كارثة قسم كنترول في هندسة منوف

ازيكم ياجماعة…انا بتعرض لموضوعي هنا مش لاني حابب اني اعقدكم او لاني حابب اخليكم كارهين قسم تحكم…بالعكس بحب جدا التخصص ده
ياجماعة الكارثة اللي بكلمكم عنها واللي لازم توصل للبهوات الادارة بتاعت الكلية واطقم التدريس…ملخص الموضوع ان مفيش حاجة اسمها مهندس كنترول بس في مصر… المشكلة اللي انا بتعرضلها مش في دي المصيبة ان الكلية بتطلع مهندس كنترول بس ودي كارثة لان ببساطة الشغل الحقيقي في مصر بيكون مهندس كهرباء وكنترول ولاحظو ان كهربا الاول والاساسي بكل اسف واللي عانيت منه في الاول فوجئت ان كل كليات مصر تقريبا بتخرج مهندسين كهرباء سواء كانو باور او كنترول واحنا في الاخر مفيش اي علاقة بالكهرباء اللي هي في الاساس اساسي في الشغل قبل الكنترول نفسه لان ببساطة حتعرف تعمل كنترول ازاي وانت مش عارف كهرباء صح فوجئت اني مطالب اني اتعامل مع الكهرباء زي تلميذ في الثانوي بيبدأ من الصفر كل ده ليه؟؟؟؟ لان ببساطة التدريس في قسم كنترول غلط بمعنى انهم بيدو حاجات ملهاش اي علاقة بالواقع العملي بالشغل سواء في مصر او برة مصر…
انا ياجماعة مش بطالبكم انكم تغيرو الحكم…اقصد تغيرو من طريقة التدريس انا بس عاوزكم دايما في اي مقابلات مع البهوات اللي مش عايشين في الدنيا تفهموهم الوضع
وتاني حاجة ودي الاهم عندي عاوز منكم كلكم تقروا في اساسيات الكهرباء من دلوقتي من ناحية التوزيع ومن ناحية ايه 2 فاز وايه 3 والمواتير والمحركات طريقة شغلها وتوصيلاتها… ايه وكلام من ده لان ده حيفرق كتير اوي معاكم صدقوني…انا طولت بطريقة بشعة انا عارف بس لازم افيد اخواتي اللي انا حسيت بالظلم الرهيب ليا وليهم اما اشتغلت في قطاع البترول واتعاملت مع الكهرباء والكنترول هناك…شكرا ليكم وانا تحت امركم في اي استفسارات او نتطرح الموضوع للمناقشة لو تحبو…
والسلام عليكم ورحمة الله وبركاته…
اخيكم مهندس / كريم أحمد
خريج هندسة منوف قسم تحكم دفعة 2005

يعني الناس بتدخل ياجماعة ومفيش اي حد بيعبر عن موقفه او رأيه اللي انا طرحته هي الناس بتوع كنترول مبقوش كتير ولا ايه؟

المهندس كريم انا متفق معاك في الكلام دة من ناحية عدم اهتمام القسم بمواضيع مهمة ومطلوبة جدا في سوق العمل مثل “علي سبيل المثال لا الحصر” " المواتير بانواعها, برنامج الرسم باستخدام الكمبيوتر أوتوكاد وخطوط توزيع الطاقة " فمثلا كنا ناخد برنامج الاوتوكاد بدلا من برنامج المات لاب و امثلة تانية كتير.

السلام عليكم يا شباب انا المهندس وائل جلا ل وحاليا انا متولي اداره احد ى الشركات ياجماعه والله الموضوع مش كدا قسم تحكم من اقوي اقسام التحكم في مصر وبفضل الله مهندسين منوف مطلوبين جدا والكليه بدراستها بتفيدك جدا بس انت ركز شويه في الكليه واللي فعلا عايز يستفيد من الكله حيستفيد وانا علي فكره كنت قسم اتصالات في الكليه وندمت اني مدخلتش تحكم وهيه في الاخر مسأله ارزاق ومتحطوش في دمغكوا الكلام ده قسم تحكم فعلا قسم جميل وبالنسبه لمسأله الكهرباء احنا كنا بناخد في سنه أولي و تانيه النظام القديم الكهربا كويس جدا أنا معرفش ايه اللي انتوا بتخدوه دلوقتي صراحه هوه اللي مطلوب منكوا انكوا تركزوا عليه هوه الربط بين المواد الدراسيه والحياه العمليه و علي فكره مش بعاد عن بعض بس نركز شويه وربنا يوفق الجميع وانا تحت امركوا في اي استفسار

