الى هيدخل ويرد هياخد خمسة جنيه


(system) #1

بسم الله الرحمن الرحيم
فى البداية دى اول مشاركة ليا فعايز تشجبع
انا لاحظت حاجة فى المنتدى سلبية مع الرغم ان الموقع ليه انتشار اكثر من رائع وهى
ان كل واحد بيطلب طلب ومساعدة الى بيرد عليه مش اكتر من تلاتة او اربعة
دا فى ياجماعة منتديات بدخل عليها بلاقى فيها الرد فيها اكتر من الخمسين رد مع انها مش احسن من المنتدى بتاعنا
سامحونى انى استخدمت العنوان البايخ علشان تخشوا نظرا لاحتياجى لمساعدتكم
علشان دا مستقبلى يا جماعة
اولا : انا فى الازهر وجبت الينادى 93% والتنسيق لسا بعد اسبوع بس ما اتوقعش انى الهندسة هاتنزل ل93 علشان كدا انا هقدم فىالمعهد العالى فى 6اكتوبروناوع ادخل انشاء الله ميكالكترونكس
اصلى قالولى دا قسم مفيش منه فى مصر تانى وجديد
طاب قلتلهم بيدرس ايه قالولى الروبتات فرحت علشان انا من صغرى بحب افك الالكتروميات واحاول اصلحها مهما كان التمن طاب حاولت اعرف اى معلومات تانى عنو معرفتش فانا عيز منيكم يا مهندسين
القسم دا دراستو صعبة ولا لا وبيعتمد على الرياضة ولا لا علشان انا مش بحب الرياضة خالص
2-لما اتخرج فى ناس هاتطلبنى ولا هاقعد ابيع بيض وهشتغل فين بالظبط وفى فى مصر شغل ولا بره بس
3-ودا الاهم مرتباتها حلوا ولا لا وبتبتدى من كام وهي افضل والبترول والاتصالات من حيث المستقبل والفلوووووووس
انا عايز افتح الموضوع بكره الاقى فوق الثلاثين رد ان شاء الله


#2

اهلا بك اخى العزيز معنا
نورت المنتدى وفعلا لقد سلطت الضوء على نقطة مهمة جدا فى المنتدى وهى السلبية واحب اوضح للكثير من الاعضاء الذين لا يعرفون ما معنى كلمة منتدى ؟
هو عبارة عن مكان على شبكة الانترنت يدخله الاعضاء ويشاركون ويفيدون بعضهم البعض اى ان بقاء هذا المنتدى يعتمد على اعضاءه لانهم الذين يضيفون فيه ودور الادرة والمشرفين هو دور تنظيمى فقط والدور الاساسى والهام للاعضاء
ويجب على الجميع ان يشاركوا بكل ما لديهم وتشجيع التعاون والرغبة فى المساعدة لانه من الممكن ان تحتاج مساعدة من شخص فالافضل ان نسبق حتى لا يتاخر عننا احد

اما بالنسبة لموضوع التخصصات والاقسام والكليات والجامعات
اولا اللى يقدر يحدد القسم المناسب هو الشخص نفسه اللى هيدخل لانه الموضوع ده بيخضع للرغبات والقدرات الشخصية ومن المهم جدا فى الحياة الهندسية غض النظر عن موضوع قسم احسن من قسم لانه هذا الكلام خطأ

اما بالنسبة للرياضيات فهى اساسية فى جميع الاقسام سواء بحته او تطبيقيه لان الهندسة تعتمد على الحسابات العددية

وبالنسبة للشغل متاح للجميع ومفيش اقسام بتتخرج من كليات الهندسة وملهاش شغل لان الاقسام اصلا بتتعمل لاحتياج الصناعة والكلية لازم يكون دورها بيخدم البيئة والمجتمع والا كانت الكلية ملهاش لازمة
الكلية بتخرج ناس علشان تشتغل وتساعد فى تقدم المجتمع ولو كانت الكلية بتخرج ناس مبتشتغلش كانت تقفل احسن
والافضلية فى الشغل بتكون لصاحب المهارات واللغات والمتميزين ولا تعتمد على الاقسام الموضوع بيعتمد على المكان اللى هتشتغل فيه لكن الناس العاديين ليس لهم مكان وحتى ان وجد لهم مكان سيكون دورهم مش هام ومرتباتهم ضعيفة وللعلم ليه دور كبير فى حياتنا العملية بعد التخرج
وللعلم مجال البترول يحتوى على جميع التخصصات الهندسية ومتاح للجميع العمل فيه


(system) #3

ايه يا جماعة خزلتونى والله
ايه مافيش غير راجل بس فى المنتدى والباقى حريم ولا ايه


(system) #4

شكرا يا اخى المهندس احمد الديب خريج ميكاترونيكس وانا خريج ميكاترونيكس واى مساعده احنا موجدين


(system) #5

بص يا باشمهندس انا داخل نفس الهندسة اللي انت داخلها بردو عشان القسم ده بس مش عارف عنه حاجات كتير اما بالنسبة للرياضيات فدي هندسة يعني اساسي حتاخد رياضة وفيزياء وربنا معانا جميعا


