الانترفيو


#1

الانترفيو
The Interview

المقابلة لها نوعين - تقنية (فنية) و شخصية. الاولى يكون موضوعها الجوانب الفنية و الثانية يكون موضوعها اكتشاف شخصية الشخص المرشح للانضمام للشركة. و طبعا كالعادة الموضوع مدارس و قد يضاف انترفيو ثالث مع مدير الفرع أو مدير الشركة.

بوجه عام الكلام على النت كتير اوي عن الانترفيو لدرجة السخافة لانه ببساطة المهم تبقى مهاراتك الفنية كويسة و في نفس الوقت مهم انك تكون هادئ و تبين للناس انك عندك شخصية. و اهم حاجة تكون ناصح في الكلام و تتحاشى ذكر عيوبك الفنية و ترد بثقافة على الاسئلة - طبعا ديه حاجة مش سهلة بس مفتاحها هو التعلم و القراءة من على النت كثيرا عن خبرات الناس مع الانترفيو. و بالتالي كمان عامل المفاجأة تكون قهرته. ((كل ما تقرأ اكتر كل ما تزداد قيمتك))

ساختصر في موضوع الانترفيو جدا لانه موجود على النت كثيرا و سبق و تم ارساله على الجروب منذ ايام…

الانترفيو التقني
Technical Interview

و موضوعه اختبار المتقدم في الجوانب الفنية و معرفة مدى معرفته (و عمق هذه المعرفة) بمتطلبات الشركة و بالتقنيات التي تعمل بها الشركة. و كمان معرفة مدى قابلية هذا الشخص لتعلم تقنيات جديدة بمرور الوقت حسب متطلبات الشركة و مدى قدراته العقلية و الذهنية. طبعا فيه اساطير عن الانترفيو و كلام كتير. اكتر كلام سخيف بسمعه هو ان احنا خريجين جدد و المتوقع عن معرفتنا انها متواضعة. لأ!! لانك المفروض تتقن مثلا لغة السي شارب و تعمل بها مشاريع صغيرة و تصقل معرفتك بها بالقراءة الكثيرة و التدريب المكثف لدرجة ان مع انك خريج جديد الا انك تكون عارفها كويس. مش معنى انك مش عايز تبذل ((مجهود كبير جدا)) في التعلم ده مش معناه انك تروح تقعد في الانترفيو و تتحجج بانك خريج جديد. لان الخريجين من الجامعات الاخرى مستعدين كويس و بالتالي مش حيسيبولك مكان.

طبعا الانترفيو ده فيه عوامل انسانية مختلفة عن الاختبار الورقي - ديه مقابلة بين شخصين لاول مرة و المهندس اللي حيقابلك بشر في النهاية. يعني لو هو عنده فكرة مسبقة عن الازهرية مثلا ده اكيد حيظهر على تصرفاته و اذا كان شخص غلس اكيد حيبان و سيتعامل كده. و النصيحة هنا هو انك تحاول تتماسك و لا تستفز (بعض الممتحنين يتعمدوا استفزازك و وضعلك تحت ضغط نفسي لمعرفة كيفية تصرفاتك تحت ضغط - تخيل انه عايز يعرف عنك حاجات كتير و منها اذا كنت حتعرف تشتغل تحت ظروف مختلفة في ساعة واحدة بس!!!). لانه في النهاية مش (هو له المعرفة اللي عندي بس) - لأ طبعا - انت حتبقى عضو في الفريق و اذا كنت مثير للمتاعب و او شخص ضعيف أو متردد أو مستهتر ده حينعكس على الفريق (التيم كله حيعرج).

بص المهم هنا هو انك ممكن تتعرض لكل انواع الاهمال و الاستفزاز و التشكيك في قدراتك و كل ده مفروض انك تتماسك جيدا امامه. و لا تنجر الى العند - انا شخصيا شفت ناس كتير تعرضوا للاستفزاز الشديد في الانترفيوهات و ردوا بالمثل و كانت النتيجة ان النترفيو بيتحرك ناحية الشد و الجذب المتبادل و في النهاية الشغلانة كانت بتطير منهم

الانترفيو الشخصي
Personal Interview

و في الغالب يديره اشخاص من قسم الموارد البشرية (اتش ار) و شغلانتهم الاسئلة الرخمة جدا مثل انت عايز تبقى لما تكبر… و كمان سنتين عايز تعمل ايه… انت ايه عيوبك… و عايز تشتغل في شركتنا بالذات ليه… و حاجات بهذه السخافة.

بصراحه فيه كلام عن الاسئلة الشائعة و الاجوبة الشائعة من على النت. و انا بحبذ انك تتبع هذا الكلام. و لن اخوض فيه لانه سخف. بس المهم انك تبقى عارف اجاباته. و صدقني طول ما انت خريج جديد المهم انك تعمل كويس جدا في الانترفيو الفني.

