4 _ هنجيب خامة هى أساسية فى بعض التضريبات وغير أساسية فى بعض التضريبات بس لازم تكون موجودة عندنا لإن فى الغالب بنخليها أساسية فى أغلب شغلنا وهذه الخامة هى ( فينول كريستال )( phenol crystal ) وهو بيأتى فى برميل وزنه 200 كيلو وفيه منه كذا منشأ فى السوق ألمانى ساسول وإيطالى وجنوب أفريقيا إحنا هنجيب بتاع جنوب أفريقيا المنشأ أرخصهم وأنا صراحة جربته ممتاز جدا وسعر الكيلو فى البرميل 10.5 جنية ( عشرة جنيهات ونصف ) يعنى البرميل يعمل 2100 جنية وهو بيأتى من الشركات السابق ذكرها عند الكلام على القلفونية والصودا والتايلوز انا طبعا بجيب بالبرميل أوفر وضمان انه مبرشم ومن بلده وفيه فى القاهرة فى شارع الجيش شركات كتير بتبيع الفينول بالكيلو بس صراحة انا معرفشى منشأه اللى بيتباع سايب بالكيلو ولا سعره ولا إذا كان مضمون ولا لأ لإنى مجبتوش سايب بالكيلو قبل كده المهم ممكن تذهب إلى هناك وتسأل الشركات كلها اللى فى شارع الجيش وعلى رأسهم شركة مروان جروب اللى ذكرتها قبل كده وشركة سمير نيرول على ما سمعت إن حاجتهم مضمونة وعندك برده الشركات التانية اللى انا ذكرتها زى اللى فى قويسنا واللى فى طنطا وغيرهم كتير وممكن انتا تلاقى شركات تانية فى محافظتك انتا دور واسأل ومادة الفينول اللى بتبقى فى البرميل عبارة عن كريستال صغير على شكل سكر النبات وبعد اما بتشتريه بيتم تسييحه آى تحويله من الحالة اللى عليها وهو كريستال صغير إلى سائل وهنبقى نشرح ذلك بالتفصيل عند الكلام على طرق التصنيع ودية صور لبرميل الفينول اللى منشأه جنوب أفريقيا:
5_ هنجيب حوالى جمدانتين فاضيين ( فارغتين يعنى أقصد علشان نعبى فيهم الجاز الأبيض ) ونشترى فيهم جاز أبيض يعنى حوالى 120 لتر جاز ابيض هو لتر الجاز الأبيض ب 1.5 جنية من مصدره من كوبانية الجاز أو هتشتريه من أى دكان بقالة أو من أى مكان المهم يكون جاز أبيض مش جاز مخلوط على سولار زى ما بيتغش
6_ هنجيب حوالى 1 كيلو من مادة تشبه حبات السكر بيضاء اللون اسمها بولى أكريمالي معروفة عند محلات الكيماويات باسم بولى
وهذه المادة بتستخدم فى الصابون السائل احيانا بتعطى عرق للصابون السائل فاحنا بنستخدمها هنا فى الفنيك علشان تعطى عرق للفنيك وتزود فى لزوجته وهذه الخامة الكيلو فيها ب 35 جنيه وهو بيأتى من شركات الكيماويات السابق ذكرها
[COLOR=#000000][COLOR=#000000] [CENTER][B][RIGHT]7 _ هنجيب خامة هنشتريها من شركة اسكندرية للزيوت اللى فى كفر الزيات وهى اسمها
[/b][/center]
[/color][/color]
زيت محمض
وهو عبارة عن ايه زيت مرتفع الحموضة فهما فى الشركة هناك الزيت اللى مرتجع عندهم من الزيوت النقية اللى عندهم زى زيت بذرة القطن او الصويا مثلا اللى هو الغير نقى اللى هو الدرجة اللى بيقولوا عليها ثالثة بياخدوه ويوضع له نسبة صودا 1% او 1.5 % يعنى يتعمله عملية مسولاج فيبقى عبارة عن صابون يقوموا بعد كده حاطين عليه حامض كبرتيك مركز تركيز 98 % يقوم يدينى فى النهاية زيت مرتفع الحموضة اللى هو بيسموه زيت محمض عبارة عن ( مسولاج + حامض كبريتيك ) فيدينى فى النهاية زيت أسمر سائل قابل لنسبة بسيطة من التجمد فى الشتاء اما فى الصيف فبيبقى على حالته السائلة
