نصائح لطلبة هندسة انتاج

بداية … تخصص انتاج هو اوسع التخصصات فى هندسة … بلا منازع … ممكن تشتغل فى اكثر من مجال … (( لحام - كشف عن اللحام - صيانة - تشغيل تقليدي وسى ان سى - تشكيل معادن - تصميم - ميترولوجي … إلخ ))

وهذا معناه انك تهتم بكل مادة تدرسها لإنها هتفتحلك مجال جديد فى العمل … وفى اخر سنة تختار و تركز علي مجال معين حابب تشتغل فيه … تجهر نفسك جيدا فيه وتستعد من خلال الكورسات الاكثر تخصصية … وتعمل مشروع تخرجك فيه … سنة كاملة هتاخد فيها خبرة احسن …

  1. اول نقطة نهتم جدا بالمقررات الدراسية … لابد تفهم جيدا ان مفيش حاجة بتدرسها ملهاش تطبيق او ملهاش لزمة … كل حاجة بتحتاجها واسأل اى حد اكبر منك اتخرج واتقدم لوظيفة ايه اللى اتسأل فيه فى الانتر فيو … صحيح انت مظلوم فى ان بعض الدكاترة - غالبا - لا تربط بين المادة النظرية و الواقع العملي … وهذا ما يجعلك تشعر ان فيه مواد حاطينها حشر فى الكلية … لكن دعني اذكرك بأن … لا يوجد مادة تقوم بدراستها ملهاش لزمة …

٢. ثاني نقطة ان الدراسة التقليدية غير كافية ابدا … فلابد ان تطور طريقة مذاكرتك و لازم تتوسع فى اللى بتاخده فى الكلية وتحاول تشوف كل حاجة و تشوف تطبيقها بعينك … مثلا … انت درست فى اول سنة حاجة عن اختبارات الشد … السؤال كام واحد دخل على يوتيوب وكتب Tensile strength test وشاف الموضوع كله بعنيه واستوعبه اكتر وتفوق على صاحبه اللى اكتفى بكلام الدكتور والمحاضرة والمعيد والمعلومة عنده بقت مجرد معلومة نظرية فقط سوف ينساها بعد فترة ؟؟

في البداية سوف تشعر ان المناهج التي تدرسها صعبة جدا وهذا لو انك اكتفيت بشرح الدكتور … سهلة جدا لو ذاكرتها بالشكل دا … وتقدر تشوف المحاضرة دى في اليوتيوب او في كتب ومراجع اخري …

٣. حدد الخطة اللى هتمشى عليها …
برنامج سوليد ووركس علي سبيل المثال … مينفعش بأى حال من الاحوال تبقى طالب ميكانيكا و مبتعرفش سوليد ووركس … مش لازم الشهادة ولا لازم تاخدها فى مركز كورسات … لو تقدر تتعلمه اونلاين اتعلمه و وفر الفلوس لحاجة تانية مش هتقدر تاخدها فى البيت مع نفسك … حالا لو مبتعرفش - سوليد ووركس وقف كل نشاطاتك واتعلمه … ادخل على اي قناة متخصصة وابدا منها …

  • علم نفسك على اليوتيوب … كل يوم افتحه ساعة او اتنين على الاقل واتفرج على فيديوهات فى مجال هندسة الانتاج والتصنيع … اتفرج على فيديوهات How it’s made … ادخل على يوتيوب واكتب كدا و اتفرج عليهم و كرر الفيديو اكتر من مرة و ركز على النقط الفنية فى المكن وخطوط الانتاج … ادخل هنا هتلاقى مجموعة فيديوهات جيده -

  • التدريب … استفيد بقترة الاجازة الدراسية … استغلها كلها فى التدريب … اتدرب فى شركة واتنين وتلاتة … و مفيش مشكلة لو ارتحتلك اسبوع مع اسبوع العيد … يلا ابدأ . ممكن تروح اى شركة ليها علاقة بخدمات البترول … هتظبطك اوى وتقربك شوية من تخصص باور … بعد كدا تروح المصانع الحربية … احنا عندنا ٧٠٠ مصنع بيصنع منتجات مختلفة … روح مصنع الحديد والصلب … مصنع الطيارات … مصنع الذخيرة … مصنع الدبابات … مصنع الرادار فى بنها … إلخ … هتستفيد جدا جدا جدا مع كل مصنع تدخله وهتتدرب تدريب محترم … بس انت التزم بمواعيد التدريب و اسأل فى كل حاجة انت متعرفهاش …