بشكر الاخ المهندس الكترون والاخ وائل جلال…
بالنسبة لكلام الاخ الكترون بتفق معاه مليون في المائة…اضافة على كده حقولك ابسط مثال ابسط يمكن من المواتير واي حاجة… عناصر الكنترول الاساسية اصلا محدش بيشوفها ولا بيعرف عنها اي شء في الكلية وهي في نفس الوقت عصب التحكم وابسط الاساسيات ورخيصة جدا وسهل اوي انها تتشاف عملي لكل الناس
بالنسبة للاخ وائل جلال…اخي العزيز انا بعشق الكونترول واحنا كلنا بندخل هنا وبنشارك في الموضوع ده علشان حبنا للكنترول
انا مش بطرح الموضوع الا لتوضيح السلبيات الخطيرة اللي في القسم في كلية هندسة منوف…ثانيا احب اوضحلك مع احترامي الشديد ليك انك كنت اتصالات فمتهيألي معندكش فكرة بالظبط ايه اللي بيتدرس في الكنترول وايه المطلوب في الكنترول في مجال الشغل…انا حضرتك كلامي ده بناءا على شغلي في اكتر من مكان واحتكاكي بسوق العمل في مجال الكنترول وكذلك بالنسبة لمعظم زميلي اللي برضه عانو نفس المعاناه كلهم ولكم جزيل الشكر عالمشاركة

السلام عليكم ورحمة الله وبركاته
حضرتك طبعا غلطان ياباشمهندس احنا بندرس حاجات كتيير قوي في تحكم
أولا بالنسبة افتكر كده في سنة أولى في مادة اسمها هندسة كهربية ومادة اسمها ورش كهربية
وارجع بالذاكرة كده لورا بس لسنة تانية كان فيه مادة اسمها بور وماشين فيها أساسيات خطوط النقل والمواتير وال2و3 فاز ودلتا وستار
ثم ادخل لسنة تالتة تحكم مادة القياسات فهذه تعتبرمادة مهمة جدا وكمان معمل الservo وكذلك معمل الprocess
ومادة الميكروكنترولر ومعمل الplc
وفيه تاني بندرس المواتير
على فكرة ياباشمهندس أنا لسه بالفرقة التالتة وحاسة ان انا الحمد لله راضية جدا عن قسمي علشان شايفة ان استفادتي من القسم لحد الان لا حصر لها الظاهر كده يا باشمهندس ان حضرتك اللي ما كنتش مركز شوية في المواد اللي كنت بتدرسها طب ارجع كده للكتب الدراسية بتاعتك وشوف ما فيها من معلومات وابقى ادعيلي

مع احترامي الشديد ليكي يابشمهندسة مش عارف ليه اخدتي الكلام وبتتكلمي كاننا بنحارب او كأني عدو للتحكم…كل الاحترام لكلامك وعارف كويس اوي كل المواد اللي اتكلمتي عليها بس حقولك حاجة بسيطة…ايه فايدة موتور من غير كهرباء
ده بالظبط اللي بيحصل عند سيادتك مناهج ممكن فيها حاجات ممتازة بس بكل اسف بتتقال بنظرية النظري من غير الربط مع العملي والشغل الخارجي وده اللي انا بقوله في الموضوع وشكرا ليكي ولمرورك ولردك المنفعل

السلام عليكم انا طالب فى قسم تحكم ردا على المهندس كريم : القسم زى الفل انا معاك الى حد كبير الدراسه تختلف عن واقع العمل ولاكن هناك تحديث كبير يحدث فى القسم يكفى معمل الplcوالهندسه الطبيه