والزيت ده بنشتريه من شركة اسكندرية للزيوت اللى فى كفر الزيات وبشتريه عادى من غير ورق ولا اجرائات اى اقصد من غير بطاقة ضريبية ولا سجل يعنى اى حد ممكن يشتريه من غير اى اجراءات
وسعر الكيلو 3.1 جنية ( ثلاثة جنيهات وعشرة قروش ) واى كمية انتا عايزها بيدوهالك حتى لو كيلو واحد
واحنا هنعوز كمية بسيطة منه حوالى 100 كيلو
وعنوان الشركة :
كفر الزيات فى مدخلها من على الطريق
0402542830 _ 0402542677 _ 0402547300
_ وفيه كمان زيت تانى هنجيبه هو عبارة عن زيت بذرة قطن غير مهدرج يعنى غير صالح للإ ستخدام الآدمى بس مش هنجيبه من شركة اسكندرية للزيوت ده هنجيبه من معاصر زيت بذرة القطن وطبعا اسأل فى القرى والأرياف القريبة منك على معاصر زيت بذرة القطن
عامة انا بجيبه من معاصر فى بلدين فى المحلة فى الطريق الدائرى بتاعها ( بلد اسمها الجبرية _ وبلد اسمها عزبة راتب قريبة من الجبرية ) ودول اكبر بلدين تبع المحلة عندهم معاصر زيت بذرة قطن
اهم حاجة تجيب الزيت من عندهم نقى خالى من الشوائب لإن هما بيحطوه فى بيارة عندهم بير يعنى بعد اما يعصروا بذرة القطن بياخدوا الزيت ويحطوه فى بيارة ويسيبوه لمدة يومين علشان الرواسب اللى فيه تنزل تحت فى قاع البير فانتا لو رحت لأى معصرة شوف الأول لو الزيت بقاله كذا يوم فى البيارة خد من فوق الوش النقى اللى هو مش مرسب اما لو رحت ولقيت البيارة فيها شوية صغيرين غالبا متخدش منها لإن ده بيبقى فيه رواسب كتير حاول تاخد الزيت لما البيارة تكون عالية والزيت بقاله اكثر من يومين فيها علشان تضمن عدم الرواسب
المهم علشان مطولش عليكم زيت البذرة ده بنعوذه فى تضريبات السوبر بيتعمل منه فنيك غالى نعبيه فى ازايز وتركيزه بيبقى مقارب جدا لتركيز فنيك العاشر او فنيك عابدين وبيتعمل منه كمان فنيك سايب مركز بدرجاته
فالزيت ده بيبقى انفع للتضريبة اللى بيبقى فينولها عالى طبعا انا هشرح الكلام ده بالتفصيل
المهم الزيت ده هنعوذ منه 200 كيلو لإن احنا بناخد منه حاجات بسيطة
وسعر الكيلو حاليا 3.5 جنية لإن الأسعار مش ثابتة فى السوق بترجع لحسب سعر البذرة وانتاجها
وفيه تليفون واحد انا بتعامل معاه من عزبة راتب : اسمه الحاج هانى : 0124936212
وفيه تليفون واحد انا بتعامل معاه من الجبرية : اسمه الحاج عبد الله الديب : 0104401160
وبكده نكون إتكلمنا على المعدات والخامات اللى بنحتاجها فى تضريبات الفنيك المختلفة من سوبر سايب وشعبى سايب وسوبر معبأ وشعبى معبأ _____________________________________ وهنبتدى إن شاء الله دلوقتى نتكلم على تضريبات الفنيك المختلفة سواء سوبر ( عالى التركيز ) أو شعبى ( مخفف التركيز ) أو وسط ( متوسط التركيز ) وسنذكر إن شاء الله التصنيع بالتفصيل مع رفع الصور لعمليات تصنيع تمت قبل ذلك وأوعدكم ايضا إن بعد أما ينتهى الموضوع إنى أحاول أرفع لكم بعض تضريبات للفنيك مصورة فيديو
أولا : تركيبة برميل 200 كيلو من الفنيك السوبر المركز السائل بتركيز عالى جدا بالنسبة للموجود فى السوق وبسعر مناسب للسوق