الاوفر (العرض المالي)
Offer - Gross Salary - Net Salary - Bonus - Benefit - Allowances

سؤال مهم جدا في الانترفيو (و على فكرة طبعا الاماكن الاصغر تدمج الانترفيو في مرة واحدة و الاكبر تقسمه على مرات عديدة). هو سؤال عن المرتب المتوقع. طبعا لو خبطت رقم كبير حيقولوا متعالي و لو رقم صغير حيقولوا مش لاقي شغل و (واقع). و ساعات السؤال ده بيبقى لازم تجاوب عليه علشان كده طبعا لازم تدرس فيما تدرس المرتبات عاملة ازاي و في أي مدى حتى لا تغامر

الشركة بعد ما يقبلوك بيدوك (بيقدمولك) العرض على (التليفون أو بالايميل أو شخصيا) و بالاساس المهم فيه هو المرتب الكلي كام و المرتب الصافي كام (بعد خصم الضرائب و التأمينات الخ) و كمان اذا كان فيه زيادة سنوية كام في المائة و المزايا أو الخمات المقدمة (مثلا تأمين صحي - اتوبيس الشركة) و كمان بدلات الانتقال لو هما بعيد أوي (مثلا 6 اكتوبر) أو لو فيه سفر مثلا. أهم حاجة طبعا هي المرتب الصافي. بالاضافة الى ذلك اذا كان فيه عقد و لا لأ. مدته كام سنة؟ فيه شرط جزائي اذا انت حبيت تستقيل قبل مضي السنتين؟ طب قد ايه (في العادة بيكون مرتب شهرين أو ثلاثة)

طبعا انت عادي جدا انك تسمع الاوفر و تطلب مهلة للتفكير - اوعى تمضي في نفس اللحظة - من الذوق انهم يدولك مهلة عدة ايام للتفكير

ممكن تتفاوض (تفاصل) على المرتب - حسب حجم الشركة و متوسط المرتبات و امكانياتك و كمان الخيارات المتاحة قدامك. بس الاماكن الكبيرة عندهم متوسط مرتبات ثابت

اهم حاجة انك تستعد فنيا و نفسيا جيدا و تدي ثقة للي قدامك انك تستاهل الشغلانة ديه و تحافظ على هدوئك و لا تنجر الى الاستفزاز أو العند - مش انك تقعد خايف و مرتبك و حاسس انها منة منهم انهم ندهولك

العقد و الاوراق
Contract and Documents

على حسب حجم الشركة بس الاوراق المطلوبة في العقد دايما مقدور عليها بس اهم شيء هو الشهادة (المؤقته) و شهادة الجيش (للذكور طبعا). اذا كنت خايف من موضوع العقد و الالتزام و انك تسيبهم فالشهادة المؤقتة بتستخرج منها نسخ و شهادة الجيش كذلك منها بدل فاقد و بالتالي حجز ملفك (أو اوراقك) ده شيء متخفشي منه في احوال النزاع - بس في الوقت ذاته الشغل الجديد ممكن يسألك عن شهادة (أو خطاب) الخبرة من الشغل القديم بالاضافة الى اخلاء طرف من الشغل القديم (طبعا لو سبتهم قبل انتهاء العقد و كانوا زعلانين ممكن يغلسوا و مش يرضوا يمنحوها لك) و كمان حاجة بيقولوا عليها اسمتارة ستة تأمينات على ما اذكر (بتطلع بمحضر في حال النزاع برده). المهم الكلام ده مش مهم ليك أوي بس علشان ما تقلقش من موضوع العقد ده و الالزام. كل الناس مضوا و كانوا بيمشيوا قبل المدة و محصلش حاجة - و طالما نفع لينا يبقى اكيد حينفعلك.

كلمة تخص الذكور فقط
Military Service

اماكن كتير بتوفر على نفسها مجهود و وقت (بيساوي فلوس طبعا) و مترضاش تبص لاي متقدم قبل تحديد موقفه من الجيش. بس برده كمان اماكن كتير بتقبل تشغلك طول فترة ما قبل الجيش (خصوصا لو نص تاني يعني لغاية شهر ديسمبر أو لو ضابط احتياط لغاية شهر اربعة). الحكاية ديه حصلت و كانت معانا مقبولة و اكيد حتنفع معاك. هي طبعا بتمثل عقده - بس كل ما تبدر بالتقديم و كمان كل ما تكون احسن كل ما تتمسك بك الشركة على امل انك تاخد تأجيل

كلمة اخيرة
Final Word

ابذلوا مجهود

ذكرت اني ربما اعرج لاحقا على المؤهلات المختلفة للوظائف من اجل اتمام المجموعة و سأحاول اذا توفر لي الوقت ان ألخص النقاط الهامة في تعلم مجالات البرمجة و الشبكات و التحكم و الهاردوير

منقول من جروب أفضل المهندسين