Screening
الشركة تقوم باستقبال مئات الرسائل أو اكثر (لا تتعجب - لان كل واحد ببساطة يقدر يقدم عن طريق ارسال ايميل بسيط به السي في - لا أكثر و لا أقل - و كمان الاعلان بيوصل للالاف عن طريق الجروبات و غيرها). و تقوم الشركة في العادة بعدد من عمليات الفلترة : تعهد الى احد المهندسين أو احد افراد قسم الموارد البشرية بالفلترة (أو حتى احد السكرتارية في مراحل الفلترة الاولية). اولا حذف الرسائل التي لا تلتزم بالعنوان و غيره من المنصوص عليه في الاعلان - ثانيا فتح السير الذاتية و استبعاد الخبرة الغير ملائمة (كأن يكون مطلوب مهندس شبكات و المتقدم كل السي في بتاعته بتتكلم عن البرمجة الخ) ثم بعض عمليات الفلترة حسب الجامعة مثلا أو التقدير أو الموقف من التجنيد أو محل السكن الخ و كل ده خاضع لمزاج (سياسة) الشركة أو بالاخص المسؤول في قسم الموارد البشرية (اللي هو شئون العاملين يعني) أو اذا كانت الشركة صغيرة فالشروط ديه بيحطها مدير المشروع أو صاحب الشركة مباشرة. و بعدين بيرتبوا السير الذاتية حسب معاييرهم و يطبعوها و يبدأوا يعرضوعا على المهندس المسئول عن الفريق لاختيار مجموعة منهم يراها مناسبة لعمل انترفيو ((من مفاتيح التوظيف: لاحظ مدى اهميه السي في هنا - لان الورقتين دول اللي لسه حنتكلم عنهم بيعبروا عنك تماما و ممكن تستبعد من الوظيفة بسببهم - ببساطة انت مش موجود و انبت عنك ملف وورد!! - احذر! اذا كان الملف مبيتفتحش من كل الاجهزة أو كانت البهرجة فيه زايدة لدرجة انه مش واضح غير في اصدار معين من الوورد فانسى امر الشغلانة - لانه لو ما اطبعش بصورة مقروءة خلاص ايه اللي حيخليهم يقرفوا نفسهم - حيرموه علطول)) .
المكالمة
The Phone Call
و بهذا يصل العدد من المئات للعشرات و تبدأ السكرتارية بالاتصال ((طبعا مفهوم ان سيادتك لازم تكتب في السي في تليفوناتك - حنتكلم لاحقا عن عناصر السي في لكن من سياق الكلام مفروض تفهم محتويات السيرة الذاتية و أهمية و فايدة كل جزء)) . طبعا حيتصلوا بيك ((هما بيتصلوا بيك انت - ما تتخضش لما تلاقي حد بيكلمك بذوق و بيقولك لاول مرة في حياتك الو المهندس فلان؟ أو المهندسة فلانة؟ - عادي جدا انهم لازم يتصلوا بكل واحد و كمان ممكن اللي بيكلمك ما يكونش سكرتيرة ممكن يكون مهندس كبير بيتكلم بنفسه - عادي برده)) . الو احنا شركة كذا و عندك انترفيو يوم كذا. أو ممكن يخيروك في أيام و مواقيت معينة - و اذا ادوك الاختيار اختار المناسب لك أو حتى لو كان عندك ظرف مش مشكلة تتفاوض على المعاد ((لازم تفهم انهم كلموك بعد تأني و فحص و بالتالي هما شايفين فيك مبدئيا مرشح جيد للوظيفة - يعني مش بيمنوا عليك - مفيش يد عليا هنا)) .
المهم تفهم ان ده بيحصل مع كل الناس - حصل معانا و حيحصل معاك و ده مش معناه انهم غلطانين في العنوان أو فاكرين انك جامد جدا الخ .. و متروحش مخضوض منهم لهذا السبب. مهم تعرف اسم الوظيفة ايه (علشان لو كنت مقدم في حتت كتير) و حاجة تانية مهمة طبعا تعرف العنوان كويس و تعرف المعاد و تكتب ده كله علطول.. مهم برده تعرف هو ده اختبار و لا انترفيو
ادرس الشركة
Study for the interview
انا ذكرت الحكاية ديه قبل كده. انت عارف دلوقتي اسم الشركة و كمان الوظيفة. حاول ترجع للاعلان ((يعني لازم تحتفظ بالايملات اللي انت قدمت فيها)) .. و تبدأ تحضر نفسك من النت و غيره. و اذا كان اختبار لازم تذاكر له كويس.