وهو يتم تعبئته فى جراكن مستعملة سعة 20 لتر وجمدانات مستعملة سعة 60 لتر
ويتم بيع الطن منه سواء فى جراكن او جمدانات لمحلات المنظفات بالجملة ب 2550 جنية الطن من غير حساب ثمن الفوارغ لإن احنا قلنا قبل كده ان الفوارغ سواء جراكن او جمدانات بناخد مكانها فوارغ تانية او بناخد ثمن الفوارغ اذا لم نأخذ بدل لها
وبيعه قطاعى لمحلات المنظفات القطاعى الجركن ب 60 جنية والجمدانة ب 180 جنية
( عامة مسألة كيفية البيع لمحلات المنظفات الجملة او القطاعى ونبذة عن السوق بصفة عامة وبصفة تفصيلية من ذكر ايجابياته وسلبياته سنأخرها بعد ذكر مراحل التصنيع حتى لا تتشتت الأذهان ) كده كده هنتكلم على طرق التسويق والعروض بالتفصيل وبطريقة علمية وتجارية
المقادير :
5 كيلو زيت بذرة قطن
11 كيلو قلفونية
175 جرام تايلوز
90 جرام صودا لسرعة تخمر التايلوز واذابته
2.180 كيلو صودا قشور تركيز 98 % ويفضل بتاعة شركة النصر للكيماويات ( بتاعة شركة القوات المسلحة الشكارة الصفراء اللتى ذكرناها قبل ذلك )
طبعا فيه خامات سيتم تحضيرها قبل البدأ فى التضريبة مثل : 1 _ القلفونية : طبعا احنا هنا فى تضريبة السوبر المركز السائل الذى سيتم بيعه فى جراكن وجمدانات احنا قلنا اننا هنحتاج 11 كيلو قلفونية طيب دلوقتى احنا ذكرنا قبل كده ان القلفونية بتأتى فى برميل مبرشم وزنها صافى 225 كيلو وقلتلكم انى انا سمعت ان فيه بعض شركات بتفتح كم برميل وبتبيع منها بالكيلوات حسب ما انتا عاوز المهم سواء جبت القلفونية فى برميل او جبت على قد التضريبة بالكيلوات بنحتاج اننا نكسر هذه القلفونية بالمطرقة وبعد ذلك يتم الدق عليها حتى تصبح ناعمة مثل الرمل طبعا الكلام ده موجه أكثر للى بيشترى بالبرميل لإنه كده كده هيحتاج انه يفتح البرميل سواء بالدق عليه جامد اكثر من مرة بالمطرقة الكبيرة حتى يفتح وبعدين ناخد منه على قد شغلنا ونضعه فى شكاير وبعدين ننعمه بالدق على الشكارة من برة جيدا حتى يتم تنعيم القلفونية لتصبح ناعمة مثل الرمل وهقلك على حاجة اسهل ليك ان انتا لما تشترى برميل قلفونية ان انتا اول حاجة قبل ما تفكر حتى انك هتضرب ايه اى نوع من الفنيك انك تفتح البرميل وتحطه كله فى شكاير موزونه بالتساوى وبعدين تنعم الشكاير من برة بالدق عليها زى ما قلنا حتى تصبح القلفونية ناعمة مثل الرملة بحيث انك بعد كده وقت عمل اى نوع من تضريبات الفنيك المختلفة هتحتاج قد كده من القلفونية تبقى جاهزة عندك بدل ما لسه هتقعد تكسر فيها ولسه كمان هتنعمها فانتا لو جبيت برميل قلفونية جبت اتنين جبت ثلاثة افتحهم كلهم الأول وبعدين عبيهم فى شكاير وبعدين امسك كل شكارة ودق عليها من برة بالمطرقة حتى تصبح ناعمة مثل الرملة ده هتلقيه اسهل ليك احتاجت كمية كبيرة كمية صغيرة هتلاقيها جاهزة . المهم اننا فى تضريبتنا السوبر دية هنحتاج زى ما قلنا 11 كيلو قلفونية متكسرين ومتنعمين زى الرمل ( والقلفونية مش مادة ضارة يعنى لو لمستها او مسكتها حتى بايدك ولا حاجة هى بس لو ايدك كانت متعاصة قلفونية وجت عليها ماية تلزق شوية فى ايدك فتحتاج انك تغسلها جامد لإن القلفونية تصنيفها فى الأساس مادة نباتية لإن احنا زى ما قلنا قبل كده ان مصدرها من أشجار الصنوبر فيفضل انك تكون لابس جوانتى علشان بس لو ايدك عرقت او جات عليها ماية متلزقش فى ايدك وتقعد تغسل فى ايدك جامد علشان تطلع ) ودية صورة لبرميل قلفونية بعد ما تم فتحه