انا بجد مش عارف اقولكم ايه نفسى كلكم تقرو كلامى ياجماعه انا مهندس عمرو كمال خيرج 2008 يعنى فالنظام الجديد انا ياجماعة عنيت كتير قوى عشان اشتغل لدرجة انى وصلت لمرحلة اليائس ياجماعه والله والله ماحد يعرف ايه تحكم ده ولما جيت اشتغل ماعرفتش اعمل حاجه لانهم عيزينك تكون عارف كهربه مش هبل الكلية بتدى قرص مالوش دعوه بالواقع انا بجد بندم على دخولى الكلية دى ومن قلبى بدعى على كل دكتور فيها لانهم ماافدونيش باى حاجه يارتنى كنت دخلت كليه تانيه قسم مدنى والله والله ياريت ارجع تانى انشالله سنه واحده فى الكليه وانا هحول لجمعه تانيه وادخل مدنى او اى حاجه بجد اتخدعت فى الكليه دى وبكره هتشوفوا كلامى انا مش بحبطكم بس ده الواقع احنا مالناش لزمه صدقونى انا بجد بنصح طلبت اعدادى يحولوا ويسالوا الخرجين وهم يعرفوا ان كلامى صح احنا مش عارفين نلاقى شغل وخريجى المدنى بتشرطوا عليهم ياجماعه والله حتى لو كانوا مش فهمين حاجه وان اخدوك تشتغل يقعدوا يقطموا فيك ايه تحكم ده عمتا انا قسم تحكم ونفسى اغير الشهاده انشالله اخليه قسم كهربه بس خلاص مش عارف والفرصه فى اديكم ياجماعه والله نصيحه لله اسمعوا كلامى لا هتتعبوا قوى مش كفايه انها فى عزبه ومفهاش اى روح جامعيه وكما بطردنا فى الشغل حزبى الله ونعم الوكيل انا عندى كلام كتير خنقنى بس بلاش اطول عليكم للعلم انا اشتغلت بس بوسطه كبيره قوى عمتا لو حد قرى الموضوع ياريت يارد ويقول اللى عنده وخصوصا الناس اللى لسه بتدرس سواء كانوا تحكم او كمبيوتر او اتصالات لان دا كله مابقاش ليه لازمه انا نفسى ماتقعوش فالمطب اللى احنا فيه وربنا يوفقكم يارب

على فكره ياباشمهندسين كلمة كارثه دى شويه على قسم تحكم ياجماعه ياريت حد يكلم الكاتره وفوقوا من اللى الكاتره بيقولوه انها مش عارف الوحيده فى الشرق الاوسط ومش عارف ايه وبعدين الباشمهندس اللى بيقول درسنا كهربه وماشين ومش عارف بى ال سى وميكروكنترول ياعمنا بص الجامعات التانيه بتاخد ايه بنفس المواد دى وانت تعرف الكارثه فعلا دول يخدوا الحجات دى فى اولى وتانيه قبل التخصص ياعمنا بجد فوق وماتسمعش كلام حد انزل السوق واطلع عالنت على موقع وظايف وشوف هم طلبين ايه هتلاقى نفسك مش مذكور تقريبا لا تحكم ولا اتصالات ولا كمبيوتر هتلاقى كهربه اه بس بور ياريت تفهم كلامى بور ده حوار تانى كبير قوى هتتصدم فيه لما تشتغل وخريجى مدنى ومعمارى وميكانيكا تقريبا بس ياجماعه والله انا مش اقصد التعقيد بس دا مستقبل ياجماعه من الاخر على الوضع ده هتتخرجوا ولا فهمين شىء وتعانو بجد والللى مالوش وسطه هيقعد جنب مامته والله صدقونى انا الحمدلله اشتغلت فى شغل كويس قوى بس مش كل الناس معاها وسطه فكروا بجد انا بجد ماليش مصلحه اكيد اعقدكم انا من خنقتى من ام الكليه دى وضحكهم عليه لما كنت فيها وضحكهم عالناس اللى فيها دلوقتى اتغظت ودورت عالمنتدى ده عشان اوصل كلامى

