا جابولها البولييييييييييييييييييييييييس!!! :slight_smile:
طلعت البووزة عندكم حاجة تاني خاااالص… بينما في بلاد الشام هي الايس كريم :slight_smile:

ههههههههههه…في مصر بيقولوا ايس كريم…بس القرسون اكيد دهل اصله تسميه بوظه معروفه برضه بمصر لا سيما وان التي تطلب شاميه…وانا مش خبير قوي في الموضوع بس اظن البوزه التانيه نوع من الخمور ولا اظن البوليس في مصر بيسجن عليه…

انت فكرتيني بكبتشينو … ابو رغوه

على كل حال انا ناوي انتقم واعزم زميلي على مصر في شم النسيم وادوقه الفسيخ والرنجه…وشويه مش

لكن لو اختك كانت راحت عندنا في الشرقية أو بالذات في فاقوس وطلبت بوظه كانوا وادوها محل السيد البدوي وكلت أحلى بوظة شرقاوي
يمكن أخونا عميل خاص يعرف الكلام ده كويس

ميمو أوعى تجيب لنفسك مصيبة، بلاش الفسيخ خليك في الرنجة
أنا مصري ومع ذلك لما كنت في المدينة واحد من أقربائي قال لي تعالى أأكلك فسيخ مصري من صنع منزلي لأن زوجته من العريش ودول بتوع الفسيخ كله، لكني بجد حاسيت إن السمك معفن وإن رحته مش طبيعية، ولما اديت منه لحماتي، بالرغم إن هندها الضغط إلا أنها ما قدريتش تمسك نفسها وقالت ده أحلى فسيخ شافته في حياتها
أنا عاوز أقول إن إللي ما يعرفوش ممكن يغمى عليه مجرد ما يشمه، ويفتكرك عاوز تقلبه وهو نايم

بجد بجد بلاش فسيخ، أقولك خليك فيالسردين، وعدي علي في جده أديلك شوية سردين صنع منزلي لن تره في مصر أبداً

شوف أنا جات لي فكرة تانيه، إنت ممكن تعزمه على واحد مسقعة، وبعدها بساعتين تخدوا عند بتاع كشري التحرير وتديله جنيه زيادة ويتوصالك بالشطة أكثر، وقبل ما ينام عديه على التابعي الدمياطي أو على الشبراوي بس ما تنساش الجنيه بتاعك بس المره دي علشان الطرشي، وعلى الساعة 12 بالليل ما تنساش تتصل على الاسعاف:sm138:

فكره متخرش الميه …انا هرد عليك واسيبني من الفسيخ بلا شتحصل ازمه دبلامسيه بين البلدين الشقيقين…واذا طلبني ميه اديله ميه طرشي فيبقى

المستجير بميمو يوم كربته…كالمستجير من الرمضاء بالنار

ايه يا أبوانس سيبوا يجرب الفسيخ والمستشفيات كتيرة فى مصر وعادى يعنى يسد أنفه وعادى أنتا كدة بتأثر على الاقتصاد المصرى وبلاش شبراوى بدون تعليق

والله شوقتونى للأكل المصرى بجد بجد الكشرى واحشنى كتير وعلى فكرة انا نازل مصر بعد اسبوع ومش هرحم نفسى من الكشرى والفول والطعمية وحتى كمان الفسيخ واحشنى جدا بس ربنا يستر عليا واقدر ارجع ألمانيا تانى على خير

الفسيخ لا يا بشمهندس …كله الا الفسيخ…اذا كنت مصر سخن برنجه الاول

لا انا هدوس فى الفسيخ وامرى على الله بقى

النصيحه كانت بجمل

توصل بالسلامه يا م /أحمد وتنور مصر ونبدأ بالفسيخ أحنا المصريين معدتنا متعودا دايماً على القنابل الذرية ( الفسيخ - الطعمية … الخ )