لما تكلمت عن كيفية تنعيم القلفونية وذلك بالدق عليها بالمطرقة بعد تعبئتها فى شكاير لتصبح ناعمة مثل الرملة كان مقصدى مش انى أطحنها أو أنعمها جامد لأ يعنى على قدر المستطاع حتى لو بقت عاملة زى الحجارة الصغيرة بحجم عقلة الإصبع أو أصغر شوية فليس شرط انى أنعمها مثل الرملة لإنى انا لما قلت كده زى الرملة كان مقصدى انها متبقاش كتل كبيرة مثلا قد كف الإيد علشان لما أجى أسيحها على النار الكتل الكبيرة هتاخد وقت حتى تسيح فكل اما تكون صغيرة زى الحصو او الحجارة الصغيرة فى حجم عقلة الإصبع او أصغر شوية تقوم تسيح بسرعة ولا تأخذ وقت
وانا بخليها صغيرة زى حجم الحجارة اللى قد عقلة الإصبع او أصغر شوية ليه انا بعمل كده كمان علشان سهولة تسيحها وكمان علشان متبقاش حمل على الماتور خاصة لما أجى اشتغل فى الخلاط الكبير ال 2 طن او ال3 طن أو… أو وعلشان كمان لا تأخذ وقت
لإن فى البرميل بتبقى العملية سهلة ومش بحتاج الماتور فى اول شغلى أقصد يعنى انا مش بشغل الماتور لما بكون بشتغل فى برميل الا لما القلفونية تسيح طبعا الكلام ده هنشرحه بالتفصيل لإن احنا لسه بنتكلم فى طريقة تحضير بعض المواد قبل البدأ فى عملية التصنيع
السلام عليكم .بعد اذنك يا باشمهندس ممدوح ممن تنزل كلامك عن المشروع كله كموضوع واحد بعد الانتهاء منه لانى فاتنى منه شويه وانا كده مش عارف اتواصل فالمشروع ده .وشكرا
2_ أيضا من المواد اللتى سيتم تحضيرها قبل البدأ فى عملية التصنيع وهى : مادة البولى أكريماليد ( اللى هى معروفة عند محلات بيع المنظفات والكيماويات اللتى ذكرناها قبل كده بمادة البولى ) وهى مادة زى ما قلنا قبل كده انها تشبه حبات السكر بيضاء اللون وهذه المادة سيتم تحضيرها كالتالى : هنحضر بستيلة بلاستيك من البستيلات اللى ذكرناها قبل كده وهنرفع صورة برده ليها هنا وهنوزن فيها ماية لحد 23 لتر ماء ثم نوزن 20 جرام من مادة البولى ونرشهم على سطح الماء الموجود فى البستيلة مثل ما بنرش الملح للطعام ولا نقلب ثم يترك لمدة 12 ساعة دون تقليب وبعد ال 12 ساعة نقلب البستيلة جيدا فنجد ان هذه المادة قد أعطت الماء لزوجة عالية جدا ويسمى هذا بمحلول البولى ثم نتركه لحد اما يجىء دوره فى التصنيع
3_ أيضا من المواد اللتى سيتم تحضيرها مادة اسمها (تايلوز) (tylose) واسمها العلمى هو هيدروكسى ايثيل سلليلوز"hydroxy ethyl cellulose" وهى معروفة عند شركات الكيماويات والمنظفات بهذا الإسم تايلوز وسعر الكيلو زى ما قلنا قبل كده ب 45 جنية المانى المنشأ واحنا هنحتاج هنا لتضريبة البرميل السوبر السائل اللى ذكرناه ال 200 كيلو هنحتاج حوالى 175 جرام طبعا النسبة دية تقديرية حسب اللزوجة اللى انا هعوزها يعنى ممكن تقل وممكن تزيد على حسب اللزوجة