ازاي تعمل Personal Brand مميز لنفسك في 5 خطوات؟

الـ Personal Branding انتشر بقوة في الفترة الأخيرة كمصطلح وكمفهوم، فكرته انه زي ما الشركات ليها علامات تجارية مميزة، أي شخص مميز يقدر يكون هو بـ ذاته علامة تجارية مميزة، خاصة في مجالات زي البيزنس والماركتنج وريادة الأعمال والتصميم … إلخ، فيه مقالات وPresentations كتيرة موجودة على النت بتشرح ازاي تعمل لنفسك Personal Brand، المقال ده عبارة عن ملخص لكل الموجود على النت في 5 خطوات.

1- حدد هدف الـ Personal Brand بتاعك

أي براند في العالم لازم يكون عنده Vision وMission وأنت كمان لازم يكون عندك هدف من ورا الـ Personal Brand بتاعك علشان تقدر تبني على أساسه الـ Vision والـ Mission بتاعتك. موضوع الهدف ده بيختلف من شخص للتاني، ممكن تكون عايز تبني Personal Brand لنفسك لأنك موظف مميز أو Freelancer شاطر وعايز الشركات تتهافت على خدماتك، أو إنك تكون Entrepreneur وعايز تعمل Brand لنفسك علشان تقدر تجيب استثمارات لمشروعاتك وأفكارك وتقنع المستثمرين والشركاء بيها. وفي كل الأحوال شكل الـ Brand والمحتوى اللي بتقدمه والطريقة اللي بتعرضه بيها بتختلف على حسب أهدافك.

2- احكي قصص كتير

دايماً أي Brand ناجح ومميز بيكون عنده قصة بيحكيها للناس وفي الغالب بيكون ليها تأثير مجتمعي علشان تأثر في الناس بشكل قوي (فيه دراسة بتقول أن 55% من المستهلكين عندهم استعداد يدفعوا فلوس أكتر للشركات اللي بتعمل أنشطة بتفيد المجتمع) وهتلاحظوا كمان أن أغلب الناس المُلهمين عندهم قصص كفاح ونجاح وخبرات حياتية بيحكوها زي Oprah Winfrey على سبيل المثال، فلو عايز تبقى براند بجد لازم يكون عندك قصة بتتكلم فيها عن دوافعك وشغفك ناحية المجال اللي أنت بتشتغل فيه وليه اخترته هو بالتحديد، وكل ما تحكي قصص أكتر عن المواقف اللي بتقابلها في مجالك كل ما بتعلم في دماغ الناس أكتر لأن الناس بتفتكر القصص والمواقف الحياتية أكتر من المعلومات المجردة أو الكلام العادي.

“بالمثال يتضح المقال!” – حكمة عربية
ومن ناحية تانية كل ما بتحكي مواقف كتير قابلتها في حياتك كل ما بتبين أد أيه أنت شخص عندك خبرة في الحياة بشكل عام وفي مجالك بشكل خاص، وهو ده المطلوب إثباته.

3- اعمل لنفسك Theme واحد

سواء على النت أو في الواقع، في طريقة شغلك أو حتى طريقة تفكيرك، لازم الناس تحس أن شخصيتك وطريقتك وأسلوبك ودماغك متسقين مع بعض كلهم، وبالتالي ده هيخليك تعلم في دماغهم أكتر، حتى طريقة لبسك كمان ممكن تعلم في أذهان الناس، وطبعاً كلنا عارفين الطقم الرصاصي الشهير بتاع مارك زوكربيرج اللي مبيغيروش خالص بقاله فترة طويلة تحت سبب أنه مش فاضي بقا لفكرة اختيار الهدوم والكلام ده ومن قبله كان ستيف جوبز.

طيب ازاي اعلم أنا كمان في دماغ الناس بشكل فعال وسريع؟
خلي شكل موقعك أو مدونتك وصفحاتك على السوشيال ميديا كلهم شبه بعض، استخدم Bio متقارب أو موحد في كل الأماكن اللي فيها تعريف عن نفسك، الشعارات والحكم والقيم اللي أنت مؤمن بيها وبترددها دايماً حاول تخليها تبان في كل مكان فيه اسمك، الـ Presentations بتاعتك كمان يُفضل يكون ليها Style واحد، ولو عرفت يكون عندك Visual Identity وتستخدمها في كل أنشطتك وتعاملاتك هيكون أحلى وأحلى.

o-zuckerberg-clothes-facebook

4- قدم محتوى مفيد للناس

مدام بتقول عن نفسك إنك شاطر في مجال معين يبقا لازم توري الناس شطارتك وتعلمهم أي حاجة في المجال بتاعك، مهم جداً إنك يكون عندك محتوى (مجاني!) بتقدمه للناس، المحتوى ده ممكن يكون Posts على موقعك أو على السوشيال ميديا، ممكن يكون Videos أو E-Books أو حتى ممكن يكون Workshops أو استشارات مجانية بتقدمها للناس أو للشركات على حسب مجالك ونوع الخدمات اللي بتقدمها، المحتوى المجاني بيجذب الناس أكتر من طرق التسويق التقليدية وهيخلي الناس أو الشركات هوما اللي بيدوروا عليك بعد كده علشان يستفيدوا من خدماتك.

5- حط الـ Touch بتاعك

الجزء ده من المقال مش هقدر افيدك فيه كتير، لأنه بتاعك أنت، بس كل ما يكون عندك حاجات بتميزك أكتر حتى لو تفاصيل بسيطة كل ما ده هيسيب أثر إيجابي أكتر عنك في دماغ الناس وهيخليهم دايماً يفتكروك بشكل مميز عن غيرك، وهو ده المطلوب، لأنك بكده هتكون عملت فعلاً لنفسك Personal Branding وقدرت تعلم في أذهان الناس.

نصيحة أخيرة… متجهدش نفسك علشان تعمل Personal Brand علشان هتتعب وفي النهاية هيبان انه Fake مصطنع، خليك دايماً على طبيعتك وادي كل حاجة وقتها وقدرها وبكده هتحافظ على نفسك وهتبني براند شيك وأنيق!

المصدر :
موقع إعلانجي

إعجاب واحد (1)