(system) #6

السلام عليكم انا طالب فى بكالريوس فى قسم ميكاترونكس فى المعهد العالى للهندسة و بالنسبة للرياضيات فهى اساسية بس حتى لو مبتحبهاش لو انت حابب القسم هتلاقى نفسك شغال كويس و بالنسبة للشغل فمجلاته كتير فى مصر و بره مصر و بالنسبة لدراسة القسم فانت بتدرس مواد فى الميكانيكا و مواد فى الكهربة و الكترونيات و فى التحكم و بتدرس روبت بس الروبت فى اخر سنة ولو عايز اى استفسار انا فى خدمتك و اتمنالك مستقبل ممتاز


(system) #7

شكراً يا أستاذ على زيارتك الكريمة للمنتدى
وبالرغم من ملاحظتك اللطيفة وبالغرم من كونك سابق لى فى المنتدى (يعنى أنا ضيف بالنسبالك)
لكن أحب أقلك كلمات بسيطة خاصة أنى أخوك فى مصر
ببساطة حضرتك مش مهندس ولن تكون مهندس حتى لو حصلت على شهادة فى بلدنا بكدة
لأن المهندس مش بالشهادة ولا بالمنصب و لا بالمرتب
ممكن تقابل سباك يفهم عن 1000 مهندس من بتوع الشهادة (وذلك لعيباً فيهم وليس فيه)
فكون حضرتك كنت بتحب تلعب فى الألكترونيات لا يجعلك مؤهل لتكون مهندس
وأنصحك بكلية التجارة أصل واضح أن حضرتك مفتح و بتبص لقدام
وعلشان تفهم معنى كلامى هقولك حاجة بسيطة عن نفسى
انا
أغاثون

بدأت صرماطى (يعنى بصلح جزم و أورنش)
ثم أنقلب الحال وعملت صبى فى محل مجوهرات (فتعلمت الدقة و الجمال و اللحام)
ثم تصادف وعملت فنى (وأفتخر بذلك اللقب) لصيانة الغسالات الأتوماتيك (وهنا بدأاهتمامى وأعجابى بالمتحكمات والميكانيكا)
فقررت أن أدرس المتحكمات و الميكانيكا دراسة أكادمية (قرر صحيح) فصممت على دخول كلية الهندسة بالأسكندرية (طريق خاطئ)
أجتهدت وعمل بجوار دراسة (يكفى أن أخبرك أنى ذهبت لصيانة غسالة ليلة أمتحان التفاضل ثانوية عامة لأحتياجى للمال)
وحصلت على مجموع 97.6 % يوم ما كانت الهندسة تقبل 92.3%
حصلت و بصدق على تقدير جيد جداً مرتفع 81.3% فى السنة الأعدادية مع أمتياز بمادة الحاسب (بجوار أمتيازات أخرى) وكان الباب مفتوح لى لأى قسم
فقررت دخول ميكانيكا قوى
ومع الأستمرار فى الكلية المصرية أكتشفت حجم الفراغ و الفشل الذى تعيشه فقررت التمرد ولم أندم على المحاولة
ولم أدخل حتى الأن أمتحان البكالريوس (لرفضى الشهادة منهم)
كان ربنا كرمنى وفتحت مركز صيانة للغسالات خاص بى (السبوبة اللى ربنا كرمنى بيها واللى مازلت أفتخربيها)
أتجهت لأخذ دورات فى المجال الطبى biomidical حيث انه الأشهر فى تطبيقات المتحكمات و الميكانيكا
ظهر أجتهادى و اجتهادى (وأقولها 1000 مرة أجتهادى لأنه لا شئ أسمه نبوغ ) وأكرمنى إلهى على هذا الأجتهاد
فوثق فى المعهد الحكومى وأعطانى فرصة لتصميم و تنفيذ أول ماكينة غسيل كلى مصرية
ولكن الدعم توقف
أجتهدت و شعيت حتى حصلت على تمويل بمبلغ لا يتعدى 2 مليون دولار من الكويت لأستكمال مشروعى (صدق أو لا تصدق)
ونجحت فى أنهاء المشروع (وأنا لا زلت فنى)
بدأت فى تدريس ماكينات غسيل الكلى حتى وقفت امام وكيل وزارة الصحة الكويتى (أعلمه ما أعرف ) مع حفظ السن
أنتدبت لأدرس بالكويت ولكنى رفضت حتى لا أترك والدى
منحتنى الحكومة بعثة لألمانيا ولكن لنفس السبب رفضت
عرض على السفر بعقود و مرتبات رائعة لروسيا و كندا وانجلترا و الولايات ولكنى لا أزال فى مصر متعثر فى الحصول حتى على رخصة القيادة (أًصل العربية بتاعة المرور بايظة)
وأدرس وأدرب حالياً فى المعاهد المصرية ً وقد يأتى اليوم وأدرس لك
ولكن أتمنى ان تتعلم شئ مما كتيته وتدعى لى بالصبر و الصمود
أمين
كان معك و بكل الحب
أغاثون


(FreeEngineer) #8

السلام عليكم
انا طالب بهندسه الميكاترونكس بالسنه الرابعه واحب اوضحلك ان قسم الميكاترونكس هو قسم ممتع وهو عباره عن خليط من الهندسه الميكانيكيه والالكترونيه والكمبيوتر وربنا يوفقك ان شاء الله

هيثم ابراهيم