  1. الشغل العملي … اعمل فريق مكون منك انت وكام واحد صاحبك … جمعوا مبلغ كل اسبوع و انزلوا اشتروا من السبتية ووكالة البلح تروس وسيور ومواتير … إلخ مستعملة وخردة وثمنها رخيص… اشتروهم خردة من سوق الجمعة فى البساتين ومن الرملى فى الساحل (( شبرا )) … واعملوا مشاريع طول الوقت … ابدأوا بروبوتات خفيفة … بعد كدا اعملوا نماذج لمكن وخطوط انتاج … عايزك لما توصل لمشروع التخرج تعمله بسرعة وبدون مجهود فى اسبوع لانك هتكون قد اكتسبت خبره عملية …

  2. انزل السوق واتفرج و وشوف ايه الموجود وفين وبكام … انزل السبتية … القللي … شارع الجمهورية … شارع نجيب الريحاني … شوف المحلات والورش اللى هناك … افهم الدنيا فيها ايه و اتعلم لغة السوق … اسأل عن اسعار و تابع الجديد …

  3. المعارض … اهتم جدا جدا جدا بالمعارض الهندسية … خاصة Mach-Tech … لازم تروحه من وانت فى اعدادى … صحيح مش هتفهم حاجات كتير اوى … لكن سنة بعد سنة هتقدر تستوعب اكتر ايه اللى بتشوفه … بعد كدا معارفك هتزيد … ادراكك للسوق هيزيد جدا … و اطلع رحلات لطلبة هندسة وامشى معاهم فى المعرض واشرحلهم كل حاجة بيشوفوها … انت مطلوب منك كدا …

  4. الكورسات التكميلية … - PLC - CNC - لحام - كشف عن لحام - تشكيل وتشغيل … إلخ … دى بقى اخر مرحلة هتمر فيها … زى ما قولنا ان تخصص انتاج واسع جدا … بس فيه حاجات سهل انك تتعلمها و فى نفس الوقت مجالها واسع او هتخدّم على شغلك فيما بعد … زى CNC - PLC دول تتعلمهم فى الكلية … فى سنة تانية او تالتة كويس جدا … الكورسات المتخصصة اكتر تخليها لأخر سنة (( دا بإفتراض انك استثمرت وقتك جدا فى السنين اللى فاتت )) لو انت ضعيف ومش لاقى حاجة تعملها ممكن تقوي نفسك فى الكورسات دى … بس حاول تكون اونلاين مش على النت …

ونصيحة اخيرة … انت مش بتاع ميكاترونكس … فمتسبش تخصصك و تقضى حياتك كلها فى الروبوتس !!! البرمجة مش مهمة بالنسبالك … اخرك تتعلم G-code - Ladder programing ومفيش مشكلة لو اتعلمت اردوينو على خفيف علشان تسعد بالمشاريعك وهى بتتحرك …

أبشروا ياتخصص انتاج … فيه مفاجآت حلوة فى الايام الجاية ليكم ان شاء الله …
لكل شىء تاج … وتاج الهندسة ( هندسة انتاج وتصنيع) ٠مع تمنيات لكم بالتوفيق والنجاح في الحياة العملية.

3 Likes

بسمِ الله الرّحمن الرّحيم
السّلامُ عليكمُ ورحمة الآه تعالى وبركاته
ما شاء الله!
تَباركَ الله!
موضوعٌ قيّمٌ،
وشرح نافع!
أضافَ إليّ كثيرًا!
فجزاكم الله تعالى خيرًا أخي المُبارك “م. صلاح”،
وزادكمُ المولى تَباركَ من واسِع فضله؛ آمين.

1 Like

شكرا أختى الزميلة المهندسة AlSanaa بارك الله فيكي

1 Like