انا كده الحمد لله وصلت كلامى وانتم احرار وعلى فكره انا كنت زيكم لما كان حد بيقول كلمه عالكليه كنت اقوله ياعم دى مافيش منها اتنين ودى النتيجه على فكره فيه ناس خريجين قدام ولسه مبلطين والله مامنهم صدقونى السبب من القسم يمكن من الكليه كلها طب حد فيكم يقولى لو نزل موقع على انه مهندس كهربه هيعمل ايه؟ ولا هيعرف يقول بم قصاد الناس اللى معاه ربنا يسترها علينا وحوار المصانع والله بيعسرك فى الانترفيو وبعد كده يشغلك 12 ساعه وب800 وبتبقى جيد جدا كمان بجد ربنا يعدلها فى سنين تخرجكم ادعوا ربنا يعدلها معاكمومعانا على فكره انا لما حد بسالنى انت قسم ايه بقوله كهربه لان لو قولتله تحكم يعملى بقى حوار يعنى ايه ده طب بتشتغل بده فين يووووووووووووووووووه خنقه بجد ماله المدنى ياجماعه والله ده اصل الهندسه ليت الشبا يعود يوما عمتا انا موجود وهردلكم على اى استفسار انشاء الله وافهموا كلامى كويس لانكم لسه مافيش مسئوليه ممكن تنفضوا ويمكن تشتمونى لكن انا مع الغلبان والله اللى لا هيلاقى وسطه ولازفت وحوار التقدير ده ههههههههههههههههههههههههه
احنا فى مصر
عمتا بتمنلكم التوفيق
للعلم انا شغال فى تكرير اسكندريه
ههههههههه مهندس كهربه بيقولوا كده

الاخ العزيز shronker اولا بشكرك على مرورك وتفاعلك الجميل على الموضوع اللي طرحته…انا مقدر انفعالك الكبير ده اوي وعارف ليه بس علشان نتكلم بواقعية الفترة دي مختلفة جدا عن اي فترة فاتت بسبب الازمة الاقتصادية وفي معاناه رهيبة مش علشان احنا تحكم لاء في كل الاقسام…بس انا زي ماكتبت المقالة في الاول والاخر مش بقول للناس ادخلو تحكم ولا متدخلوش كل الحكاية عاوز اقولهم في كارثة بجد حتعرفوها في الشغل العملي ان تحكم من غير كهربا يبقى انت مش مهندس فلو قدرو وهما في الكلية يكونو كويسين في الكهربا وقتها حيبقو فعلا محترفين…طبعا الكلام مفيش اسهل منه وصعب جدا الكلام اللي بتكلم عليه ده لو فضل وضع التدريس والمناهج عقيم زي ماهو وكان معمول بيه من زمان…ياريت الوضع يتغير وياريت لو متغيرش واللي في القسم يبدأو يزاكرو كهربا كويس اوي ولو حياخدو كورسات ودروس وممكن اقولهم يبدأو بايه واي اسألة انا تحت امركم… k a r i m g a d 83 @ y a h o o . c o m

الله يكون في عونك حبيبي لاكن ماسار عندك الا تشوف نفسك للامر الواقع

انا مريت بنفس مشكلتك وحليتها بنفس حلولك ولكن ليست الكليه ميه فى الميه خطا و يوجد بها كورسات كويسه ولكن انا معاك فى رايك بخصوص انك مش هتعرف انت هتتحكم فيه غير لما تتخرج ودليلى على هذا انه اذا تعلمت ما فاتك ستصبح مهندس شاطر
مهندس محمد جمال كنترول 2005

السلام عليكم
انا لسه عضو جديد معكم ولفت انتباهى هذا الموضوع لانى بما انى فى قسم التحكم عانيت من هذا الموضوع
وياما اتعملت استفتاءات كتيرة واحنا قولنا فيها المشكلة دى لكن بلا جدوى ولم يتم تعديل اى منها
بس المفروض احنا مانتظر انه يتحل فى الوقت الحاضر ونسعى ان نخرج من هذه الكارثة بان كل من عنده شئ يفيد الجميع حتى لو بسيط يرسله للجميع ويبقى فى اتصال دائما بيننا لعلنا نصلح مايمكن اصلاحه حتى ياتى الله بامره
وجزاكم الله وايانا كل خير ونفع بنا وبكم