اللى انا عاوزها بس طبعا هنتكلم على سلبيات الزيادة فيها ايه لإنها بتأثر على حاجات تانية عندى فى التضريبة ومعلش اعذرونى انا مش هفصل فى المسألة دية دلوقتى علشان انا هأذكرها بالتفصيل وهتكلم على خواص كل مادة من المواد الخام الداخلة فى التركيبة والنسب المسموح بها فى كل منها من كام لكام وايه السلبيات وايه الإيجابيات وايه هى البدائل اللى ممكن توضع مكان بعض المواد او ايه المواد الخام اللى ممكن استغنى عنها خالص فى التضريبة وحاجات من هذا القبيل بس نسيبنا دلوقتى من التفريعات علشان ننجز التضريبة ولا نجعل الأذهان تتشتت نرجع لموضوعنا يبقى قلنا اللى هنحتاجه 175 جرام من التايلوز ويتم تحضيره بالطريقة التالية : طبعا هو له أكتر من طريقة فى التحضير بس احنا هنذكر طريقة سهلة منهم وبرده هنخلى الكلام على الطرق التانية مع التفريعات وقت التفصيل فخلينا دلوقتى فى الطريقة اللى هأذكرها الأن وهى : هنحضر بستيلة زى اللى هوريها لكم فى الصورة ونوزن فيها 17.5 لتر ماء بوزن الكيلو يعنى 17.5 كيلو ماية وندوب فيها 85 جرام صودا قشور اللى احنا تكلمنا عليها قبل كده طبعا الصودا هتدوب فى الماء عن طريق التقليب ويكون تقليبنا دائما فى كل شغلنا عكس عقارب الساعة المهم بعد كده نحضر ال 175 جرام تايلوز ونضعهم فى كيس زى اللى فى الصورة اللى انا رفعها هنا ونخرم الكيس خرم صغير بحيث اقدر انزل منه التايلوز على خفيف كأنى برش ملح طبعا كل ذلك مع التقليب جيدا من لحظة ما برش التايلوز علشان لو التايلوز اترش مع عدم وجود تقليب يقوم يكلكع فى الماية فى لحظتها ولذلك انا برش التايلوز لحظة ما بقلب والتقليب يكون جامد وسريع على قد ما اقدر المهم هتنينى اعمل كده ارش التايلوز لحظة ما بقلب والتقليب يكون جيد جدا وبسرعة زى ما قلنا لحد اما الكيس كله يترش هلاقى فى النهاية الماية بقت لزوجتها عالية جدا جدا يعنى لزوجة قريبة من جل الشعر بس سايلة شوية عن جل الشعر المهم الرش يكون خفيف خفيف لحد اما ارش التايلوز كله والمهم انه يدوب كويس وميكلكعش والصورة هى :
[COLOR=#000000][COLOR=#000000] [CENTER][B][B][RIGHT]4 _ أيضا من المواد اللتى سيتم تحضيرها :
[/b][/b][/center]
[/color][/color]
( فينول كريستال )( phenol crystal )
وهو بيأتى فى برميل وزنه 200 كيلو وفيه منه كذا منشأ فى السوق زى ما قلنا قبل كده ألمانى ساسول وإيطالى وجنوب أفريقيا وكورى وكذا منشأ
إحنا هنجيب بتاع جنوب أفريقيا المنشأ أرخصهم وأنا صراحة جربته ممتاز جدا
وهو بيأتى من الشركات السابق ذكرها عند الكلام على القلفونية والصودا والتايلوز
انا طبعا بجيب بالبرميل أوفر وضمان انه مبرشم ومن بلده
وفيه فى القاهرة فى شارع الجيش شركات كتير بتبيع الفينول بالكيلو بس صراحة انا معرفشى منشأه اللى بيتباع سايب بالكيلو ولا سعره ولا إذا كان مضمون ولا لأ لإنى مجبتوش سايب بالكيلو قبل كده المهم ممكن تذهب إلى هناك وتسأل الشركات كلها اللى فى شارع الجيش وعلى رأسهم شركة مروان جروب اللى ذكرتها قبل كده وشركة سمير نيرول على ما سمعت إن حاجتهم مضمونة
