ياجماعة عايز اعرف الطريق علشان اكون مهندس ناجح
انا سألت زمايل اكبر منى وشغالين و بيقولو لى ان الدراسة شئ والشغل حاجة تانية
يعنى ان كل اللى درسته مش حينفعنى إلا جزء ضئيل جدا منه
انا تايه وعايز اعرف اسماء بعض البرامج اللى بيحتجها مهندس الانتاج
الشنديدى
السلام عليكم ورحمة الله وبركاته
أهلاً وسهلاً بأحلى المهندسين، بص يا هندسة سؤالك دوة شغلني لمدة خمس سنوات الكلية وإللي كان بيزدني قلق التدريب الصيفي وكمية المهندسين إللي معلش في الأسلوب ما لهمش لزمة في المصانع حتى إنني أقلعت عن التدريب لمدة عام ولكن بعد أربع سنوات في العمل الهندسي أستطيع أن أجيبك وبمنتهى الموضوعية
أنا مهندس تصميم وإنتاج من وجهة نظر الشهادة والتخصص الجامعي ومهندس تصميم معدات استاتيكية من وجهة نظر الحياة العملية، من الآخر الكلية والمواد بتاعتها بتشكل ما لا يقل عن 70% من مصدر نجاحك في العمل وهذا السؤال استطعت أن أجيب عليه لنفسي عندما قمت بعمل ثلاث تدريبات في ثلاث مجالات مختلفة في عام واحد بس وأنا في أجازة السنة الثالثة ووجدت كل شئ في المصانع بينطق بالمواد الهندسية التي ندرسها في الكلية
من الآخر يا ريس المهندس الهمام إللي قالك كده معلش كان تقديره آيه في الكلية وكمان كانت نسبة حضورة قد آيه والأدهى والأمر معلش هل هو كان من الناس إللي بتفهم المواد إللي بتدرس، بصراحة أشـــــــــــــــــــــــــــــــــــــــــــــــك
المشكلة هي آيه وباختصار، إن احنا في مصر وعلى سبيل المثال في قسم الهندسة الميكانيكية بندرس مواد تخص حوالي ستة أقسام وتخدم خمسة مجالات للعمل يعني حاصل التغيير بين المهندسين بعد العمل حوالي 30 مهندس يختلفون عن بعضهم والمواد واحدة فمعنى ذلك أنك تستفيد بأقل من سدس المواد إللي أنت بتدرسها بس هاقولهالك وبصراحة من غير كده مش هاتحس إنك مهندس وهاتلاقي نفسك بتتكلم كويس فس غير مجالك مع المتخصصين يعني على سبيل المثال أنا مهندس تصميم ومع ذلك والحمد لله ممكن أقترح حلول لمشاكل التصنيع في الورشة الموجودة بالشركة بل ومن الممكن أن تحاور غير الميكانيكيين من مهندسين الكهرباء وغيرهم
طاب و30% الباقيين هما بصراحة ما بنتعلمهمش في الكلية في صورة مواد تدرس ولكن برده بنتعلمهم في الكلية في صورة أسلوب تدريس، إزاي
ما فيش مرة قابلك دكتور ما بيفهمش أو معقد ، طبعاً أكيـــــــــــــــــــــــــــــــد ازاي كنت بتحاول تفهم المواد بتاعتهم بس خلي بالك أنا بأقول تفهم مش ازاي كنت بتحاول تنجح في المواد بتاعتهم، هي دي ياريس الـ30% إللي بنتكلم عليها كيفية تحصيل المعلومات الجديدة أو المفقودة
بالنسبة للبرامج مش المهم آيه البرامج إللي لازم تكون عارفها هي آيه، المهم إنك وبصراحة يكون عندك قدرة سريعة على تعلم أي برنامج وكمتن ركز على التعليم الذاتي
علشان تكون “مهندس ناجح” عملياً لابد أن تكون “مهندس ناجح” أكاديمياً ركز على كــــــــــــــــــــــــــــــل المواد بالذات مواد material وخلي بالك إنها بتخدم كل التخصصات وركز على CNC وأي برنامج يقابلك في الكلية حاول تتعلمه، ركز على الأبحاث واهتم بكتابة التقارير، احرص ألا تفوتك معلومة وتعود على القراءة
وفي الأول وفي الآخر لاتنسى ذكر الله والتوكل عليه ولا تمل ابداً من رفع يديك بالدعاء بين يديه
ثم رضا الوالدين
ولاتبخل أبداً بعلمومة تعطيها لزميلك حتى ولو كان هايجيب تقدير أحسن منك أو لو كان ما بيرضاش يديك معلومة
الصدقات والقرب من الأيتام والمحافظة على صلاة التراويح
جرب وأشوفك بعد الفترة إللي باقيالك في الكلية وابقى قوللي عملت آيه في حياتك العملية
أخوك،
أبو أنس المصري
هندسة القاهرة-2004
الله ينور عليك يا ابو انس
الف شكر على النصيحة اخى ابو انس
جزاك الله كل خير أبا أنس على هذه النصائح الغالية وبوركت أخى