[LEFT][COLOR=#000000]
[/color][/left]
الكلام دا من وحى خبرتى المحدودة بالتكييف , بفضل الله اشرفت على مشاريع ف مول العرب و دولفين لاند و مشاريع ف 6 أكتوبر.
اولا:
شغل المكتب الفنى أو التنفيذى عامة بيختلف عن شغل الاستشارى , لأن شغل الاستشارى بيكون بالقانون و المعادلة و من المرجع و ف الغالب مبيروحش الموقع و يعايشه زى التنفيذى .
الاكسل هو دراعك اليمين و الشمال , أى حسبة تقف قدامك , هات اكسل شيت من على النت , اكتب ف جوجل اللى انت عايزه و حط امتداد .xls و هتلاقى كل حاجة ان شاء الله.
كراسة الشروط لحضرتك من الاستشارى فيها مكن التكييف و نوعه و عدده و سعته , و مخارج الهوا و كل تفاصيل المشروع .
أول حاجة تعملها :
1- احسب الاحمال بتاعت المشروع بس طبعا انت مش عندك بيانات عن الاشخاص ولا عن اى حاجة داخل الحيز , تعمل ايه ؟ تحسب بالطريقة البلدى كدا , يعنى تاخد المساحة بتاعتك و تقسمها على X ,وهيطلعلك الحمل بالطن تبريد TR
X دا رقم بيتحدد على حسب المساحة بتاعتك , يعنى لو المساحة بتاعتك فيها حيطة غربية اوعلى الشارع يبقى X= 12 , المساحة كل اللى حواليها مكيف و مفيش فيها احمال كتير X ممكن توصل لغاية 24 , انت بالخبرة هتعرف X بكام من مكان للتانى , بس حاول تبقى منطقى.
لو قريب من الاستشارى عييييييييييييش , لو بعيد عنه اتصل و ناقشه و حاول تعرف الأحمال شكلها ايه و احسبها.
2- اتأكد برضه من حساب ال static pressure بتاع اطول فرع عندك و على آخر ديفيوزر , نصيحة خليك ف يورك لو مشروعك فيه مكن كونسيلد لأن اليورك ف الstatic بيكون تنين مجنح.
3- راجع كراسة الشروط المكتوبة و شوف هل المكن المطلوب فيها أحماله standard ولا لأ , و هل بيحقق ال static المطلوب ولا لأ , لو بيحقق خير و بركة , لو مش بيحقق طلع ايميل الاستشارى و ظبط معاه.
كدا بقى الشغل المكتيى خلص نيجى للشغل الهندسى
1- اللوحات هتجيلك single line فيها أماكن المكن و تفريعات و مخارج الهوا , هتعمل ال shop drawing و تحدد الأبعاد بتاعت المكن من الكتالوج , و هتنسب أى ابعاد بالنسبة للعامود الخرسانة المسلح مش الحيطان ( خد بال من دى كويس ).
2- لما تخلص و المدير يعمل approving للرسم , هتعمل حصر للصاج و تشوف هتحتاج كام كيلو أو طن صاج , الصاج لا يحدد من الاستشارى الصاج بيكون بالمقوعية انت اللى بتحدده .
3- هتشوف هتحتاج مواسير drain لكل مكنة اد ايه , و اماكن البلاعة فين و تحدد المواسير بالمتر الطولى.
4-بعد ما تخلص ال shop drawing لازم تعمل تنسيق مع المعمارى و المدنى علشان مناسيب السقف الساقط و علشان لو كمرة داخلة معاك ف duct , لأن الكمرة تهم بتاع مدنى و منسوب السقف يهم بتاع عمارة و انت كتكييف آخر حاجة بيفكروا فيه خليك مرن و الموضوع ماشى بالحب ما بينكم انتوا التلاتة.
5- تتصل بالموردين بتوعك و تتطلب عرض سعر لمكن التكييف و الصاج و مخارج الهوا و خلى بالك تتأكد أن الاسعار اللى بتاخدها شاملة الضريبة ,وطبعا تسأل فيه خصم ولا لأ. و لو فيه تكاليف نقل تعرف برضه و هيبقى متوفر امتى.
6- الناس بتاعت التسعير دول مش دايما متعاونين حاول تظبطهم و تبقى شيك اوى و حسسهم انهم ملوك لأن دول اللى هيخلوك تعمل عرض السعر و كل فترة تعمل تحديث لآخر اسعار موجودة عندك ,و كل سعر يفضل يبقى مبعوت بالايميل و الفاكس مفيش حاجة سماعى.
7- ظبط عرض السعر و العرض الفنى يا معلم و خلى بالك العرض الفنى لو معمول بالغة العربية كويس و صيغة قوية المدير هيفرح بيك اوى.
ملحوظة :
1-أى تعديل او اى meeting ليه نتايج لازم كله يمضى عليها , لو مشيت بالكلام هيبيعوك عاديييييييييى , خليك ف السليم و امشى بالحاجة اللى عليها امضاء.
2-الاستشارى و المعمارى ف الغالب بيكونوا نفس المكتب يعنى محدش هيظبطك و طبعا المالك معاهم , أنت كمقاول حاول تساعد نفسك و متعتمدش على حد.
3- لو حصلت مشكلة ف الموقع أو الاستشارى طلب يقابلك هو أو المعمارى اسمع الكلااااااااااااام و غير زى ما يحبوا بس متقولش حاضر اوى , حسسهم بشوية رخامة بدل ما هيستلموك و أنت اللى بتتحاسب على معاد التسليم.
و بكدا المشروع يكون خلص , حسيت بحاجة 
م/عاصم محمد حسن
وهذا خالص لوجه الله , اللى عايز ينقله يتفضل ينقله بدون استئذان بس لطفا يقول انه منقول.
عن أبي هريرة -رضي الله عنه- أن رسول الله -صلى الله عليه وسلم- قال: إذا مات ابن آدم انقطع عمله إلا من ثلاث: صدقة جارية، أو علم ينتفع به، أو ولد صالح يدعو له، رواه مسلم