وعندك برده الشركات التانية اللى انا ذكرتها زى اللى فى قويسنا واللى فى طنطا وغيرهم كتير وممكن انتا تلاقى شركات تانية فى محافظتك انتا دور واسأل
المهم سواء جبت بالبرميل أو جبت بالكيلو المهم انه بيبقى عبارة عن قطع صغيرة على شكل الكريستال فاحنا بنحوله للحالة السائلة
وله أكثر من طريقة لتحويلة من الحالة الصلبة وهو كريستال صغير الى الحالة السائلة
وبرده هنخلى الكلام على الطرق التانية مع التفريعات وقت التفصيل
فخلينا دلوقتى فى الطريقة اللى هأذكرها الأن وهى :
هنحضر البرميل ونفتحه من فوق بأجنة وشاكوش زى ما هو موضح فى الصورة علشان يبقى سهل اننا ناخد منه بعد كده وسهل كمان نقلبه المهم بعد اما نفتحه هنضع تحته شعلة يعنى هنولع تحته نار علشان يسيح ولا نعلى النار على الأخر علشان مايتلسعش البرميل من تحت فنخليها نار معقولة المهم هنسيب النار تحته ونسيبه يغلى لحد 70 درجة مؤية وهى كافية لتحويله الى الحالة السائلة طبعا هنحضر ترمومتر حرارى اللى هو بيقيس لحد 100 درجة مؤية علشان اول ما يسخن ويوصل عند 70 درجة مؤية عن طريق القياس بالترمومتر هنطفىء النار ونقلب البرميل تقليبه كويسة على السريع وبعدين نضع فى البرميل فوق الفينول من 15 الى 20 لتر ماء بوزن الكيلو يعنى من 15 الى 20 كيلو
ثم نقلب تانى تقليبة كويسة وهذا المقدار من الماء كافى لعدم رجوعه مرة اخرى الى الحالة الصلبة فنسبة الماء دية اللى بنضعها فى البرميل بتخليه يفضل سائل على طول وطبعا نبقى نغطى البرميل بعد كده وكل اما نعوذ منه نبقى ناخد وبعدين نغطيه علشان استنشاقه بيتعب الصدر شوية
وده طبعا اللى هنعمله فى البرميل هنعمله فيما لو جبناه بالكيلو
يعنى مثلا لو اشترينا 20 كيلو هنقوم نضعهم فى جردل صاج ونسيحهم على النار برده نار هادية علشان متمسكش فى الجردل او تلسعه ولما يوصل الى 70 درجة مؤية نطفىء النار وبعدين نقلبه وبعدين نديله من 1.5 كيلو ماء الى 2 كيلو ماء وبعدين نقلب تانى كويس
وطبعا الفينول بنسيحه مرة واحدة فقط اول ما بنجيبه فهى مرة واحدة بس اللى بنسيحه فيها بهذه الطريقة اللى ذكرتها او بطرق اخرى هنبقى نتكلم عليها بعد ذلك وبعدين يفضل على كده سائل طول عمره الا لو طالته رطوبة جامدة وخلته يتجمد فممكن يتجمد تانى بس برده عمره ما هيبقى جامد قوى زى ما كان من الأصل ساعتها نبقى نعمله حمام ماء ساخن من بره يطول فيها البرميل كله فلو حصل معانا كده اكتر من مرة نبقى برده نعمله حمام ماء ساخن ونحاول ألا نعرضه للرطوبة
وصورة برميل الفينول هى :
تحذير هام :
الفينول كريستال هذا من المواد شديدة الخطورة اذا لامس الجلد ومن المواد الكاوية يعنى اكون لابس جوانتى سميك طويل يغطى أغلب ذراعى زى اللى رفعت لكم صوره له قبل كده وهو معروف بجوانتى احماض سميك
وبرده وانا بقوم بتقليب البرميل اكون حذر والبس نظارة واقية زى نظارات البحر العادية والبس كمامة واتجنب استنشاقه على قدر المستطاع لإنه بيتعب الصدر
وبرده اضعه فى مكان كويس ثابت بحيث انه ما يقعش على رجل احد واغطيه على طول