مراحل المقابلة
Interview Steps
بعض الشركات بتزود مرحلة اخرى من الفلترة عن طريق اما انترفيو على التليفون (يكلمك مهندس و يدردش معاك) أو يطلبوا منك تيجي تعمل اختبارات انجليزي و اي كيو (اثرت عدم خلط الحروف العربي و الانجليزي لانها ساعات بتلخبط السطور) و بعض الاختبارات الاخرى التقنية راجع الملف المرسل من قبل (و كذا النت و جووجل) حول Job Interview Questions, IQ Test, English
و استعد لها جيدا . بعض الشركات تطلب منك المجئ و تعطيك مسألة و تطلب منك حلها على الجهاز. و على عكس الانترفيو اللي بيكون دائما فردي تماما (يعني انت لوحدك) فان الاختبارات ممكن تكون جماعية.
نتائج الاختبارات تكون فكرة اوضح مع السي في عن الشخص و بالتالي لازم تتوقع اسبوع كده من ساعة الاختبار على ما يصححوا للناس كلها و يحاولوا يرتبوهم تاني.
عموما المراحل تختلف و ترتيبها و عددها حسب سياسة و رؤية و حجم الشركة - الموضوع برده مدارس
ما قبل المقابلة
Pre-Interview
لما ييجي اليوم انزل من بدري حاول توصل قبل معادك ((من مفاتيح التوظيف: التزم حرفيا بالمعاد لان ده اول انطباع انك مهمل في مواعيدك..)) ((لو حصلك ظرف اتصل بيهم فورا و حاول تغير المعاد - حتى لو صرفت نظر اتصل اعتذر - اترك سيرة طيبة)) ((لو تهت و حاسس انك حتتأخر - اتصل بيهم قولهم انا تايه و عادي جدا لانك اول مرة تروح العنوان ده عادي جدا - المهم انك ما تتأخرش بدون سبب و كمان بدون مكالمة)) و بعدين تدخل الشركة قبل المعاد بخمس - عشر دقايق و تسأل السكرتير - انا فلان و عندي انترفيو بخصوص برمجة/شبكات/تحكم الخ.. و تنتظر .. مرة أخرى ما تتخضش لو لقيت حد مهم مثلا صاحب الشركة أو مهندس كبير جاي بنفسه يحييك - عادي مش اشتغالات بس عادي لازم الناس تشوف مين ده اللي حيبقى واحد منهم.
للمرة العاشرة ما تتخضش لانك حتلاقي وقت مخصص لك وحدك مع احد المهندسين - لان ناس كتير كنت بشوفهم بيتخضوا و ادائهم في الانترفيو بيكون مرتبك جدا - المشهد بتاع مكتب المخدماتي و طوابير التوظيف - و امتحانات المعمل الشفوي.. ديه كلها ملهاش دعوة بالشغل .
عودة للسيرة الذاتية أو السي في
CV or Resume
موضوع الانترفيو هو ان المهندس قاعد قدامه واحد السي في بتاعته بتقول انه مناسب مبدئيا للوظيفة المطلوبة و المطلوب دلوقتي معرفة اكتر و تأكيد ده… لكن واضح ان دور السي في حاضر بقوة من اول العملية .. يعني لازم نعرف ايه هي السيرة الذاتية أو السي في اللي بتشكل حاجة مهمة جدا في عملية التوظيف..
احنا ذكرنا ان الاعلان به مؤهلات مطلوبة اغلبها تقني (معرفة بالسي شارب - الداتا بيز سيكول الخ) و بعضها غير تقني (زي الانجليزي - يتقبل السفر الخ). و كمان ذكرنا عمليات فلترة مختلفة.. يبقى لازم السي تجاوب على كل الاسئلة ديه .