شكرا لمرورك يابشمهندسة شيماء بس عاوز اقولك ان المشكلة الكبيرة اوي دي انا عن نفسي وانا في الكلية لا حد اتكلم ولا حد بيقول ولا حد يعرف ولا انا كنت اعرف عنها اي شئ الفكرة ان اما تطلعي لسوق العمل الحقيقي فعلا بيبان كل السلبيات الخطيرة وقتها فيمكن انا من رسالتي بوجه نداء للطلبة اللي لسه بيدرسو ضروري يحاربو علشان بجد مينفعش كده خالص ولازم يعملو قلق لحد اما الوضع يتغير عن كده لانهم جوا الكلية لسه وفي في ايديهم الكلام شوية

طب يا جماعة انا لسا سنة تانية وبفكر ادخل تحكم لا ني مقنتعة بيه اووي
دلوقتي اعمل ايه بصراحة انتوا عقدتوني جاااااامد ومش عارفة اعمل ايه
طلبي منكم انكم تعرفوني اعمل ايه من دلوقتي عشان افيد نفسي طالما مش هستفاد من الكلية

الزميلة العزيزة سما الموضوع مش الهدف منه اما عملته وكتبته اني اعقد حد وقلت كده حتى في الموضوع نفسه…بصي انا ممكن اتكلم معاكي اقولك الوضع بالظبط ايه في سوق العمل ايه المطلوب ايه اللي افيد اكتر للبنت ايه ممكن تعمليه سواء دخلتي تحكم او اتصالات او حاسبات…الموضوع بالعكس اسهل اوي ليكي واحسن في الفترة دي لان تقدري تقرري وتشوفي ايه حتعمليه مش تستني لحد ااما تخلصي وتفوجئي بكل شئ وتتصدمي…انا عموما تحت امرك وتحت امر اي حد يحب نتناقش ونستفيد اميلي اهو ياسما واكيد ان شاء الله حقدر افيدك
k a r i m g a d 8 3 @ y h o o . c o m or k a r i i 8 3 @ h o t m a i l . c o m

السلام عليكم
انا المهندس اسامة الشاذلي - خريج دفعة 2004 - قسم هندسة الالكترونيات الصناعية والتحكم - واعمل حاليا معيد بذات القسم - رأيي الشخصي في الموضوع ده انه فيه مبالغة شوية لاني الموضوع مرتبط ببعضه والعيب فينا وليس في التدريس ولا في المناهج احنا عايزين العلم في كاسات ولا نريد ان نجهد انفسنا في البحث عن المعلومة حتي لو في كتب الدراسة ولا اقول المراجع الموجودة في المكتبات ولا علي النت ورايي هذا ليس لانني عضو هيئة تدريس بالكلية ولكن هذا ما احاول توصيله للطلبة الذين اقوم بالتدريس لهم وهذا لاينفي المسئولية بعض الشئ عن الكلية والادارة واعضاء هيئة التدريس … الرجاء المواصلة معي علي الايميل الخاص بي osama.elshazly@gmail.com

اكيد طبعا موافق لرأيك يامهندس اسامة بس الواجب والهدف الاسمى والاساسي للكلية مش زي مانت متخيل اني بطلب من التدريس ينزلو العلم في العقل ويبرمجوه كل اللي بتمناه تعليم حقيقي محاكي للواقع والحياة العملية كل اللي بتمناه مناهج تدعم ده بكل بساطة بعيد عن حشو لا طائل منه ولا هدف كل اللي بتمناه كلام عملي ومحاكاه عملية بنسبة 80 في المائة مع جعل النظري كما تقول كل طالب سوف يبحث هو بنفسه في كل مكان ممكن عن معلومات مفيدة تفيده مدام رأى بنفسه عملي اما ان تحدثني ان على الطلبة ان يبحثو ويقومو بالبحث والاجتهاد في النت والكتب وغيره فصدقني مدام لا يوجد دافع عملي لن يكون هناك قابليه لذلك
اخر جزء اخي الفاضل انت معيد في قسم التحكم من سنين هل تستطيع ان تعمل في مجال عمل خارجي يكون به كهرباء مع تحكم؟؟؟ صدقني اخي الفاضل ليس الغرض من سؤالي الاستهزاء ولكن انت رجل تمثل القمة بالنسبة للطلبة في المستوى فما بالك بالخرجين العاديين ؟؟؟؟