طيب نبتدأ طريقة التصنيع متوكلين على المولى سبحانه وتعالى : 1_ أول حاجة هنجيب برميل صاج بعد أما نغسله كويس من جوة من البراميل اللى لها غطاء وأفيز زى بتاعة الفازلين او أى برميل صاج حتى لو مقفول بطبات المهم نفتحه ولو بأجنة وشاكوش لإننا هنضرب فيه التركيبة بتاعتنا ونضعه نثبته يا إما على حجرين بحيث اننا نقدر نضع تحته شعلة زى اللى هوريهولك فى الصورة رقم (1) ويا إما هنضعه نثبته على الشاسية الحديد اللى به 3 شعل اللى رفعنا له صورة قبل ذلك زى ما هوريهولك فى صورة رقم (2) صورة رقم (1) صورة رقم (2)
2_ هنوزن 5 كيلو زيت بذرة القطن اللى تكلمنا عليه قبل ذلك كما فى صورة رقم (1) ثم نضعه فى البرميل الصاج ولا بأس بشطف ما هو متبقى فى الجردل اللى لاصق فى قعره من الزيت لابأس بشطفه بماء ثم سكبه بعد ذلك فى البرميل . صورة رقم (1) 3_ هنأخذ ال 11 كيلو القلفونية اللى قلنا قبل كده اننا هنكسرهم ونعمهم ونضعهم فى البرميل الصاج فوق الزيت . 4_ هنولع النار تحت البرميل ولكن تكون نار معقولة لا عالية قوى تقوم تلسع البرميل ولا ضعيفة لا تنجز بل نار معقولة كما فى صورة رقم (2) صورة رقم (2) 5_ هنسيب النار شغالة تحت البرميل لحد اما القلفونية تسيح تماما ونتأكد كويس انها دابت تماما لإن بيبقى فيه قطع صغيرة من القلفونية لاصقة فى قاع البرميل فنتأكد من انها دابت تماما عن طريق خشبة طويلة نجس بيها قاع البرميل لحد اما نتأكد انها دابت تماما كما فى صورة رقم (3) صورة رقم (3) 6 _ نقلب بعد ذلك كويس . وهذه صور لمراحل دوبان القلفونية :
7_ بعد التأكد من دوبان القلفونية كلها تماما فى البرميل هنقلب كويس البرميل وبعدين نهدى النار شوية ( نار هادية أقل من النار اللى كنا مولعينها على القلفونية ) وبعدين نضيف بستيلة التايلوز كلها اللى كنا مجهزينها ولكن تدريجيا كما هو موضح فى الصورة : ولكن أهم حاجة انى بقلب كويس لحظة ما بأضيف التايلوز علشان لو نزل التايلوز فى البرميل من غير تقليب ممكن يكلكع فيكون التقليب لحظة ما بأضيف التايلوز والتقليب يا اما بخشبة عريضة تقلب معاية كويسة جدا يا اما اركب للبرميل ماتور يقلب هو زى اللى كنت رفعت لكم صور له قبل ذلك 8_ بعد اما اضيف التايلوز كله فى البرميل أزود النار شوية واسيب التايلوز يسخن شوية علشان يندمج مع القلفونية والزيت لإنه بيندمج كويس فى وجود تسخين واسيب النار لمدة ربع ساعة تقريبا مع التقليب كل شوية لو بقلب بخشبة ( مش شرط تقليب مستمر ولكن كل 3 دقائق او 5 دقائق تقليب لحد اما التايلوز يسخن شوية مع القلفونية والزيت )
9_ بعد أما التايلوز يسخن شوية مع القلفونية والزيت أطفى النار وأبتدى أجهز بستيلة فاضية زى اللى ههوريهالكم فى الصورة وأوزن فيها 2.180 كيلو صودا قشور اللى تكلمت عليها قبل كده ثم أضع عليهم 6.540 كيلو ماء وأقلب كويس بعصاية خشب لحد أما الصودا تدوب كما فى الصورة