اجزاء السي في
المعلومات الشخصية
Personal information
الاسم (الاسم الاول و اللقب بس - ديه مش حكومة يعني مش لازم الاسم خماسي) - العنوان - التليفون (و المحمول) - البريد الالكتروني (بلاش الحاجات اللي ذكرناها قبل كده) - تاريخ الميلاد - الحالة الاجتماعية - الخدمة العسكرية (طبعا مش للبنات) - اللغات (مستواك في الانجليزي) - الصورة (لا أحبذ وضع الصورة ابدا - لان الاختيار على اساس الشكل ملوش معنى عندنا - احنا مش موظفين استقبال - بل بعض الناس بتعتبرها نقطة سوداء - الا اذا نص الاعلان على ان ترسل الصورة و ده بيطلبه السعوديين ساعات)
الاهداف
Objectives
ببساطة في سطر أو اتنين تذكر انت عايز تشتغل ايه؟ و ليه في المرحلة ديه؟ و عايز مستقبلك يروح لفين؟ - طبعا فيه كلام محفوظ من على النت - انت حر - بس هو ببساطة الشركة عرفت اسمك ايه - طيب انت عايز ايه؟
التعليم
Education
انت فلان و عايز تدخل مجال الشبكات - كويس انت مؤهلاتك الدراسية ايه؟ تذكر البكالوريس و ساعات الناس بتذكر الثانوية (علشان لما تتفرج على سيفيهات من على النت) في الغالب بيبقوا عايزين يذكروا اسم المدرسة لو بيدرسوا الماني أو فرنساوي الخ.. المهم البكالوريوس و بيتكتب معاه التقدير و اسم و تقدير المشروع
الخبرة / التدريب / الدورات
Training / Experience
طبعا المفروض تكتب اسم الشركة و المدة اللي قضيتها عندهم و المسمى الوظيفي و ممكن نبذه عن المسئوليات الموكلة اليك و المشاريع اللي نفذتها معاهم. طبعا احنا خريجين جدد بلا خبرة - فاذا كنت قد تدربت في احد الاجازات اكتب الكلام ده و لو اخدت دورة أو شهادة اكتبها
المشاريع / مشروع التخرج
Projects / Graduation Project
مشروع التخرج له صيغة راجع الملفات المرفقة - و اذا كنت قد قمت باي مشاريع اخرى اثناء عمل/ تدريب/ دورات/ تعلم فاكتبها
المهارات التقنية
Technical Skills
اهم شيء!!! سرد لما تعرفه و تـتـقـنـه من لغات البرمجة و قواعد البيانات و ادوات/تقنيات البرمجة و التحليل و نظم التشغيل ((لا تكذب و لا تتجمل - لانك ستسأل عن ذلك في الانترفيو من قبيل - انت كاتب انك بتعرف دوت نت طب بتعرف ايه عن كذا و كذا .. الخ))
المهارات الشخصية
Personal Skills
كلام في الغالب منقول - عن انك تعمل بجهد و تحت ضغط الخ الا اذا كنت عضو فعال في جمعية او نشاط عام فاكتب عنه
ملحوظة عن السي في
Simple as possible - Clown Pants
حاول انت تتاكد انها تقرأ جيدا على اي اصدار من الوورد و كمان بتطبع بدون مشاكل (بدون ما تدخل كل حاجة في بعضها)
اذا قدرت تحولها الى بي دي اف فارسلها كذلك
ابتعد عن الالوان و المهرجانات في الخطوط و التنسيق أو ما يقال عنه ألوان بنطلون الاراجوز
اياك و أغلاط الانجليزي - انت بتكتبها على مهل .. مفيش حاجة تمنعك من التدقيق اللغوي
في العادة بتكون من صفحة الى اتنين بس مش اربع صفح - انت خريج جديد
السي في كعملية جرد
انا شخصيا باعتبر كتابة سي في هو بمثابة جرد لما تعرف و ما لا تعرف - و لأي مدى تثق بهذه المعرفة لدرجة انك تكتبه في السي في؟ فاذا كنت طالبا فاكتبها الان - و ضيف اليها كل ما تتعلم / تتقن حاجة
منقول من جروب أفضل المهندسين