أشعار هندسية

مدنــى تملى من زمان

• مدنى تملّى من زمان عايز الذكى والفهلوى
مبروك عليكوا المهرجان مبروك عليكم بالقوى

• مبروك يا إيد متشمّرة مبروك يا فكر بيتعصر
مبروك يا روح متصبّرة مبروك يا عقل بينتصر

• أحلى تعب واجمل زهق والطف وأظرف هلوسة
وأرقّ تعذيب اتخلق شفته هنا فى الهندسة

• دكتور يفنّن فى العُـقد ومزاجه بس يذلّـنا
ييجى امتحان وعليه العوض نخرج نبصّ لبعضنا

• ومعيد يقول لك ماتخافوش الشرح واضح فى الكتاب
ويزوغ ودايما مانشوفوش غير بس ياخد فى الغياب

• وان روحنا نشكى لهمنا يقولوا ما تذاكروا أهم
نلاقى أعمال السنة جالها أنيميا وفقر دم

• نرجع نذاكر كلنا آخر كفاح آخر جهاد
وبنيجى على آخر السنة نلقى النتيجة برضه (ضاد)

• يا اخوانا ليه إيه السبب إيه الهدف ماتفهمونا
هوة احنا لوناقصين أدب بالامتحان هتأدبونا

• طب ماتقولولنا نعمل ايه وازاى هترضوا عننا
هتخرجونا وللا ايه وللا احنا عاجبنكم هِـنا

• إحنا صحيح بنحبكم من غير نفاق من غير مجاملة
واللى بيربطنا بكم أقوى رباط واحسن معاملة
لكن اسمعونا كلكم علشان ماتبقى صراحة كاملة
ياتخرجونا زيكم ونشتغل ونجيب معاملة
يا تقعدونا جنبكم وتصرفولنا مكافأة شاملة

إعجابَين (2)

شعر جميل بس مدني قسم سهل يعني مش محتاج شعر يتكتب فيه

إعجاب واحد (1)

عزيزى مهندس أحمد
أتشرف بالانضمام للمنتدى -
أما عن ردك لست أدرى كونه من باب المشاركة أم من باب الحكم على أولوية وأهمية النشر
أود أن أخبرك بأن الغرض من نشر تلك القصيدة بداية لنشر مجموعة من ذكريات ومعاناة طلبة هندسة بشكل عام متمنيا أن يسعد بها كل من مر بتلك المعاناة - بغض النظر عن سهولة أو صعوبة الدراسة
تقبل تحياتى

إعجابَين (2)

اهلا وسهلا بك مهندس سعد
طبعا أكيد ردي من باب المشاركة وليس حكم على اولوية النشر وعموما جميع مواضيعك مرحب بها بالمنتدى

إعجاب واحد (1)

أشكرك مهندس احمد وعلى لقاء قريبا بإذن الله

إعجاب واحد (1)