10 _ بعد اما اطفى النار واتأكد ان النار مطفية أخد بستيلة الصودا اللى انا جهزتها وابتدى اضيف محلول الصودا فى البرميل الصاج بشفشق صغير زى ما هو موضح فى الصورة و اضيف سنة بسنة ( سرسوب سرسوب ) يعنى نظام حقن باحقن بالصودا سنة بسنة علشان التفاعل يتم من غير ما يحصل فوران لإن التفاعل بيطرد الحرارة فى صورة بخار والصودا فيها حرارة كامنة جواها فلما بيتم التفاعل وخاصة فى اول نزول الصودا فى البرميل بيبقى التفاعل شديد فأخلى بالى علشان ميحصلش فوران للبرميل ينكب على الأرض ويهدرلى شغلى او انه ينكب على اللى بيحقن الصودا فى البرميل يلسعه فى جسمه فأصب الصودا بالشفشق سرسوب سرسوب لحد اما الحرارة تهدى ويتم التفاعل ممكن ساعتها تحط باقى الصودا مرة واحدة بس برده خليك طالما انتا فى الأول لسه اول مرة تضرب فنيك خليك حطها حقن على طول سرسوب سرسوب على طول علشان ميحصلش فوران منك طيب لو لقيت هيحصل فوران ألحقه بخرطوم الماية افتح خرطوم الماية فى البرميل لمدة دقيقة مثلا او أقل حسب قوة الفوران يقوم يهدى الفوران ويخليه ميحصلش يبقى لما احقن بالصودا فى البرميل احاول يكون قريب منى خرطوم الماية علشان لو حسيت انه هيحصل فوران مش هقدر اوقفه اوقفه بالماية بسرعة بس اهم حاجة ما احطش ماية كتير لأ على قدر تهدئة الفوران فقط واهم حاجة انى لما بضيف الصودا لحظة ما بأضيف الصودا يكون فيه تقليب فى لحظتها يا اما عن طريق الماتور أو انى بقلب بخشبة المهم يكون فيه تقليب واهم حاجة اكون لابس الجوانتى بتاعى وكمامة على أنفى علشان بخار الصودا وعلشان الصودا متلسعشى ايدى لو لقدر الله وقعت عليها والصودا المخففة دية بالماء طبعا مش زى الفينول فى خطورتها على الجلد بس بتلسع جامد لإن طبعا دية صودا مخففة بالماء ولكنها بتعمل احمرار جامد للجلد ( لسعان جامد ) فطبعا اخلى بالى وألبس الجوانتى امان لإيدى وألبس حذاء كويس بحيث ان مفيش حاجة تنكب على رجلى وألبس كمامة برده ولو حبيت ألبس نظارة ماشى علشان لو عندى حساسية فى العين من الأبخرة
ملحوظة :
تكملة للكلام السابق طبعا لما ذكرت لكم ان لو حصل فوران الحقه بخرطوم الماية بسرعة مش معنى كلامى ده ان وانا بحقن بالصودا فى البرميل كل اما ألاقى الخليط اللى جوا البرميل بيرتفع شوية او بيغلى فى بعضه جامد انى اقوم فاتح عليه الماية واقول ان علشان ميحصلش فوران لأ طبعا انا ما قصدت ذلك لإن طبيعى كل اما هتضيف من محلول الصودا وانتا بتحقن هتلاقى تفاعل فى صورة حرارة شديدة وغليان وهتلاقى الخليط بيرتفع شوية
فهذا مش معناه انه هيحصل فوران لأ ده طبيعى انه كل اما بياخد صودا يرتفع سنة وبعدين ينزل تانى لإن فيه تفاعل بيتم
انما الفوران اللى اقصده اللى قلت انه لوحصل الحقه بخرطوم الماية ده بيبقى واضح ان بلاقى قدامى ارتفاع شديد جدا للخليط فجأة وبسرعة جدا جدا ده اللى اقصده انى افتح عليه الماية سنة لحد اما الفوران يهدى سنة اقوم اقفل عليه الماية علشان البرميل ميخدشى ماية كتير انا مش محتاجها فى التفاعل بتاعى
وهقولك على حاجة علشان تتجنب انه ميحصلشى فوران :
ضيف محلول الصودا على مراحل
بمعنى انك تضيف أول شفشق سنة بسنة وبعد اما تضيف اول شفشق انتظر دقيقة وبعدين ضيف الشفشق التانى سنة بسنة برده وبعد اما تضيف الشفشق التانى انتظر دقيقة وبعدين ضيف الشفشق الثالث سنة بسنة وهكذا الى آخر شفشق من محلول الصودا اللى فى البستيلة
